اقتاۋ قالاسىندا قۇرىلىسشىلار مەرەكەسىنە وراي وبلىستىق دەڭگەيدە سالتاناتتى شارا ۇيىمداستىرىلدى. بۇل تۋرالى ماڭعىستاۋ وبلىسى اكىمىنىڭ ءباسپاسوز قىزمەتى حابارلادى.
مەرەكەلىك كەشتە ايماق باسشىسى سەرىكباي ترۇموۆ قۇرىلىس سالاسىنىڭ ارداگەرلەرى مەن قىزمەتكەرلەرىن ءتول مەرەكەلەرىمەن قۇتتىقتاپ, جىل ىشىندە ەڭبەكتە وزات, كاسىپتە تابىستىلىعىمەن كوزگە تۇسكەن ءبىر توپ وزات قۇرىلىسشىلاردى قر يندۋستريا جانە ينفراقۇرىلىمدىق دامۋ مينيسترلىگىنىڭ «قۇرمەتتى قۇرىلىسشى», «قۇرمەتتى جولشى» توسبەلگىلەرىمەن, «قۇرمەت گراموتاسىمەن» ماراپاتتادى.
جيىندا ءسوز العان ءوڭىر باسشىسى «كەز كەلگەن ەلدiڭ ەكونوميكالىق كۇش-قۋاتى مەن الەۋمەتتiك تۇراقتىلىعى قۇرىلىس سالاسىنىڭ دامۋىنا تiكەلەي بايلانىستى. وسى ورايدا, ماڭعىستاۋ وڭىرىندە قۇرىلىس سالاسى ەرەكشە قارقىنمەن دامىپ, اۋىز تولتىرىپ ايتارلىقتاي قوماقتى تابىستارعا قول جەتكىزۋدە. جىل سايىن كارى كاسپي جاعالاۋىمەن جاپسارلاس بوي تۇزەگەن اقمارجان اقتاۋ كەلبەتى كوركەيە, قاناتى كەڭي تۇسەرى انىق. وسى ورايدا قىزۋ ەڭبەكتىڭ بەل ورتاسىندا تەر توگىپ جۇرگەن قۇرىلىس-ساۋلەت سالاسىنىڭ «سايىپقىراندارىنا» قۇرىلىس سالاسىن ىلگەرىلەتۋ ءىسىن تىڭ سەرپىنمەن العا سۇيرەپ, ءوڭىر ەكونوميكاسىنىڭ سان-سانالى دامۋىنا قوسقان لايىقتى ۇلەسىڭىز ءۇشىن العىسىمىز شەكسىز» دەپ ءوزىنىڭ جىلى لەبىزىن ءبىلدىردى.
مەرەكە قارساڭىندا قۇرىلىسشىلار وبلىستىق وتباسىلىق ۇلگىدەگى بالالار اۋىلىن نازاردان تىس قالدىرماي, بالالار ءۇيى مەملەكەتتىك مەكەمەسىنە قايىرىمدىلىق كومەك كورسەتتى.