ارميا ويىندارى ايبىنىمىزدى اسىرادى

ءبىزدىڭ ەنشىمىزدە – ءۇش بايقاۋ

ويىن باعدارلاماسىنداعى 32 بايقاۋ­دىڭ 3-ەۋى قازاقستاندا وتەدى. ءبىزدىڭ ەلىمىز­دەگى سىناقتارعا 13 مەملەكەتتىڭ اسكەري قىزمەتشىلەرى قاتىسادى, ونىڭ ىشىندە قازاقستان قارۋلى كۇشتەرىنىڭ كومانداسى دا بار.

حالىقارالىق ويىننىڭ اشىلۋىندا پوليگون كوگىنە ارميا ويىندارىنىڭ تۋى كوتەرىلىپ, قاتىسۋشى قازاقستان, رەسەي, قىر­عىزستان, وزبەكستان, ازەربايجان, ار­مە­نيا, بەلارۋس, ۆەنەسۋەلا, زيم­باب­ۆە, يران, سيريا, تاجىكستان مەن قىتاي­دىڭ قارۋلى كۇشتەرىنىڭ كوماندالارى الاڭ­دا سالتاناتتى پارادپەن ادىمداپ ءوتتى.

– قازاق ەلىندە حالىقارالىق دەڭگەي­دەگى ارميا ويىندارىنىڭ تۋى وسىمەن ءتورتىنشى رەت جەلبىرەگەلى تۇر. بۇگىندە حالىقارالىق ارميا ويىندارىن وتكىزۋدە وزىندىك يگى ءداستۇر قالىپتاستى. ويىندار شەڭبەرىندە قاتىسۋشى ەلدەردىڭ اسكەري قىزمەتشىلەرى قارىم-قابىلەتىن شىڭداپ, تاجىريبە الماسۋ ارقىلى كاسىبي دەڭگەيىن ارتتىرا تۇسەدى,  دەدى ويىنداردىڭ اشىلۋ سالتاناتىندا قورعانىس ءمينيسترى.

 ن.ەرمەكباەۆتىڭ ايتۋىنشا, وتكەن بەس جىل ىشىندە حالىقارالىق ارميا ويىن­دارىنىڭ مازمۇنى تولىعىپ, ماڭى­زى ارتا تۇسكەن.

– ءبىزدىڭ بابالارىمىز قارىمدى اسكەري داعدىنىڭ تەك جاتتىعۋدا قالىپ­تا­ساتىنىن جاقسى بىلگەن. ۇلى دالانى جايلاعان كوشپەندىلەردىڭ وقۋ-جاتتىعۋ ادىستەرى سوعىس جاعدايىنا بارىنشا لا­يىق­تالىپ, ساربازداردىڭ شەبەرلىگىن ارت­تىرۋعا باعىتتالدى. قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ « ۇلى دالانىڭ جەتى قىرى» اتتى ماقالاسىندا ءبىزدىڭ تاريحىمىزدىڭ ءبىرىنشى قىرى رەتىندە اسكەري سالاداعى كولەمدى رەۆوليۋتسيانى اتاپ ءوتۋى بەكەردەن-بەكەر ەمەس, – دەدى ن.ەرمەكباەۆ.

جالپى, XXI عاسىر ارمياسىنىڭ نەگىزگى ماقساتى الەمنىڭ ءار تۇكپىرىندە بەيبىتشىلىكتى ساقتاۋ ەكەنى ءسوزسىز. ونىڭ ۇستىنە اسكەري ساراپشىلار حالىقارالىق ويىنداردى اسكەري ديپلوماتيانىڭ جاڭا بەلەسى دەپ سانايدى. ويتكەنى اسكە­ري-سپورتتىق الاڭداردا تانىسىپ, ءوزارا باسەكەگە تۇسەتىن قاتارداعى اسكە­ري قىز­مەتشىلەردىڭ دوستىق قارىم-قاتىناسى اركەزدە جوعارى باعالانىپ كەلەدى.

اتالعان ارميا ويىندارى اياسىندا 7-15 تامىز ارالىعىندا ەلىمىزدە ءۇش كونكۋرس وتەدى. اتاپ ايتار بولساق, مينواتقىش ەسەپتوپتارىنىڭ – «ارتيللەريالىق وق اتۋ شەبەرلەرى», ۇشقىشسىز ۇشۋ قۇرىل­عىلارىنىڭ – «سۇڭقار اڭشىلىعى» جانە بايلانىسشىلار اراسىنداعى – «سەنىم­دى قابىلداۋ» سايىستارى. قازاق­ستان ارميا ويىندارىنىڭ اۋقىمىن كەڭەيت­كەن ەلدەردىڭ ءبىرى جانە ءتورت جىل بويى ءتۇرلى ەلدەردىڭ كاسىبي اسكەري­لەرى مەن كونتيگەنتتەرى وسىندا باس قوسىپ جۇر­گەنىن ايتا وتكەن ءجون. قاتىسۋ­شى­لاردىڭ وزدەرى اتاپ وتكەندەي, ءوز ەلىنىڭ جانە الەمدىك دەڭگەيدەگى ارميالاردىڭ اتىنان كونكۋرسقا كەلۋ ءۇشىن ولار كۇردەلى ىرىك­تەۋلەر مەن قاجىرلى دايىن­دىق­­­تار­دان ءوتتى. جۇلدەلى ورىندار مەن مارا­پات­تار ماڭىزدى بولعانىمەن, ولار­دىڭ ارقايسىسى ءۇشىن ارميا ويىندارى – تەك جارىس قانا ەمەس, اسكەري باۋىر­لاس­تىقتىڭ سيمۆولى مەن تاجىريبە الماسۋ­دىڭ مۇمكىندىگى.

وسى ورايدا قورعانىس ءمينيسترى ن.ەرمەك­باەۆ قازاقستان اۋماعىندا وتەتىن ويىنعا قاتىسۋعا تىلەك بىلدىرگەن مەملەكەتتەر سانى جىل سايىن كوبەيىپ كەلە جاتقانىنا نازار اۋداردى.

– بۇل – بىزگە سەنىمنىڭ ارتقانىنىڭ, ارميامىزدىڭ كاسىبيلىگىن, بەلسەندىلىگىن مويىنداۋدىڭ بەلگىسى, – دەپ اتاپ ءوتتى قورعانىس ءمينيسترى.

 العاشقى ناتيجەلەر بەلگىلى

ال وسى كەزدەرى حالىقارالىق ارميا ويىندارىندا قازاقستاندىق كوماندا العاشقى ماراپاتتارعا قول جەتكىزدى. ماسكەۋ وبلىسىنداعى «ادال دوس» سايى­­سىن­دا ءبىزدىڭ كينولوگتار رەيتينگى انا­عۇرلىم جوعارى كوماندالار اراسىندا جەكە جارىستا ءبىرىنشى ورىندى جەڭىپ الدى. «چەمپيوندار جارىسى» كەزەڭى اياسىندا اسكەري پوليتسيانىڭ كينولوگى ەفرەيتور ماعجان جاڭابەكوۆ «ارنو» دەگەن قىزمەتتەس يتىمەن قالعان قاتىسۋشىلاردى باسىپ وزىپ, 1 600 مەتردى 6 مينۋت 6 سەكۋندتا باعىندىردى جانە اتىس شەبىندەگى بارلىق نىساناعا ءدال تيگىزدى.

بايقاۋدىڭ ءبىرىنشى كەزەڭىنىڭ ناتي­جەلەرى بويىنشا قازاقستاندىق كوماندا ۇزدىك ۇشتىكتە. ايتالىق, ماسكەۋ وبلى­سىن­داعى «الابينو» پوليگونىندا ءوتىپ جات­قان «تانك بياتلونىندا» ءبىزدىڭ تان­كيس­تەر سايىستىڭ ەكىنشى كۇنىنىڭ قورى­تىن­دىسى بويىنشا ءبىرىنشى ورىنعا شىق­تى. ەكيپاج ءوز جارىسىندا مارەگە 21 مي­نۋت 50 سەكۋندتا كەلىپ, ۇزدىك ناتيجە كورسەتتى.

ال ريازانداعى «اۆيادارتس» سايىسى­نىڭ ءبىرىنشى كەزەڭىندە ءبىزدىڭ اسكەري ۇش­قىش­تار دەنە دايارلىعىنان ۇزدىك ناتيجە كورسەتتى. سۋ-25 جويعىش ۇشاعى, مي-35 جانە مي-171ش تىكۇشاقتارىنىڭ ەكي­پاج­دارى – ءبىرىنشى, ال سۋ-30سم جوي­عىش ۇشا­­عىنىڭ ۇشقىشتارى ءۇشىنشى ورىندى يەلەندى.

سونىمەن قاتار ماسكەۋ ماڭىنداعى الابينودا ءوتىپ جاتقان «دالالىق اس ءۇي», سونداي-اق وزبەكستانداعى «فوريش» پوليگونىندا باستالعان «اسكەري-مەديتسينالىق ەستافەتا» تۋرنيرلەرىنىڭ قورىتىندىسى بويىنشا كوماندالار ەكىنشى ورىنعا قول جەتكىزدى.

برەستتەگى (بەلارۋس) مەرگەندەر سا­يىسىندا قازاقستاندىقتار ۇزدىك ۇشتىك قاتارىنان كورىندى. قازىر ولار جەكە سىناقتا ءۇشىنشى بولىپ تۇر.

ازەربايجانداعى «تەڭىز كۋبوگى» كون­­كۋرسىندا اسكەري تەڭىزشىلەر وز­دەرىن لايىق­تى دەڭگەيدە كورسەتە ءبىلدى. كەمە­نىڭ ۇرىستا ومىرشەڭدىگى مەن تەڭىز جاعا­سىن­­داعى جاتتىقتىرۋ كەشەندەرىندە جات­تى­عۋ ورىنداۋدان ولار ءۇشىنشى ورىن­­­­عا يە بولدى.

ءدال وسى ساتتە موڭعوليا وقۋ-جاتتىعۋ پوليگونىنداعى قازاقستاننىڭ اسكەري كومانداسى بيىل العاش رەت ءوتىپ جاتقان «اسكەري بايگە» سايىسىندا دا جۇلدەلى ءۇشىنشى ورىندا كەلەدى.

ارمەنياداعى «الەم جاۋىنگەرىنە» قاتىسۋشىلار اسكەري-مەديتسينالىق دا­يىن­دىقتا باق سىناسۋدا. ءبىزدىڭ كوماندا بۇل كەزەڭدى دە ءۇشىنشى ورىنمەن ءتامامدادى. سونداي-اق قازاقستاندا سا­يىستار باستالعان ءبىرىنشى كۇننىڭ وزىندە-اق «سەنىمدى قابىلداۋ» بايقاۋىندا ءبىزدىڭ بايلانىسشى جاۋىنگەرلەر 5 كوماندا اراسىنان 281 ۇپايمەن كوش باس­تادى.

سونىمەن قاتار ەلىمىزدىڭ اسكەري قىز­مەت­شىلەرى «ات مارافونى» جاڭا باي­قاۋىنا ساقاداي ساي دايىندىقپەن كىرىستى. موڭعوليا قارۋلى كۇشتەرى بىرىك­كەن وقۋ-جاتتىعۋ ورتالىعىنىڭ بازاسى­نا كەلگەن ساتتەن باستاپ ءبىزدىڭ كومان­دا تولىق تانىستىرىلىم مارشرۋتى­نان ءوتتى. بايقاۋ مارشرۋتتارى بويىنشا جول جۇرگەن كەزدە كوماندالار ات مارا­فونى­نىڭ كەزەڭدەرى وتەتىن جەردىڭ لاند­شافتى­مەن تانىسىپ, جەرەبە تاستاۋ ارقىلى جىلقىلاردى ىرىكتەدى, اتپەن ءجۇرۋ ءۇشىن ولاردى جۇگەندەپ, ەرتتەدى. قاتىسۋشىلار مەن باپكەرلەر شتابى ءوتۋ جىلدامدىعىن ەمەس, بايقاۋ كەزەڭدەرىن دۇرىس ءارى ساپالى ورىنداۋ­دا شەبەرلىكتەرىن ۇشتادى. ۋاقىت پەن اۋا رايىنداعى ايىرماشىلىققا قارا­ماستان, قازاقستان قۇراماسى جەرگى­لىكتى جەردىڭ ەرەكشەلىكتەرىنە تەز بەيىم­دەلىپ, جاتتىعۋلار بارىسىندا قيىندىق­تار­دى سەزىنگەن جوق. كەزەككە سايكەس, قاشىق­تىققا شابۋداعى بايقاۋدا قازاقستان كومانداسى العاشقى بولىپ شىعادى. ات مارا­فونىنىڭ قورىتىندىسى بۇگىن بەل­گىلى بولادى. جالپى, بايقاۋ ءتورت كەزەڭ­­نەن, ياعني دايىندىق, ات مارافونى, قىسقا قا­شىق­تىققا ارالاس ەستافەتا جانە شەشۋشى كەزەڭنەن تۇرادى.