پارلامەنت سەناتىنىڭ دەپۋتاتى سولتۇستىك قازاقستاندا جۇمىس ساپارمەن بولدى

الداعى جىلدارى كوپبالالى وتباسىلارعا ارنالىپ 81 پاتەر سالىناتىن بولادى. بۇل تۋرالى وڭىرىمىزگە ات باسىن تىرەگەن پارلامەنت سەناتىنىڭ دەپۋتاتى  ولگا پەرەپيچينا مالىمدەدى. حالىق قالاۋلىسى  جۇمىس ساپارى بارىسىندا 19-شى ىقشام اۋداندا سالىنىپ جاتقان تۇرعىن ۇيلەردىڭ قۇرىلىسىمەن, سونداي-اق جۇمىس قارقىنى باسەڭدەپ كەتكەن «ەدينستۆو» جشس-ءنىڭ  تىنىس-تىرشىلىگىمەن تانىستى.  م.قوزىباەۆ اتىنداعى سقمۋ-دە بولىپ, بيىل سالىناتىن جاڭا جاتاقحانانىڭ جوسپارىن كوردى.

«ەدينستۆو» كاسىپورنى ۇيلەردىڭ قاسبەتىن قاپتاۋعا ارنالعان تەمىر بەتوندار,  باسقا دا  قۇرىلىس ماتەريالدارىن شىعارۋمەن اينالىسادى. بىراق زاماناۋي قۇرىلعىلارمەن جابدىقتالعانىنا قاراماستان مۇندا جۇمىس قارقىنى باسەڭدەپ كەتكەن. تەك جەتكىزۋشى ءرول عانا اتقارىپ وتىر.

«وسنوۆانيە», «الفا سەۆەر» سەكىلدى كومپانيالار قۇرىلىس ماتەريالدارىن بىزدەن الادى. باسقالارمەن سالىستىرعاندا باعانىڭ ءسال-ءپال قىمباتتاۋ بولۋى ينەرتتى ماتەريالداردىڭ قۇنى شارىقتاپ كەتتى. وڭىردە تسەمەنت زاۋىتى جوق بولعاندىقتان ونى وڭتۇستىك ورالدان, ال قيىرشىق تاستى 200 شاقىرىم جەردەن تاسيمىز. مۇنىڭ ءبارى – قىپ-قىزىل شىعىن. دەسەك تەباسەكەلەستىككە دايىنبىز», دەيدى  «ەدينستۆو» جشس-ءنىڭ ديرەكتورى اندرەي تيتوۆ.

زاۋىت جىلىنا 46 مىڭ شارشى مەتر قۇرىلىس ماتەريالدارىن شىعارۋعا قاۋقارلى بولا تۇرا تۇتىنۋشىلارعا  5 مىڭ شارشى مەتەر ءونىمدى كەم جەتكىزگەن. جۇمىسشىلار  سانى 140-تان 80-گە دەيىن قىسقارعان. كەلىسىم-شارت جاساسقان ارىپتەستەرىنىڭ قارىزى 300 ميلليون تەڭگەدەن اسىپ كەتكەن. سولاردىڭ ءبىرى –19-شى شاعىن اۋداندا 5 قاباتتى تۇرعىن ءۇي سالىپ جاتقان «اكتسەنت كز» جشس.  مۇندا قۇرىلىس  قارقىنى وتە باياۋ. الەۋەتى ونىمەن دەڭگەيلەس  «الفا سەۆەر» جشس-ءى ەكى  ءۇيدى پايدالانۋعا بەرگەن.

سەنات دەپۋتاتى تۇرعىندارمەن تىلدەسىپ, جاڭا باسپانالاردىڭ ساپاسى جايلى, قانداي پروبلەمالار تولعاندىراتىنىن سۇراپ ءبىلدى.

«وبلىستا  19 مىڭ ادام ءۇي كەزەگىندە تۇر. ولاردىڭ  7  مىڭى – الەۋمەتتىك از قامتىلعاندار.  پەتروپاۆل قالاسىندا 10 كوپقاباتتى جانە «سولنەچنىي» كەنتىندە 128 ءبىر قاباتتى  ۇيلەردىڭ قۇرىلىسى ءجۇرىپ جاتىر. بۇل ماقساتقا رەسپۋبليكالىق, وبلىستىق بيۋدجەتتەن, سونداي-اق ۇلتتىق قوردان 11 ميلليارد تەڭگە بولىنگەن. بۇل ۇيلەر جالعا جانە يپوتەكالىق نەگىزدە قولدانىسقا بەرىلەدى», دەدى و. پەرەپەچينا.

حالىق قالاۋلىسى م.قوزىباەۆ اتىنداعى سقمۋ-عا دا  ات باسىن تىرەدى. مۇندا ول ستۋدەنتتەرگە قىزمەت كورسەتەتىن  ورتالىقتا بولىپ,  جۇمىسىمەن تانىستى.  پايدالانۋعا بەرىلگەننەن بەرى ورتالىق  21 مىڭ قىزمەت ءتۇرىن ۇسىنىپتى.

بيىل ۋنيۆەرسيتەت اۋماعىندا 1200 ستۋدەنتكە شاقتالعان 12 قاباتتى جاتاقحانانىڭ قۇرىلىسى باستالادى. جوبانىڭ سمەتالىق قۇجاتتار دايىن. تەك قالتالى  ينۆەستور كۇتىپ وتىر. بۇدان بولەك, 300 ستۋدەنتكە ارنالعان جاتاقحانانىڭ قۇرىلىسى باستالىپ, كەلەر جىلى قولدانىسقا بەرىلەدى.

سولتۇستىك قازاقستان وبلىسى