مەملەكەت باسشىسى قاسىم-جومارت توقاەۆتىڭ تاپسىرماسىمەن بولىنگەن 5 مىڭ الەۋمەتتىك ءبىلىم گرانتىن جەرگىلىكتى اتقارۋشى ورگاندار كونكۋرستىق نەگىزدە ۇلەستىرەدى. بۇل ءۇشىن وبلىس, رەسپۋبليكالىق ماڭىزى بار قالالار مەن استانا اكىمدەرىمەن كونكۋرستىق كوميسسيالار قۇرىلاتىن بولادى, دەپ حابارلايدى قازاقپارات.
قر ءبىلىم جانە عىلىم مينيسترلىگىنەن ءمالىم ەتكەندەي, گرانتتارعا كوپبالالى نەمەسە اتاۋلى الەۋمەتتىك كومەك كورسەتىلەتىن وتباسىلاردان شىققان بالالار ۇمىتكەر بولا الادى.
5 مىڭ ءبىلىم گرانتى وڭىرلەرگە ءارتۇرلى بولىنگەن. اتاپ ايتقاندا, نۇر-سۇلتان قالاسىنا - 165, الماتى قالاسىنا – 190, شىمكەنت قالاسىنا – 390, الماتى وبلىسىنا – 540, اقمولا وبلىسىنا – 390, اقتوبە وبلىسىنا – 180, اتىراۋ وبلىسىنا – 220, شقو-عا – 180, جامبىل وبلىسىنا – 460, بقو-عا – 100, قاراعاندى وبلىسىنا – 195, قوستاناي وبلىسىنا – 85, قىزىلوردا وبلىسىنا – 390, ماڭعىستاۋ وبلىسىنا – 305, پاۆلودار وبلىسىنا – 75, سقو-عا – 60 جانە تۇركىستان وبلىسىنا 1345 گرانت ءبولىنىپ وتىر.
كونكۋرسقا قاتىسۋ ءۇشىن 2019 جىلعى ماۋسىم ايىندا وتكىزىلگەن ۇبت-دا شەكتى بالل جيناۋ ماڭىزدى بولىپ تابىلادى.
«ۇلتتىق جوعارى وقۋ ورىندارىنا ءتۇسۋ ءۇشىن ۇلتتىق بىرىڭعاي تەستىلەۋ ناتيجەسى بويىنشا – كەمىندە 65 بالل, باسقا جوعارى وقۋ ورىندارىنا – كەمىندە 50 بالل, «پەداگوگيكالىق عىلىم» باعىتى بويىنشا – كەمىندە 60 بالل جيناۋ كەرەك.
كونكۋرسقا قۇجاتتار 5 مەن 10 تامىز ارالىعىندا قابىلدانادى.
ءبىلىم گرانتتارىن تاعايىنداۋ جانە جوعارى وقۋ ورىندارىنا قابىلداۋ 25 تامىزعا دەيىن جۇرگىزىلەدى», - دەدى قر بعم-نان.
گرانت يەگەرلەرىنىڭ ءتىزىمىن اكىمدىك جەرگىلىكتى بۇقارالىق اقپارات قۇرالدارىندا جاريالايتىن بولادى.
ەسكە سالايىق, مەملەكەت باسشىسى قاسىم-جومارت توقاەۆتىڭ تاپسىرماسىمەن كوپبالالى جانە از قامتىلعان وتباسىلاردىڭ بالالارىنا5 مىڭ ءبىلىم گرانتى ءبولىندى.
«ازىرشە 5 مىڭ, ودان كەيىن بۇل جۇيە جۇمىس ىستەيتىن بولسا, كورە جاتارمىز», - دەدى ق.توقاەۆ. پرەزيدەنت بۇل جۇمىستىڭ ماڭىزدى ەلەمەنتى الەۋمەتتىك از قامتىلعان حالىقتىڭ ىشىنەن تالانتتى بالالار مەن جاسوسپىرىمدەردى وقىتۋ جانە جوعارى وقۋ ورىندارىنا تۇسۋگە دايىنداۋ جۇيەسى بولاتىندىعىن باسا ايتتى.