#Birge #Taza Qazaqstan ەكولوگيالىق اكتسياسى وبلىستا 27 شىلدەدە باستالعان-دى. وسى ۋاقىت ارالىعىندا وڭىردەگى سۋ قويمالارى مەن دەمالىس اۋماقتارىنان توننالاعان قوقىس شىعارىلدى. اسىرەسە اكتسيانىڭ ەكىنشى اپتاسىنا ايماق تۇرعىندارى بەلسەنە قاتىستى. بۇل جولعى تازالىق شاراسىنا 30 مىڭعا جۋىق ادام جينالدى. سەمەي 13 مىڭ اداممەن كوش باستاسا, وسكەمەندە – 7350, التايدا 2312 ادام قولدارىنا كۇرەك-تىرما ۇستادى.
ەرەكشە اتاپ وتەرلىگى, اكتسيا شەڭبەرىندە وبلىس اۋماعىنداعى 70 سۋ نىسانى, اتاپ ايتساق, ءۇلبى, ەرتىس, شاعان, قاراشوقى, اياگوز, جاناما وزەندەرى, الايعىر بۇلاعى, بالىقتىكول, شالقار كولدەرىنىڭ جاعالاۋى قوقىستان تازارتىلدى. بۇل كۇنى تابيعاتقا, قورشاعان ورتاعا بەيجاي قارامايتىن شىعىسقازاقستاندىقتار 740 توننا (2960 تەكشە مەتر) قوقىس جيناپتى. «ونكولوگ دارىگەر رەتىندە قورشاعان ورتانىڭ تازالىعى تىكەلەي ادام دەنساۋلىعىنا اسەر ەتەتىنىن جاقسى تۇسىنەمىز. سودان دا بولار, تازالىق ەستافەتاسىن قۋانا قابىلداپ, ءار اپتا سايىن قاتىسۋدى جوسپارلاپ وتىرمىز. بۇل شارا جەرىمىزدى تازا قىلىپ قانا قويماي, ادامداردىڭ مادەنيەتىن, تابيعاتقا دەگەن قۇرمەتىن قالىپتاستىرادى دەپ ويلايمىن», دەيدى شىعىس قازاقستان وبلىستىق كوپسالالى ونكولوگيا جانە حيرۋرگيا ورتالىعى ديرەكتورىنىڭ ورىنباسارى ارمان مۇقاجانوۆ.
ەسكە سالا كەتەيىك, تازالىق اكتسياسى ءار اپتا سايىن قىركۇيەك ايىنىڭ سوڭىنا دەيىن جالعاسادى.
شىعىس قازاقستان وبلىسى