شىمكەنتتەگى جۇمىس ساپارىندا پارلامەنت سەناتىنىڭ دەپۋتاتى نۇرلان بەكنازاروۆ وسىلاي دەپ مالىمدەدى. «بەلسەندى ءومىر ءسۇرۋ» ورتالىعىنا بارىپ, ونداعى ەڭبەك ارداگەرلەرىمەن جۇزدەسكەن پارلامەنت سەناتىنىڭ دەپۋتاتتارى نۇرلان بەكنازاروۆ پەن ايگۇل قاپباروۆا رەسپۋبليكالىق مارتەبە العان شاھارداعى الەۋمەتتىك ماسەلەلەردىڭ جاي-كۇيىنە قانىقتى.
مەگاپوليسكە ءبىر ورتالىق ازدىق ەتەدى
«ەلباسى نۇرسۇلتان نازارباەۆتىڭ وتانداستارىمىزدىڭ ءومىر ءسۇرۋ جاسىن ۇزارتۋ مەن بۇقارالىق سپورتتى دامىتۋ بويىنشا تاپسىرماسى اياسىندا, مەملەكەت باسشىسىنىڭ ازاماتتاردى الەۋمەتتىك قورعاۋ تۋرالى تاپسىرمالارىنا سايكەس اشىلعان ورتالىقتا ارداگەرلەرگە بارلىق مۇمكىندىك جاسالعان. ورتالىقتا دەمالۋعا سەنسورلىق بولمەدەن باستاپ ترەناجەر, ۇستەل تەننيسىنە دەيىن ۇيىمداستىرىلىپتى. بىراق ميلليون تۇرعىنى بار مەگاپوليسكە ءبىر عانا ورتالىق ازدىق ەتەدى», دەدى نۇرلان قۇديار ۇلى.
حالىق قالاۋلىلارى «بەلسەندى ءومىر ءسۇرۋ» مەكەمەسىندەگى «اسىل ميراس» اۋتيزم ورتالىعىنىڭ تىنىس-تىرشىلىگىمەن تانىستى. بۇل ورتالىقتا نۇر-سۇلتان, الماتى قالاسىنان ارنايى شاقىرىلعان مامانداردىڭ باسشىلىعىمەن قالاداعى اۋتيزم دەرتىنە شالدىققان 60-قا جۋىق ازامات ەمدەلۋدە. بۇل ورتالىق بولاشاقتا تولىققاندى ىسكە قوسىلعاندا 150-دەن اسا ەمدى قاجەت ەتەتىن ازاماتتارعا جوعارى ساپالى مەديتسينالىق قىزمەت كورسەتەتىن بولادى.
قوعامدىق كەڭەسكە اكىمدىك وكىلدەرى نەگە كىرگەن؟
سەنات دەپۋتاتتارى ساپار بارىسىندا قوعامدىق كەڭەس ينستيتۋتىنىڭ جۇمىسىن جەتىلدىرۋ, مەملەكەتتىك باعدارلامالاردىڭ ورىندالۋىن ساراپتامالىق باقىلاۋ ماسەلەلەرى بويىنشا وي ءبولىستى. جيىندا كەڭەس مۇشەسى ج.وتەگەن سەنات دەپۋتاتتارىنا نە سەبەپتى قوعامدىق كەڭەستىڭ قۇرامىندا اكىمدىك وكىلدەرىنىڭ سايلانعانى, 21 مىڭ تەڭگە ااك الۋعا قۇجات تاپسىرۋ ءۇشىن جۇمىسپەن قامتۋ ورتالىعىنداعى قيىندىقتار جانە جەكەمەنشىك بالاباقشالارداعى ولقىلىقتار جونىندە ءوز سۇراقتارىن قويدى.
نۇرلان بەكنازاروۆ ءوز سوزىندە قوعامدىق كەڭەستىڭ قۇرامىن زاڭعا سايكەس ءماسليحات بەكىتەتىنىن جانە ونىڭ قۇرامىنىڭ سانىنا شەكتەۋ قويىلمايتىنىن, ياعني ەرەجەنى ساقتاي وتىرىپ, قوعامدىق كەڭەستىڭ مۇشەلىگىنە قاجەت ۇمىتكەرلەردى قوسىمشا ەنگىزۋگە بولاتىنىن جەتكىزدى. «الەۋمەتتىك كومەك الۋعا ۇمىتكەرلەر سانىنىڭ كۇرت ۇلعايۋى, قۇجاتتاردى ىرىكتەيتىن ارنايى كومپيۋتەرلىك باعدارلامانىڭ وسى كۇنگە دەيىن تولىققاندى جۇمىس ىستەمەۋى جۇمىسپەن قامتۋ ورتالىعىنىڭ ءىسىن باياۋلاتقان. جاۋاپتى باسقارما اتالعان پروبلەمانى رەتكە كەلتىرۋدە. ال كەزىندە «بالاپان» باعدارلاماسى قابىلدانعاندا ولاردىڭ سانىن كوبەيتۋ ماقساتىندا بولىنگەن عيماراتتارعا كوپ ءمان بەرىلمەگەنى راس. الايدا, سوڭعى جىلدارى بۇل ماسەلە دە جولعا قويىلىپ كەلە جاتقانىن كورىپ ءجۇرمىز», دەدى ن.بەكنازاروۆ.
باسپانا ماسەلەسى – باستى نازاردا
سەناتورلار شىمكەنت قالاسىندا سالىنىپ جاتقان كوپقاباتتى تۇرعىن ءۇي قۇرىلىسى بارىسىمەن تانىستى. «Shymkent city» قالاشىعىنداعى «نۇرلى جەر» باعدارلاماسى اياسىندا از قامتىلعان ازاماتتار مەن جاستارعا ارنالعان كوپقاباتتى ۇيلەردىڭ ساپاسىن كورىپ, مەرزىمدى اياقتالۋى بويىنشا مالىمەت الدى.
«بيىل شىمكەنتتە 16 ارەندالىق, 11 نەسيەلىك پاتەر تاپسىرىلادى. بۇل ۇيلەر جاستارعا, كوپ بالالى وتباسىلارعا, جالعىزباستى انالارعا, مۇمكىندىگى شەكتەۋلى ازاماتتارعا بەرىلەدى. قازىرگى تاڭدا تۇران شاعىن اۋدانىندا 68 تۇرعىن ءۇي 5556 پاتەردىڭ جوبالىق-سمەتالىق قۇجاتتامالارىن ازىرلەپ جاتىرمىز. جۋىردا ول ۇيلەردىڭ دە قۇرىلىسى باستالادى. ودان بولەك جەكە كاسىپكەرلەر تۇرعىن ءۇي سالامىن دەپ نيەت بىلدىرسە, ونىڭ ينفراقۇرىلىمىن مەملەكەت جۇرگىزىپ بەرۋگە دايىن. بۇگىنگى تاڭدا ارەندالىق تۇرعىن ۇيگە 37141 ادام كەزەكتە تۇر», دەدى شىمكەنت قالاسى قۇرىلىس باسقارماسى باسشىسىنىڭ مىندەتىن اتقارۋشى ع.ۋتەنباەۆ.
الايدا, جاڭادان سالىنعان ۇيلەردە ءالى دە ينفراقۇرىلىم ماسەلەسى تولىق شەشىمىن تاپپاعان. اسىرەسە كوگىلدىر وتىنمەن قامتاماسىز ەتۋ جاعى اقساپ تۇر.
شىمكەنت