«مەكتەپكە جول» رەسپۋبليكالىق اكتسياسى جالعاسۋدا

 «مەكتەپكە جول» ءداستۇرلى رەسپۋبليكالىق اكتسياسى اعىمداعى جىلى وبلىس بويىنشا 1 شىلدەدە باستالدى. بيىلعى جىلى "جۇرەكتەن-جۇرەككە" ۇرانىمەن وتكىزىلۋدە. وبلىس بويىنشا 11 مىڭنان استام وقۋشىنى جاڭا وقۋ جىلىنا دايىنداۋ كوزدەلىپ وتىر. وسى ماقساتقا «وقۋمەن جاپپاي قامتۋ» قورىنان 25 ميلليون تەڭگە بولىنگەن. مۇنداي شارانىڭ شاراپاتىن از قامتىلعان جانە كوپ بالالى وتباسىلاردان شىققان وقۋشىلار, سونداي-اق جەتىم بالالار مەن اتا-اناسىنىڭ قامقورلىعىنسىز قالعان بالالار كورەتىن بولادى.

– وبلىس ورتالىعىنداعى وسىنداي وتباسىلاردىڭ بالالارىنا  بۇگىنگى كۇنى  11 ميلليون تەڭگە جۇمسالدى. 2 ميلليون تەڭگە دەمەۋشىلەردىڭ قاراجاتى. ال قالعان  9 ميلليون تەڭگە «وقۋمەن جاپپاي قامتۋ» قورىنان الىنعان. بارلىعى التى ءجۇز وقۋشىعا, ونىڭ ىشىندە 200-ءى ءبىرىنشى سىنىپ وقۋشىلارىنا قاجەتتى كەڭسە زاتتارى بار سومكەلەر تابىستالدى,–دەيدى كوكشەتاۋ قالالىق ءبىلىم ءبولىمىنىڭ باس مامانى اينۇر ءجۇسىپوۆا.

گۇلميرا نۇرسەيىتوۆا ءتورت بالانىڭ اناسى. دەنساۋلىعىنا بايلانىستى بۇگىنگى كۇنى جۇمىس ىستەي المايدى. ال ءۇش بىردەي بالانى جاڭا وقۋ جىلىنا دايىنداۋعا قاۋقارسىز. سوندىقتان, اتالمىش اكتسيا اياسىندا كوپبالالى اناعا دەر كەزىندە كومەك كورسەتىلىپ وتىر.  

– قولداۋ كورسەتىپ جاتقاندارىڭىز ءۇشىن ۇلكەن العىس بىلدىرەمىن. مەن 4 بالانىڭ اناسىمىن. بالالارىمدى جالعىز ءوسىرىپ, تاربيەلەۋدەمىن. بالالارىم مەكتەپتە تەگىن تاماقتانادى. دەمەۋشىلەر ارقاشان كەڭسە زاتتارىمەن, كيىمدەرمەن كومەكتەسىپ تۇرادى. سونداي-اق جازعى ساۋىقتىرۋ لاگەرلەرىنە دەمالۋعا بارىپ تۇرادى,–دەيدى كوپبالالى انا گۇلميرا نۇرسەيىتوۆا.

 بيىلعى اكتسيانىڭ ەرەكشەلىگى ۇيىمداستىرۋشىلار قۇرامىنا "اتامەكەن" ۇلتتىق كاسىپكەرلەر پالاتاسى دا ەنىپ وتىر. كومەك كورسەتۋگە ىنتا بىلدىرگەن كاسىپكەرلەر سانى دا ارتىپ كەلەدى. اتىمتاي جومارتتار بالعىنداردىڭ الاڭسىز ءبىلىم الۋىنا بارىنشا جاعداي جاساۋعا تالپىنۋدا. كوڭىل مارقايادى.