جاقىندا شىعىس قازاقستان وبلىستىق ءبىلىم باسقارماسىنىڭ جوسپارىنا سايكەس «رۋحاني جاڭعىرۋ» باعدارلاماسىنىڭ «تۋعان جەر» جوباسى جۇزەگە اسىرۋ اياسىندا «مەنىڭ وتانىم – قازاقستان» تۋريستىك ەكسپەديتسيالىق جاساقتاردىڭ وبلىستىق سلەتى ءوتتى. ونى شىعىس قازاقستان وبلىسى ءبىلىم باسقارماسىنىڭ «دارىندىلىق پەن قوسىمشا ءبىلىم بەرۋدى دامىتۋدىڭ شىعىس قازاقستان عىلىمي-ادىستەمەلىك «دارىن» ورتالىعى وتكىزدى. تابيعاتى تامىلجىعان ريددەردەگى وليمپيادالىق رەزەرۆتىڭ رەسپۋبليكالىق مامانداندىرىلعان مەكتەپ-ينتەرنات-كوللەدجى اۋلاسىن تاڭداپ الۋداعى ماقسات – بۇل جەردە مەكتەپ وقۋشىلارىنىڭ ەكسكۋرسيالىق جورىعىنا, وقۋ-تاجىريبەلىك ساباقتار وتكىزۋىنە, ءارتۇرلى بايقاۋلارعا قولايلى جاعداي جاسالعان.
تۋريستىك ەكسپەديتسيالىق جاساقتاردىڭ سلەتى ءۇشىنشى رەت وتكىزىلىپ وتىر. الايدا, بۇل جولى سلەتكە 9 اۋدان مەن قالادان اۋداندىق جانە قالالىق كەزەڭدەردىڭ جەڭىمپازدارى بولىپ تابىلعان 210 وقۋشى قاتىستى. ءىس-شارانىڭ ماقساتى – بالالار مەن جاستاردى پاتريوتتىق سەزىمگە تاربيەلەۋ, سالاماتتى ءومىر سالتىن ناسيحاتتاۋ, وتريادتاردىڭ تۋريستىك قىزمەتىن كۇشەيتۋ. وبلىستىق ءبىلىم باسقارماسىنىڭ «دارىندىلىق پەن قوسىمشا ءبىلىم بەرۋدى دامىتۋدىڭ شىعىس قازاقستان عىلىمي-ادىستەمەلىك «دارىن» ورتالىعى ديرەكتورىنىڭ ورىنباسارى ەلەنا شيمينانىڭ ايتۋىنشا, ءاربىر قاتىسۋشى ەكولوگيالىق-بيولوگيالىق جانە عىلىمي-تەحنيكالىق باعىتتاعى ءوز جۇمىستارىن تانىستىرۋعا, تۋريستىك شەبەرلىكتى, ەكولوگيالىق مادەنيەتتى دامىتۋ, ءوڭىردىڭ تاريحى مەن گەوگرافياسى, وقۋشىلاردىڭ تۋعان ەلگە دەگەن كوزقاراسىن قالىپتاستىرۋ جايلى ويلارىن تولىق جەتكىزە الۋى ءتيىس.
سلەتكە قاتىسۋشىلار باتىس التاي مەملەكەتتىك تابيعي قورىعىنا جورىققا شىعىپ, «كوماندانىڭ ۆيزيتتىك كارتوچكاسى» بايقاۋىندا كۇش سىناستى. بۇل بايقاۋدا شەمونايحا اۋدانىنىڭ «جاستار» كومانداسى ءبىرىنشى ورىندى يەلەندى. كاتونقاراعاي اۋدانىنان كەلگەن «ارايلى شىعىس» جانە گلۋبوكوە اۋدانىنان كەلگەن «مۇراگەر» كوماندالارى ەكىنشى ورىنعا, ال بورودۋليحا, التاي جانە كۋرچاتوۆتان كەلگەن وقۋشىلار جۇلدەلى ءۇشىنشى ورىندى قاناعات تۇتتى. «تۋعان ولكە سوقپاقتارى» اتالىمى بويىنشا ىزدەۋ-زەرتتەۋ جۇمىستارى جوبالارىنىڭ بايقاۋى, «ەكولوگيالىق ەسەپ» پرەزەنتاتسياسىن قورعاۋ, «ەكولوگيالىق سوقپاق» بايقاۋى, «ارالاس تۋريزم» كروسس جورىعىندا تۋعان ولكەنىڭ تابيعاتىن قورعاۋدى ماقسات تۇتقان وقۋشىلار شەبەرلىكتەرىن كورسەتە ءبىلدى. ريددەر, كۋرچاتوۆ قالالارى مەن التاي, زايسان, بورودۋليحا اۋداندارىنان كەلگەن بالالار دا تۋريستىك ەكسپەديتسيا تالاپتارىنا ساي ءبىلىم مەن بىلىكتىلىك تانىتتى.
– شىعىستىڭ تابيعاتى عاجاپ. بۇل وڭىردە 2 مىڭنان استام وزەن-كول, بىرنەشە مەملەكەتتىك قورىق ورنالاسقان. اتاقتى بەرەل, ەلەكە سازى قورىمدارى, «قىزىل كىتاپقا» ەنگەن قۇستاردىڭ سانى مىڭعا جاقىن. وڭىردە تۋريستىك كلاستەر دامىپ كەلەدى. بيىلدىڭ وزىندە كەندى التايعا ەكى ءجۇز مىڭنان استام تۋريس كەلگەن. كاتونقاراعاي اۋدانىنداعى ورەل مەكتەبىندە ون شاقتى جىلدان بەرى گيد-رەيندجەرلەر ازىرلەيتىن سىنىپ جۇمىس ىستەپ تۇر. ولار شەتەلدەن كەلگەن تۋريستەرگە قىزمەت كورسەتەدى. ال مىنا ءىس-شارانىڭ ماڭىزى زور. ول «رۋحاني جاڭعىرۋ» باعدارلاماسى بويىنشا جۇزەگە اسۋدا. وقۋشىلار ءوز اۋدانى, مەكەنى جايلى ديپلوم جۇمىسىن قورعادى, سپورتتىق باعدارلاما, كومپاسپەن جۇمىس ىستەۋدى مەڭگەرگەن, تاۋعا شىققان كەزدە ارىپتەستەرىنە قالاي كومەكتەسۋ جايلى دا ءبىلۋى شارت, – دەيدى وقۋشىلاردىڭ ءبىلىمى مەن بىلىكتىلىگىنە ساراپتاما جاساعان داۋلەت سەرىكباەۆ اتىنداعى شىعىس قازاقستان مەملەكەتتىك تەحنيكالىق ۋنيۆەرسيتەتىنىڭ دوتسەنتى, تاريح عىلىمدارىنىڭ كانديداتى حانشا سوۆەتحانقىزى.
سلەتتىڭ ءۇشىنشى كۇنى جەڭىمپاز كوماندالار مەن ۇزدىكتەر ءى, ءىى, ءىىى دارەجەلى ديپلومدارمەن, كۋبوكتارمەن جانە مەدالدارمەن, باعالى سىيلىقتارمەن ماراپاتتالدى. جەڭىمپاز اتانعان كوماندا اقمولا وبلىسى, بۋراباي اۋدانى, قوتىركول اۋىلىنداعى, «زۆەزدنىي» لاگەرىندە وتەتىن رەسپۋبليكالىق بايقاۋعا قاتىسادى. كوماندالىق ەسەپتە بورودۋليحا (1-ورىن), كاتونقاراعاي (2-ورىن), التاي (3-ورىن) اۋداندارىنىڭ كوماندالارى جۇلدەلى ورىنداردى ءبولىستى.
وڭداسىن ەلۋباي,
جۋرناليست
شىعىس قازاقستان وبلىسى,
ريددەر قالاسى