دوستىق ۇيىندە سوت جانە قۇقىق قورعاۋ ورگاندارى, Nur Otan پارتياسى, كاسىپوداق ۇيىمدارى, ەتنومادەني بىرلەستىكتەر ۇيىمدارىنىڭ وكىلدەرى, عىلىمي-ساراپتامالىق توپ مۇشەلەرى, نۇر-سۇلتان قالاسىنىڭ قازاقستان حالقى اسسامبلەياسى قوعامدىق كەلىسىم جانە انالار كەڭەسى, مەدياتسيا ماسەلەلەرىن زەرتتەۋشى عالىمدار مەن وڭىرلەردەن شاقىرتىلعان كاسىبي مەدياتورلار, مەكتەپ مەدياتورلارى, جاستار ۇيىمدارى وكىلدەرى مەن قوعام بەلسەندىلەرىنىڭ قاتىسۋىمەن «ازاماتتىق قوعامنىڭ جاڭعىرۋىنداعى مەدياتسيانىڭ ءرولى» تاقىرىبىندا رەسپۋبليكالىق عىلىمي-پراكتيكالىق كونفەرەنتسيا ءوتتى.
جيىنعا قاتىسۋشىلار مەدياتسيا ينستيتۋتىن قۇرۋداعى وزەكتى ماسەلەلەردى تالقىلاپ, ءوزارا پىكىر الماستى. سونىمەن قاتار وتىرىستا قازاقستان حالقى اسسامبلەياسىنىڭ قوعامدىق مەدياتورلاردى دايىندايتىنى بەلگىلى بولدى. بىتىمگەرلەردىڭ قاتارىنا ەل اراسىنداعى بەدەلدى, تانىمال تۇلعالار كىرەدى. مەدياتورلار ارازداسقان تاراپتاردى مامىلەگە كەلتىرىپ, قوعامدىق داۋ-دامايلاردى شەشۋگە اتسالىسىپ, تەگىن كومەك كورسەتپەك. ول ءۇشىن قوعامدىق مەدياتورلار ارنايى سەمينارلارعا قاتىسىپ, تاجىريبەلى مامانداردان ءدارىس الادى.
قازاقستان حالقى اسسامبلەياسى توراعاسىنىڭ ورىنباسارى لەونيد پروكوپەنكونىڭ ايتۋىنشا, ادامدار اراسىنداعى ءوزارا سەنىم دەڭگەيىن ارتتىرۋ ماڭىزدى. «ويتكەنى مەدياتسيانىڭ دامۋى ازاماتتاردىڭ قۇقىق قورعاۋ ورگاندارىنا سەنىمىمەن تىكەلەي بايلانىستى. پرەزيدەنت اكىمشىلىگىندەگى ازاماتتاردى قابىلداۋ جۇمىستارىنا قاتىسقانىمدا شاعىمدانۋشىلاردىڭ 90 پايىزى سوت ۇكىمىنە نارازى ەكەنىن بايقادىم. ولاردىڭ كوبى – مەملەكەتتىك مەكەمەلەرمەن سوتتاسۋشىلار. بۇل قۇقىق قورعاۋ جۇيەسىندە ءاربىر سۋبەكتىنىڭ ناقتى ورنىن ايقىندايتىن قوسىمشا تەتىكتەردىڭ قاجەت ەكەنىن كورسەتەدى», دەيدى ل.پروكوپەنكو.
كاسىبي مەدياتورلار ول ءۇشىن مەدياتسيانى دامىتۋدىڭ وتاندىق كونتسەپتسياسىن جاساۋدى ۇسىندى. سونداي-اق ماماندار مەكتەپتەر مەن مەديتسينا مەكەمەلەرىندە مەدياتسيا كابينەتتەرىنىڭ اشىلعانىن مالىمدەدى. ولار مۇنداي شارالار مەدياتسيانىڭ قوعامداعى ءرولىن ايقىنداپ, قولدانۋ اياسىن كەڭەيتۋگە باعىتتالعانىن جەتكىزدى.
قحا توراعاسىنىڭ ورىنباسارى, كاسىبي مەدياتور شەرزود پۋلاتوۆ «اتا-انالار مۇعالىمدەرمەن, بالالار ءوز اراسىندا, مۇعالىمدەر دە ءبىر-بىرىمەن تۇسىنىسپەي جاتادى. وسىنداي جاعدايدا ءبىزدىڭ مەدياتورلارىمىز ولارعا كومەك بەرەدى. ەگەر مەدياتسيا سالاسى مەكتەپتەن باستالسا, كەلەشەكتە بالالارىمىز سوتقا بارماي, ماسەلەلەردى بىتىمگە كەلۋ ارقىلى شەشەتىن بولادى», دەيدى.
بۇگىندە ەلىمىزدە مەدياتورلاردى دايىندايتىن 120 قوعامدىق ورتالىق تىركەلگەن. دەگەنمەن كاسىبي مامانداردى دايارلاۋدىڭ ساپاسى باقىلانبايدى. سونىمەن بىرگە مەدياتسيا ينستيتۋتىن قالىپتاستىرۋعا جوعارعى سوتتىڭ «تاتۋلاسۋ: سوتقا دەيىن, سوتتا», «وتباسى سوتى», «سوت مەدياتسياسى» جوبالارى ۇلكەن ۇلەس قوسىپ ءجۇر.
نۇر-سۇلتان قالالىق سوتىنىڭ سۋدياسى گۇلجانات راحمەتوۆا ەلوردا سوتىنىڭ وكىلدەرى سوتقا دەيىن تاتۋلاستىرۋعا كوڭىل بولەتىنىن ايتتى. «سوتقا دەيىن تاتۋلاسۋ كەڭەسى سوت پروتسەسىنىڭ قاي كەزەڭىندە دە ايتىلىپ, تاراپتاردى مامىلەگە كەلۋگە شاقىرامىز. بۇنىڭ ناتيجەسى دە جامان ەمەس. 2019 جىلدىڭ ءبىرىنشى جارتىجىلدىعىنىڭ قورىتىندىسى بويىنشا, 3000-نان كوپ ازاماتتىق ءىس قارالدى. ونىڭ 2500-ىندە مەدياتسيا قىزمەتتەرى ىسكە تارتىلدى. بىتىمگە كەلۋ ناتيجەسىندە بيىل 500 ملن تەڭگە كولەمىندە قاراجات مەملەكەتكە قايتارىلدى», دەيدى مامان.
گۇلجانات راحمەتوۆانىڭ ايتۋىنا قاراعاندا, ەكى تاراپتى مامىلەگە كەلتىرۋ سوت وكىلىنە ۇكىم شىعارۋدان دا قيىن. «ازاماتتاردى سوتقا جەتكىزبەي تاتۋلاستىرۋ ۇلكەن تاجىريبە مەن بىلىكتىلىكتى قاجەت ەتەدى. ماماننىڭ الەۋمەتتانۋ مەن ادام پسيحولوگياسىنان دا حابارى بولۋى قاجەت. بۇگىندە قالالىق سوت حالىققا ءتۇسىندىرۋ جۇمىستارىن جۇرگىزىپ تۇرادى. حالىقتى اقپاراتپەن قامتۋ جولعا قويىلعان», دەيدى ول.
ال قازاقستان حالقى اسسامبلەياسى توراعاسىنىڭ ورىنباسارى, كاسىبي مەدياتور يۋسۋپ كەليگوۆ بيۋدجەت قاراجاتىنان مەدياتورلىق كومەككە اقى تولەۋ ماسەلەسىن كوتەردى. ونىڭ ايتۋىنشا, قاراپايىم ازاماتتارعا مەدياتور قولجەتىمدى بولۋى ءۇشىن بيۋدجەتتەن قارجىلاندىرۋ جۇرگىزىلۋى ءتيىس. ء«بىزدىڭ پىكىرىمىزشە, بۇل ماسەلەنى شەشۋ مەدياتسيا ينستيتۋتىن دامىتۋعا كۇش بەرەدى. اقى تولەۋ – ەڭ نەگىزگى ماسەلە», دەدى كاسىبي مەدياتور.
كونفەرەنتسيا قاتىسۋشىلارى قوعامدىق كەلىسىم مەن جالپىەتنوستىق بىرلىكتى قامتاماسىز ەتۋدە مەدياتسيا ينستيتۋتىن نىعايتۋ جانە ودان ءارى دامىتۋ بويىنشا شارالار جۇرگىزۋ ماڭىزدى ەكەنىنە توقتالدى. وعان قوسا, جيىندا بىتىمگەرلىك ماسەلەسىندە ماڭىزدى ورىن الاتىن قوعامدىق مەدياتوردىڭ قىزمەت ەتيكاسى ەرەجەلەرىن ازىرلەۋ, مەدياتيۆتىك كەلىسىمدەردىڭ ساپاسىن ارتتىرۋ ءۇشىن «قوعامدىق مەدياتور» ۇعىمىنىڭ كريتەريلەرىن انىقتاۋ, مەدياتورلاردىڭ بىلىمىنە جانە بىلىكتىلىگىنە قويىلاتىن ناقتى تالاپتاردى بەلگىلەۋ سۇراقتارى تالقىلاندى.