12 تامىزدان باستاپ تىركەۋدە تۇرعان 55 مىڭنان استام ادام وتەماقىعا قول جەتكىزەدى. بۇگىن ەكى اۋىلدىق ەلدى مەكەن مەن ارىس قالاسىنداعى 17 سەكتوردا بانك كارتالارى تاراتىلدى. بۇل تۋرالى تۇركىستان وبلىسى اكىمىنىڭ ءباسپاسوز قىزمەتى حابارلادى.
قىزىلوردا, جامبىل جانە شىمكەنتتەن «حالىق بانكىنىڭ» 120 قىزمەتكەرى ارىسقا ارنايى كەلىپ جۇمىس جۇرگىزۋدە.
تۇركىستان وبلىسى اكىمىنىڭ ورىنباسارى جولدىمۇرات امانباەۆ اقشانى الۋدىڭ ءتارتىبىن ءتۇسىندىردى.
«وسى ۋاقىتتا 33 مىڭ بانك كارتاسى جاسالدى. ەلىمىز ەگەمەندىگىن العانان بەرى ءدال بۇلاي, ءبىر ايدىڭ ىشىندە وسىنشاما قۇجات جينالىپ, 33 مىڭ كارتوچكانى دايىنداۋ دەگەن بولعان ەمەس. قازىرگى تاڭدا سول دايىن بولعاندارى تاراتىلىپ جاتىر. بىراق ازىرگە اقشا سالىنعان جوق. ياعني, 100 مىڭ تەڭگەنى 12 تامىزدان باستاپ الا الادى. ال قازىرگى نەگىزگى جۇمىس - كارتوچكانى تاراتۋ. دەمەك, بارلىعى تۇگەل قول جەتكىزگەندە اقشانى تۇسىرەمىز. ەڭ كوپ 9 سەكتوردا 3771 قۇجات جينالعان. قالانى كوشە-كوشەگە بولدىك», دەدى وبلىس اكىمىنىڭ ورىنباسارى ج.امانباەۆ.
ەلدى سابىرعا شاقىرعان جاۋاپتى باسشىلار, تۇرعىنداردىڭ تولعاندىرعان سۇراقتارىنا جاۋاپ بەرەتىن, ارنايى كوميسسيا جۇمىس جاساپ جاتقانىن جەتكىزدى. ال تىزىمگە كىرمەي قالعان وقۋشىلار, مەكتەپتەر ارقىلى انىقتالىپ جاتقانى بەلگىلى بولدى.
«وتەماقىنى رەسپۋبليكا كولەمىندە «حالىق بانكىنىڭ» كەز كەلگەن بانكوماتىنان الۋعا بولادى. قارجىنىڭ تۇسكەن نەمەسە تۇسپەگەنىن انىقتاۋ ءۇشىن كارتانى بانكوماتتا 3 رەتتەن ارتىق قولدانۋعا بولمايدى. سەبەبى 3 رەتتەن ارتىق قولدانعان جاعدايدا بانكتىك كوميسسيا تولەمى ۇستالادى», دەلىنگەن حابارلامادى.
سونىمەن قاتار سوت شەشىمدەرىمەن قارىزدارى بولعان ازاماتتارعا تولەم كارتالارى اشىلمايدى. مۇنداي جاعدايدا ازامات نوتاريالدى تۇردە وتەماقىنى سەنىم بىلدىرگەن وكىلى ارقىلى الۋىنا بولادى. ال ۇيلەرىندە بولماعان ازاماتتار كارتانى 2019 جىلدىڭ 15 تامىزىنان باستاپ ارىس قالالىق «حالىق بانك» فيليالدارىنان الۋىنا بولادى. تۇسكەن قارجىدان بانكتىڭ كوميسسيالىق تولەمدەرى ۇستالمايدى. جالپى بۇگىنگى تاڭدا ارىس قالاسىندا حالىق بانكىنىڭ 12 بانكوماتى قويىلعان. سونىمەن قاتار قوسىمشا تاعى 7-8 بانكومات ورناتىلماق.