قاراعاندى وبلىسىندا دالا ءورتى دامىل بەرمەي تۇر

نەگىزى, دالاداعى ءورتتى ءسوندىرۋ  جەرگىلىكتى اتقارۋشى بيلىكتىڭ موينىنداعى شارۋا بولسا دا, وبلىستىق توتەنشە جاعدايلار دەپارتامەنتىنىڭ بولىمشەلەرى كومەكتەن قاشقان ەمەس. مىسالى, وسىنىڭ الدىندا عانا بۇقار جىراۋ اۋدانىنىڭ نوۆوسترويكا اۋىلىنان شىعىسقا قاراي 10 شاقىرىم جەردە 45 گەكتار اۋماقتىڭ قۇرعاق ءشوبى وتقا ورانعاندا ونى سوندىرۋگە وبلىستىق تجد بولىمشەلەرىنىڭ 25 قىزمەتكەرى مەن 5 تەحنيكا بىرلىگى جۇمىلدىرىلعان بولاتىن.

ايتا كەتۋ كەرەك, ءورت كوبىنەسە تەحنيكا بارا المايتىن قيىن جەرلەردە شىعادى. ۇساق شوقىلار مەن بۇتالار ءورتتى سوندىرۋگە كەدەرگى كەلتىرسە, جەل مەن قۇرعاق ءشوپ ءتىلسىز جاۋدىڭ ورشۋىنە تىكەلەي سەبەپكەر بولىپ جاتادى. وتپەن الىسقان ءورت سوندىرۋشىلەر كەي جاعدايلاردا سۋدى بىرنەشە شاقىرىم جەردەن تاسۋعا ءماجبۇر بولادى. نەگە دەسەڭىز, قازىرگىدەي قۇرعاقشىلىق كەزدە ماڭايداعى وزەندەر مەن بۇلاقتاردىڭ كوبىنىڭ سۋى تارتىلىپ قالعان.

جىل باسىنان بەرى وبلىستا 241 دالا ءورتى بولىپ, ونىڭ 187-ءسى تجد بولىمشەلەرىنىڭ كومەگىمەن ءسوندىرىلدى. ءورت شالعان اۋماقتىڭ كولەمى 7 مىڭ گەكتاردان اسادى.

جاسىراتىنى جوق, دالاداعى ءورتتىڭ باسىم بولىگى ادامداردىڭ جاۋاپسىزدىعىنان, نەمقۇرايدىلىعىنان بولىپ جاتادى. شالا سوندىرىلگەن وت, شىلىمنىڭ تۇقىلى,  بىقسىعان قوقىس... وسىنىڭ ءبارى كۇن ىستىققا ءورتتىڭ  شىعۋىنا سەبەپشى بولادى. ءتىپتى, لاقتىرا سالعان شىنى سىنىعىنىڭ ءوزى كۇن كوزى تۇسكەندە قۇرعاق ءشوپتىڭ تۇتانۋىنا اكەپ سوقتىرادى. سول سەبەپتى, تابيعات اياسىندا جۇرگەندە وت جاعۋ ماسەلەسىنە وتە جاۋاپكەرشىلىكپەن قاراعان ءجون.

قاراعاندى وبلىسى