ارداگەر حاميت ەمبەرگەنوۆ – قىزىلوردا قالاسىنىڭ بايىرعى تۇرعىنى. ۇزاق جىل سىرداريا اۋداندىق پارتيا كوميتەتىندە ۇگىت جانە ناسيحات ءبولىمىن باسقاردى. زەينەتكە شىققان سوڭ ۇلى وتان سوعىسىندا قازا تاپقان جاۋىنگەرلەر جايىندا بەس تومدىق «بوزداقتار» كىتابىن جيناستىرىپ, باسپادان شىعاردى.
ەڭبەگىنە لايىق تالاي قۇرمەتكە يە بولدى. ومىراۋى تولعان وردەن, مەدال. سىرداريا اۋدانىنىڭ قۇرمەتتى ازاماتى.
بيىل توقسانعا شىققان اقساقال ءالى قۋاتتى, بويى ءتىپ-تىك. كيىمدى مەزگىلىنە قاراي كيەدى, ۇستىنە شاڭ جۋىتپايدى. شالبار-كويلەك, گالستۋگىن جۇقا داكەنى ىلعالداپ, ءوزى وتەكتەيدى.
ءبىز بارعاندا ارداگەر اعا كەڭ زالدىڭ تورىندە جازۋ ستولىنداعى ورىندىقتا وتىر ەكەن. الاڭداي بەردى:
– پوشتا نەگە كەشىگىپ جاتىر؟ تاڭەرتەڭگى وننان قالدىرماي گازەتتەرىمدى اكەلەتىن ەدى. پوشتاداعى قىزدارعا تەلەفون سوعايىنشى دەپ ورنىنان قوزعالدى.
– قىزدارىم-اۋ, گازەت كەشىگىپ جاتىر عوي.
– حاميت اعا, الگى حات تاسۋشى قىزدار ءسىزدىڭ ۇيگە اتتانىپ كەتتى. قازىر بارىپ قالار.
– ءا, جارايدى. سىرتقا شىعايىنشى, دەپ حامەكەڭ داربازا سىرتىنا شىقتى. اۋدەم جەردەن حات تاسۋشى قىزدار كورىندى. سالدەن سوڭ ءبىر بۋما گازەتتى ارداگەر قۇشاعىنا قىستى. ءجۇزى جادىراپ قويا بەردى. دەرەۋ بولمەسىنە كىردى. الدىمەن ءوزىنىڭ سۇيىكتى باۋىر باسقان «ەگەمەن قازاقستاننىڭ» ءار بەتىنە زەر سالا كوز جۇگىرتتى. تەلەفونعا قول كوتەرىپ, تۇس-تۇستاعى سىيلاس ازاماتتارعا قوڭىراۋ شالدى.
– بۇگىنگى «ەگەمەندى» الدىڭدار ما؟ مىرزاتايدىڭ روللان جايىندا جازعانىن وقىدىڭدار ما؟ الگى بايمۇرات باتىر جايىندا جازىلعان دۇنيە جاقسى ەكەن. سىر سۇلەيى تۇرماعامبەت ىزتىلەۋوۆتىڭ جاڭا قولجازباسى تابىلىپتى, وقىڭدار.
ارداگەر وسىلايشا كۇن سايىن سىيلاس ازاماتتاردى مازالايدى. جيىن-جينالىستاردا «ەگەمەندەگى» انا دۇنيە, مىنا دۇنيەنى وقىدىڭدار ما دەپ قامشىلايدى, باسىلىمدارداعى وتكىر سوزدەردى قويىن داپتەرىنە جازىپ, ونى دا تىلگە تيەك ەتۋدەن جالىقپايدى.
ءبىر كەزدەگى وسى «ەگەمەندە» ەڭبەك ەتكەن ءازىلحان نۇرشايىقوۆ, جەكەن جۇماحانوۆ, مۇقان يمانجانوۆ, نۇري مۇفتاقتاردان ءسوز قوزعايدى. ءباسپاسوز دارابوزدارى شەرحان, ساپار, ودان سوڭ ۇزاق باعاەۆ جايىندا, ۇزاقتىڭ جازۋشى زەينوللا شۇكىروۆ جايىندا جازعان «قۇرىش قازاق» اتتى وچەركىن مايىن تامىزا ايتقاندا سۋسىنىڭ قانادى. شەرحان, كامالداردىڭ جازىسقان حاتتارىن, شەراعانىڭ ء«بىر كەم دۇنيەسىن» جالعاستىرعاندا, تاڭىرقايسىڭ.
سىردىڭ سىرباز اقساقالى حاميت ەمبەرگەنوۆ قازىر 33 نەمەرە, 70 شوبەرە, 2 شوپشەكتىڭ قۇشاعىندا. وسىرگەن ون ۇل-قىزىنىڭ ءبارى دە جوعارى ءبىلىمدى. سولاردىڭ ىستىق قۇشاعىنا بولەنىپ وتىرعانىن جىر ەتىپ ايتۋدان جالىقپايدى.
– «ەگەمەننىڭ» 100 جىلدىعى – ۇلكەن قۋانىش. بۇل مەنىڭ ەلۋ جىل بويى ۇزبەي جازىلعان, ءار سانى ەسىمە ۇمىتىلماس اسەر قالدىرعان گازەتىم. باسىلىمداعى قالامى ۇشقىر جۋرناليستەردىڭ قالام سىلتەر قادامىنا قۋانامىن. ارداگەرلەر قاۋىمىن الداعى جىلعا جازىلۋعا بەلسەندىلىك تانىتۋعا شاقىرامىن. ءار شاڭىراقتا باسىلىمدى سۇيسىنە, اسىعا وقيتىندار كوبەيسە, – دەيدى ارداگەر حاميت ەمبەرگەنوۆ.
قايىربەك مىرزاحمەت ۇلى