ماسكەۋ وبلىسىنىڭ «الابينو» پوليگونىندا V حالىقارالىق ارميا ويىندارى – 2019 سايىسىنىڭ رەسمي اشىلۋ ءراسىمى ءوتتى. بيىل ويىندار تامىزدىڭ 3-ءى مەن 17-ءسى ارالىعىندا 10 مەملەكەتتىڭ 21 اسكەري پوليگونىندا, كاسپي, بالتىق تەڭىزدەرى مەن پارسى شىعاناعىنىڭ سۋ ايدىندارىندا وتەدى.
قازاقستاننىڭ قورعانىس مينيسترلىگى ءباسپاسوز قىزمەتىنىڭ حابارلاۋىنشا, بۇل ويىنداردى رەسەي, قازاقستان, ازەربايجان, ارمەنيا, بەلارۋس, يران, قىتاي, سونداي-اق العاش رەت وزبەكستان, موڭعوليا جانە ءۇندىستان ءوز جەرلەرىندە وتكىزەدى. جىلدان-جىلعا وسى شاراعا دەگەن قىزىعۋشىلىق ارتا تۇسۋدە. سونىمەن بىرگە قاتىسۋشى ەلدەردىڭ سانى دا ۇلعايۋدا. وسى جىلى ۇزدىك دەگەن اتاققا, جۇلدەلى ورىندار مەن ماراپاتقا ازيا, ەۋروپا, افريكا, ورتالىق جانە لاتىن امەريكاسىنىڭ 39 ەلىنەن 223 كوماندا باق سىناساتىن بولادى.
ارميا ويىندارىنىڭ باعدارلاماسىنا دالا, اۋە جانە تەڭىز ماشىعى بويىنشا 32 بايقاۋ كىرەدى.
– قازاقستان كومانداسى ونىڭ 16 بايقاۋىنا قاتىسادى. وتكەن ويىنداردا قازاقستان قارۋلى كۇشتەرىنىڭ قۇراماسى كوشباسشىلار ۇشتىگىندە بولدى. بيىلعى جىلى اسكەري قىزمەتشىلەرىمىز جوعارى ناتيجەلەرگە قول جەتكىزۋگە نيەتتەنىپ وتىر. سالتاناتتى اشىلۋ راسىمىنە قازاقستان, رەسەي, ازەربايجان, بەلارۋس قورعانىس مينيسترلەرى, سونداي-اق قاتىسۋشى ەلدەردىڭ رەسمي دەلەگاتسيالارى قاتىستى, – دەپ اتاپ ءوتتى قورعانىس مينيسترلىگىنەن.
وتكەن جىلداردىڭ تاجىريبەسىنە سۇيەنسەك, اسكەري سايىستىڭ كورەرمەندەرى مەن اۋەسقويلارى اراسىندا «تانك بياتلونىن» كوشباسشى دەپ سەنىممەن ايتۋعا بولادى.
اسكەري ۇشقىشتار مەن بايلانىسشىلار, دارىگەرلەر مەن كينولوگتار, مەرگەندەر مەن ارتيللەرياشىلار, اسپازشىلار مەن ينجەنەرلەر, تەڭىزشىلەر مەن دەسانتشىلار وزدەرىنىڭ شەبەرلىكتەرىن كورسەتەتىن بولادى.
ارميا ويىندارىنىڭ اياسىندا موڭعوليا اۋماعىندا العاش رەت «ات مارافونى» بايقاۋى وتەدى. قاتىسۋشىلار اراسىندا ءبىزدىڭ كوماندامىز دا بار.
قازاقستاندا حالىقارالىق ارميا ويىندارى – 2019 7 تامىزدا باستاۋ الاتىنىن ايتا كەتكەن ءجون. ەل اۋماعىنداعى پوليگونداردا «ارتيللەريالىق وق اتۋ شەبەرلەرى», «سۇڭقار اڭشىلىعى» جانە «سەنىمدى قابىلداۋ» اتتى ءۇش بايقاۋ وتەدى.