«مەكتەپكە جول» اكتسياسىنا اتسالىسىڭىز, اعايىن!

اتالعان اكتسيا ەلىمىزدە داس­تۇرگە اينالعان. 12 جىلدان بەرى ۇزدىكسىز ۇيىمداستىرىلىپ كەلۋى – سونىڭ ايعاعى. ءبىلىم جانە عى­لىم مينيسترلىگى تاراتقان اقپا­راتقا سۇيەنسەك, بالالاردى مەكتەپكە دايىنداۋ ماقساتىندا الەۋمەتتىك قولداۋ كورسەتۋگە باعىتتالعان قايىرىمدىلىق شارادان 2018 جىلى 328 766 وقۋشى 2 ملرد 822 ملن 846 مىڭ تەڭگەگە ماتەريالدىق جانە قارجىلىق كومەك العان ەكەن.

«بۇل تەك جىلىنا ءبىر رەت ۇيىم­داستىرىلاتىن اكتسيا بول­عان­دىقتان, مەملەكەت باسشىسى قاسىم-جومارت توقاەۆتىڭ ار­نايى تاپسىرماسىمەن وسى اك­تسيا­عا جاڭاشىلدىق ەنگىزىلدى. بۇدان بىلاي «مەكتەپكە جول» اك­تسياسى 2 اي عانا ەمەس, جىل بو­يى ىسكە اسادى. ناقتىلاپ ايت­سام, ءبىزدىڭ مينيسترلىك «مەنىڭ اتا­­مەكەنىم» قوعامدىق بىرلەس­تىگى­­نىڭ وكىلدەرىمەن كەزدە­سىپ, ءداس­­تۇرلى كومەك كورسەتۋ تە­تى­گىنە قو­­سىم­­شا رەتىندە پورتال ارقىلى ون­­لاين تۇردە كومەك كور­سەتۋ تۋرا­­لى كەلىسىمگە كەلدىك. ەندىگى كەزەك­­تە دەمەۋشىلەر مەن مەتسەناتتار atamekenim.kz پورتالىندا ور­­نا­لاسقان ءوتىنىم جانە ءتىزىم بو­يىنشا مۇقتاج وتباسىلارعا كومەك كورسەتە الادى», دەدى ءبىلىم جانە عى­لىم ءمينيسترى اسحات ايماعامبەتوۆ.

ونىڭ ايتۋىنشا, بۇل باستاما بىرقاتار تۇيتكىلدىڭ ءتۇيىنىن تارقاتۋعا سەپتەسەدى. ەڭ الدىمەن بالاعا ءبىر رەت قانا ەمەس, جىلدىڭ ءار مەزگىلىندە قاجەت­تى قۇرال-جابدىقتار الۋىنا كومەكتەسۋگە مۇمكىندىك تۋادى. سونان سوڭ كومەككە مۇقتاج جان­دار مەن قايىرىمدىلىق جاساي­تىن ازاماتتاردىڭ اراسىن­دا تىكەلەي بايلانىس ورناتىلادى. بۇل سەنىمگە قۇرىلعان ەڭ باس­تى باي­لانىس بولماق. «ال ۇشىن­شى­دەن, كومەككە ءزارۋ ادامداردىڭ شى­نايىلىعىن راستاپ, ولاردىڭ الەۋ­مەتتىك قاجەتتىلىكتەرىنىڭ جاۋاپسىز قالماۋىنا اسەر ەتەمىز, سونداي-اق قاراجاتتىڭ ءتۇسۋى مەن پايدالانىلۋىن ونلاين تۇردە باقىلاۋعا بولادى», دەيدى ءتيىستى ۆەدومستۆو باسشىسى.

«مەنىڭ اتامەكەنىم» پور­تالىن­داعى «مەكتەپكە جول» پلات­فورماسى – حالىقتىڭ الەۋمەت­تىك ماسەلەلەرىنە جىلدام جاۋاپ بەرۋگە, سونداي-اق قارا­­جات­تىڭ ءتۇسۋى مەن پايدالانى­لۋىن ونلاين باقىلاۋعا مۇم­كىن­دىك بەرەتىن ىڭعايلى جانە اشىق جۇيە. كومەك العىسى كەلە­تىن ادام پورتالعا كىرىپ, قاجەت­تى دەرەكتەردى تولتىرۋى ءتيىس. وندا كوپ مالىمەت سۇرال­ماي­دى, بار-جوعى مۇقتاج جاننىڭ اتى-ءجونى مەن تەلەفون ءنومىرى, بالانىڭ جسن ءنومىرى كەرەك.

ال قامقورلىق كورسەتۋدى قالايتىندار «مەكتەپكە جول» پلاتفورماسىنىڭ تومەن­گى تۇسىنا ءتۇسىپ, «قالاي كومەك­تەسە الامىن؟» دەگەن تاقى­رىپشانىڭ استىندا ونلاين تۇردە, بانك ارقىلى نەمەسە تاۋار بويىنشا قولۇشىن سوزۋعا بولادى. بۇدان بولەك, ۆو­لون­تەر بولۋ ارقىلى دا  قا­يى­رىمدىلىق شاراسىنا ا­ت­سالىسۋعا بولادى.

ء«ار 100 ادام تىركەلگەن سايىن ولاردىڭ دەرەكتەرى مينيستر­لىككە بەرىلەدى. ولار­دىڭ ءبارى تولىق تەكسەرىس­تەن وتكىزىلىپ, كومەك سۇراۋشىنىڭ شىن مانىندە قامقورلىققا مۇقتاجدىعى انىقتالعاننان كەيىن عانا كەزەككە قويىلادى. ويتكەنى اكتسيا از قامتىلعان, كوپ بالالى جانە تۇرمىسى تومەن وتباسىلاردىڭ بالا­لارىنا, اتا-اناسىنىڭ قام­قور­لىعىنسىز قالعان بالا­لارعا ارنالعان. كومەك الۋشىلار وسى تالاپتارعا ساي بولۋى قاجەت», دەيدى ۆەدومستۆونىڭ رەسمي وكىلى. مينيسترلىكتىڭ مالىمدەۋىنشە, اتالعان پلاتفورمادا كىمنىڭ كومەكتەسكەنى دە كورسەتىلەدى.

كومەك بەرگەننەن كەيىن call-ورتالىق قىزمەتكەرلەرى كومەكتەسكەنىڭىزگە العىس اي­تىپ حابارلاسادى ءارى اك­تسياعا قاتىسۋدىڭ جاسىرىن نەمەسە اشىق ءتۇرىن تاڭداۋدى سۇ­رايدى. ەگەر اشىق ءتۇرىن تاڭ­داساڭىز, كومەك كورسەتكەن ازامات رەتىندە اتى-ءجونىڭىز بەن سالعان سوماڭىز سايتتا جاريالانادى. ماسەلەن, ا.ايماعامبەتوۆ ۋادە ەتكەندەي, ءوزى باستاپ, قوس ورىنباسارى مەن كومەكشىسى قوستاپ, قارجىلاي كومەك كورسەتكەن. پلاتفورما ىسكە قوسىلعان ءبىر اپتانىڭ ىشىندە اشىق جانە جاسىرىن جومارتتاردان 139 مىڭ تەڭگە ءتۇسىپتى. ال پلاتفورماعا وسى ۋاقىت ارالىعىندا 2000 ادام كومەك سۇراپ تىركەلگەن. ءارى بۇل كورسەتكىش ءار 20 مينۋت سايىن 40-50 ادامعا كوبەيىپ وتىر. تاعى ءبىر تىلگە تيەك ەتەتىنى, سايتتاعى اقپاراتقا ساي كوم­پانيالاردىڭ ەشبىرى ءالى كومەك قولىن سوزباعان ەكەن. الايدا, «مەنىڭ اتامەكەنىم» قوعامدىق بىرلەستىگىنىڭ وكىلى اقمارال بەكباي «اكادەميا دوستۋپنوگو جيليا» قۇرىلىس كومپانياسى 500 مىڭ تەڭگە اۋدارعانىن, سول اقشاعا پلاتفورمادا ءوتىنىش قالدىرعان العاشقى 50 ادام 10 مىڭ تەڭ­گەلىك كانتسەليارلىق پاكەتپەن قامتاماسىز ەتىلگەنىن ايتتى.

ء«بىز وسى اكتسيانى باستاماس بۇرىن باعاسى قولجەتىمدى بازارعا بارىپ, ءبىر بالانى مەكتەپكە دايىنداۋ قانشا تەڭگە تۇراتىنىن انىقتاۋ ءۇشىن ەكسپەريمەنت جۇرگىزىپ كوردىك. ناتيجەسىندە ۇل بالا­نىڭ كەرەك-جاراعى 40-45 مىڭ تەڭگە, قىز بالاعا ودان 10 مىڭ تەڭگەگە قىمبات بولىپ شىق­تى. وعان مەكتەپ فور­ما­سى, سپورتتىق كوستيۋمى, اياق كيىم­د­ەرى (مەكتەپكە, دەنە شى­نىق­تىرۋعا) جانە ەڭ قا­جەت­تى وقۋ قۇرالدارىنا جۇمسا­لاتىن قارجى ەسەپتەلدى. وسى تاجى­ريبە ناتيجەسىن ءبىلىم جانە عىلىم مينيسترلىگىنە جەت­كىزدىك», دەيدى بىرلەستىك وكىلى. ونىڭ ايتۋىنشا, ۆەدومستۆو تاراپىنان تۇسكەن ۇسىنىس – بىرلەستىككە بىلدىرگەن سە­نىم. ۇيىم قوعامدىق بىرلەستىك رەتىندە قايىرىمدىلىق جانە مەتسەناتتىق مادەنيەت­تى دامىتۋعا باعىتتالعان جوبالاردى ىسكە اسىرۋ تۋرالى ميس­سياسىن ادال اتقاراتىنىن ارى­ستاعى جارىلىس سەكىلدى ەل­دەگى ەلەۋلى وقيعالار كەزىن­دە كورسەتتى. «كومەك كور­سەتىلگەن ادامعا قارجى اۋدارۋ­شىنىڭ ءاربىر تيىنى جونى­مەن جۇمسالعانىن ناقتى فاكتى­لەر­مەن كورسەتەمىز. بىرلەس­تىك­تىڭ ۇلتتىق ۆولونتەرلەر جەلى­سىمەن ارنايى مەموراندۋمى بار. قازىرگى تاڭدا اتالعان اك­تسياعا ەرىكتىلەردى تارتۋدى قولعا الىپ جاتىرمىز. ويت­كەنى تاۋارلاردى الۋدا جانە جەتكىزۋدە ولاردىڭ قول كومەگى اسا قاجەت», دەيدى ا.بەكباي.

«اتامەكەن» ۇلتتىق كاسىپ­كەرلەر پالاتاسى توراعاسىنىڭ ورىنباسارى ولجاس ورداباەۆ بيىل مينيسترلىكپەن سەرىك­تەس­تىكتە قولعا الىنىپ جاتقان اكتسياعا ەلىمىزدەگى كاسىپ­كەر­لەردىڭ دە اتسالىساتىنىن ايتتى. ونىڭ ايتۋىنشا, كەڭ­سە تاۋارلارى جانە جەڭىل ونەر­كاسىپ وندىرىسىمەن اينالىساتىن كومپانيالار اراسىندا ءبىر بالانىڭ مەكتەپكە تولىق دايىندالۋىنا قاجەتتى پاكەتكە جەڭىلدىك جاساۋ جونىندە كەلىسسوزدەر جۇرگىزىلىپ جاتىر.

ايتا كەتەيىك, «مەكتەپكە جول» اكتسياسى شەڭبەرىندە قول ۇشىن سوزۋعا نيەت بىلدىرگەن ازاماتتار ءبىلىم بەرۋ ورگاندارى مەن ۇيىمدارى ارقىلى دا كومەك كورسەتە الادى.