قارابالىق اۋىلشارۋاشىلىق تاجىريبە ستانساسىنا 90 جىل تولۋىنا وراي حالىقارالىق القاپ كۇنى ءوتتى.
ەلىمىزدەگى استىق ءوندىرۋ سالاسى مەن جالپى ەگىن شارۋاشىلىعىنداعى ءىرى عىلىمي ورتالىقتىڭ مەرەيلى مەرەكەسى كەڭ كولەمدە ۇيىمداستىرىلدى. القاپ كۇنىنىڭ اشىلۋ سالتاناتىندا مەكەمەنىڭ ەمبلەماسى – ەڭبەكقور بال اراسى بەينەسى تانىستىرىلدى. قازاقستانداعى ءىرى عالىمدار, اۋىل شارۋاشىلىعى مينيسترلىگىنىڭ, اۋىل شارۋاشىلىعى سالاسىنداعى عىلىمي ورتالىقتاردىڭ وكىلدەرى جانە رەسەيدەن كەلگەن قوناقتار عىلىمي ستانسانىڭ القاپتارىن ارالاپ, جاڭا سورتتاردىڭ ءوسىمىن كوردى, ستانسا پايدالانىپ وتىرعان تەحنيكالار كورمەسىمەن تانىستى. ونان كەيىن قوناقتار قارابالىق اۋىلشارۋاشىلىعى تاجىريبەلىك ستانساسىنىڭ 90 جىلدىعىنا ارنالعان كونفەرەنتسياعا قاتىستى.
مەرەكەلىك باسقوسۋدا قازاقستان رەسپۋبليكاسى اۋىل شارۋاشىلىعى ءبىرىنشى ۆيتسە-ءمينيسترى ايداربەك ساپاروۆ, وبلىس اكىمىنىڭ ءبىرىنشى ورىنباسارى عاۋەز نۇرمۇحامبەتوۆ, «نانوتس» ۇاق باسقارما توراعاسىنىڭ ورىنباسارى ەسەمباي يسلاموۆ جانە تاعى باسقالار عىلىمي ورتالىق ۇجىمىن مەرەيتويىمەن قۇتتىقتادى.
– قارابالىق اۋىلشارۋاشىلىق تاجىريبە ستانساسى وسى جىلدار ىشىندە كوپتەگەن تابىستارعا جەتتى. ەلىمىزدىڭ استىق وندىرىسىندە بۇل عىلىمي-تاجىريبەلىك ورتالىقتىڭ قوسقان ۇلەسى مول. قانداي تابىسقا جەتسە دە الدىمەن وسى مەكەمەنىڭ عالىمدارى مەن ەڭبەككەرلەرىنىڭ ارقاسى دەپ بىلەمىز. وبلىس اكىمى ارحيمەد مۇحامبەتوۆتىڭ قۇتتىقتاۋ سالەمىن جەتكىزەمىن. قارابالىق اۋىلشارۋاشىلىعى تاجىريبە ستانساسى تەك وبلىستىڭ عانا ەمەس رەسپۋبليكامىزدىڭ ماقتانىشى. بۇگىنگە دەيىن قارابالىق عىلىمي تاجىريبەلىك ستانساسىنىڭ عالىمدارى مەن سەلەكتسيونەرلەرى بيدايدىڭ, ارپانىڭ, باسقا دا ءداندى جانە مايلى داقىلداردىڭ, كوپجىلدىق شوپتەردىڭ 150 سورتىن شىعارىپ, اۋدانداستىردى. بۇل وتە قاجىرلى, ۇلكەن ەڭبەك, ەلىمىزدىڭ استىق يندۋسترياسىنا قوسىلعان ۇلكەن ۇلەس, – دەدى عاۋەز تورسان ۇلى.
قارابالىق اۋىلشارۋاشىلىق تاجىريبە ستانساسىنىڭ جەتكەن جەتىستىگى بۇل كۇندە تەك ەلىمىز عانا ەمەس, سىرت جەرلەرگە دە ايان. عىلىمي مەكەمە ەلىمىز تاۋەلسىزدىگىن العان جىلداردان بەرى قاراي اۋىلشارۋاشىلىعى داقىلدارىنىڭ جاڭا 34 سورتىن شىعارعان, سونىڭ 14-ءى سوڭعى بەس جىلعا تيەسىلى ەكەن. قارابالىق اشتس-نىڭ شىعارعان 45 سورتى رەسپۋبليكادا اۋدانداستىرىلدى. وتكەن جىلى عانا جۇمساق بيدايدىڭ «اينا» جانە «لاميس» دەپ اتالاتىن جاڭا سورتتارى, قاتتى بيدايدىڭ «شاريفا», ارپانىڭ «مەديكۋم 18» جانە س ۇلىنىڭ «سۇلۋ» سورتى اۋدانداستىرىلدى. عالىمدار اۋىلشارۋاشىلىعى ءونىمىنىڭ وزىندىك قۇنىنىڭ ارزانداۋى وسىمدىك اۋرۋلارىنا ءتوزىمدى جانە حيميالىق وڭدەۋدى اسا قاجەتسىنبەيتىن جاڭا سورتتار شىعارۋعا تىكەلەي بايلانىستى ەكەنىن ايتادى. وسى ورايدا قارابالىقتىق عالىمدار بيدايدىڭ تات اۋرۋىنا ءتوزىمدى «اينا» سورتىمەن ماقتانا الادى. بۇل اۋرۋدان القاپ ونىمدىلىگى 25-30 پروتسەنتكە دەيىن كەميتىن.
كونفەرەنتسيادا قارابالىق اۋىلشارۋاشىلىق تاجىريبە ستانساسىنىڭ عالىمدارى مەن ماماندارى, جۇمىسشىلارى مەملەكەتتىك مەدالدەرمەن, مينيسترلىكتىڭ, وبلىس اكىمىنىڭ گراموتالارىمەن ماراپاتتالدى.
قوستاناي وبلىسى,
قارابالىق اۋدانى