جەكسەنبىگە قاراعان ءتۇنى امەريكانىڭ دەيتون (وگايو شتاتى) قالاسىندا اتىس بولىپ, كەم دەگەندە توعىز ادام قازا تاپتى جانە 16-سى جاراقات الدى. بۇل تۋرالى جەرگىلىكتى پوليتسيا وكىلى ءباسپاسوز ءماسليحاتىندا مالىمدەدى, دەپ حابارلايدى قازاقپارات ءتىلشىسى تاسس-قا سىلتەمە جاساپ.
قىلمىسكەردى قاۋىپسىزدىك كۇشتەرىنىڭ قىزمەتكەرلەرى اتىپ ولتىرگەن. ونىڭ جەكە باسىنا قاتىستى مالىمەتتەر ازىرگە انىقتالعان جوق. بارلىق زارداپ شەككەن ازاماتتار تاياۋ ماڭداعى اۋرۋحاناعا جەتكىزىلدى, دەيتون پوليتسياسى ولاردىڭ جاعدايى تۋرالى اقپاراتتى ازىرگە تەكسەرمەگەن.
وقيعا ورنىندا پوليتسيا جۇمىس ىستەپ جاتىر, وعان فبر قىزمەتكەرلەرى قوسىلدى. بۇل قۇراما شتاتتاردا ءبىر تاۋلىكتە بولعان ەكىنشى اتىس.
بۇدان بۇرىن سەنبى كۇنى 21 جاستاعى ەر ادام Cielo Vista Mall ساۋدا ورتالىعىنا جاقىن ماڭدا Walmart سۋپەرماركەتىندە (تەحاس شتاتى) ادامدارعا وق اتقان ەدى. ونى پوليتسيا قىزمەتكەرلەرى ۇستاعان بولاتىن. بيلىكتىڭ حابارلاۋىنشا, 20 ادام قازا تاۋىپ, 26-سى جاراقات العان.