قر پرەمەر-ءمينيسترى اسقار مامين كولىك سالاسىنىڭ قىزمەتكەرلەرىن كاسىبي مەرەكەلەرىمەن قۇتتىقتادى, دەپ حابارلايدى ۇكىمەتتىڭ باسپاسوز قىزمەتى.
"قۇرمەتتى كولىك سالاسىنىڭ قىزمەتكەرلەرى!
سىزدەردى كاسىبي مەرەكەلەرىڭىزبەن شىن جۇرەكتەن قۇتتىقتايمىن!
كولىك سالاسىنىڭ دامۋى ەلباسىمىز نۇرسۇلتان ءابىش ۇلى نازارباەۆتىڭ باستى نازارىندا.
ەلباسىنىڭ كولىك-لوگيستيكا سالاسىنداعى ستراتەگيالىق شەشىمدەرىنىڭ ارقاسىندا قازاقستان ايماقتىق لوگيستيكالىق حابقا جانە ترانزيتتىك الەۋەتى دامىعان مەملەكەتكە اينالدى.
قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقاەۆ ەلباسىنىڭ وسى سالاداعى باستامالارىن ساباقتاستىق نەگىزىندە جالعاستىرىپ, «نۇرلى جول» مەملەكەتتىك باعدارلاماسى اياسىندا ۇكىمەتكە كولىك-لوگيستيكا جۇيەسىنىڭ تيىمدىلىگىن ارتتىرۋعا, ەلىمىزدىڭ ترانزيتتىك الەۋەتى مەن ينفراقۇرىلىمىن ودان ءارى دامىتۋعا قاتىستى تاپسىرمالار بەردى.
قازىرگى تاڭدا 400 مىڭنان استام ادام ەڭبەك ەتىپ جاتقان ەلىمىزدىڭ كولىك سالاسى — ەكونوميكانىڭ سەرپىندى دامۋىنىڭ درايۆەرلەرىنىڭ ءبىرى.
قازاقستان جىبەك جولى جوباسىن قارقىندى دامىتىپ, شىعىس مەن باتىس اراسىنداعى ترانزيتتىك كوپىرگە اينالدى. بۇل — قازاقستان ەكونوميكاسىنىڭ دامۋىنا تىڭ سەرپىن بەرەتىن مۇمكىندىك.
وسى رەتتە كولىك سالاسى قىزمەتكەرلەرىنىڭ ەرەن ەڭبەگىن ەرەكشە اتاپ وتكىم كەلەدى. سىزدەردىڭ كۇندەلىكتى قاجىرلى ەڭبەكتەرىڭىز ءۇشىن شىنايى العىسىمدى بىلدىرەمىن.
بارلىق كولىك سالاسىنىڭ قىزمەتكەرلەرى مەن ارداگەرلەرىنە مىقتى دەنساۋلىق, وتباسىلارىنا مول باقىت, ەل يگىلىگى جولىنداعى ەڭبەكتەرىنە تولايىم تابىس تىلەيمىن!
ىزگى نيەتپەن,
قازاقستان رەسپۋبليكاسىنىڭ پرەمەر-ءمينيسترى اسقار مامين", دەلىنگەن حابارلامادا.