استانا پروتسەسى اياسىندا سيرياداعى داعدارىستى رەتتەۋ جونىندەگى كەلەسى حالىقارالىق كەزدەسۋ قازان ايىندا وتەدى, دەپ حابارلايدى قازاقپارات ءتىلشىسى.
بۇل تۋرالى استانا پروتسەسىنىڭ 13-كەزدەسۋىندە كەپىل مەملەكەتتەر - يران, رەسەي جانە تۇركيانىڭ بىرلەسكەن مالىمدەمەسىندە ايتىلدى.
«سيريا ماسەلەلەرى بويىنشا استانا فورماتىنداعى كەلەسى حالىقارالىق كەزدەسۋدى نۇر-سۇلتان قالاسىندا 2019 جىلدىڭ قازان ايىندا وتكىزۋدى ۇيعاردىق», - دەدى قر سىرتقى ىستەر ءمينيسترىنىڭ ورىنباسارى رومان ۆاسيلەنكو ەلوردادا سيريا بويىنشا كەلىسسوزدىڭ 13-راۋندىندا كەپىل مەملەكەتتەردىڭ بىرلەسكەن مالىمدەمەسىن وقۋ بارىسىندا.
سونىمەن بىرگە, رەسمي قۇجاتتا استانا پروتسەسىنىڭ جاڭا باقىلاۋشىلارى رەتىندە يراك پەن ليۆان دەلەگاتسيالارىنىڭ قاتىسۋى ايرىقشا اتالىپ ءوتتى.
«باقىلاۋشى ەلدەر - يوردانيا, يراك جانە ليۆاننىڭ سيرياداعى بەيبىتشىلىك پەن تۇراقتىلىقتى ورناتۋ ىسىنە ءوز ۇلەسىن قوساتىنىنا سەنىم بىلدىرەمىز. نۇر-سۇلتان قالاسىندا سيريا ماسەلەلەرى بويىنشا 13-حالىقارالىق كەزدەسۋ وتكىزگەنى ءۇشىن قازاقستان بيلىگىنە شىنايى العىس ايتامىز», - دەلىنگەن مالىمدەمەدە.
ايتا كەتەيىك, ەلوردادا سيرياداعى داعدارىستى رەتتەۋ بويىنشا استانا پروتسەسىنىڭ 13-ءشى حالىقارالىق كەزدەسۋى ءوتتى. باسقوسۋ سيرياداعى, اسىرەسە يدليب پروۆينتسياسى مەن ەلدىڭ سولتۇستىك-شىعىسىنداعى قازىرگى احۋالدى تالقىلاۋعا, قاقتىعىسۋشى تاراپتار اراسىنداعى سەنىمدى نىعايتۋعا جانە ساياسي پروتسەستى ودان ءارى ىلگەرىلەتۋگە باسا نازار اۋدارادى.