سوڭعى ۋاقىتتا دەربەس قۇرىلعىلاردا قاۋىپسىزدىك سەرتيفيكاتىن پايدالانۋ ءتارتىبى تۋرالى اقپارات بەلسەندى تارالۋدا. بۇل تۋرالى باس پروكۋراتۋرانىڭ ءباسپاسوز قىزمەتى حابارلادى.
تسيفرلىق دامۋ, سونداي-اق اقپارات جانە قوعامدىق دامۋ مينيسترلىكتەرى ۋاكىلەتتى مەملەكەتتىك ورگاندار رەتىندە اتالعان سەرتيفيكاتتىڭ نىسانالى ماقساتىن ءتۇسىندىردى.
ونىڭ ەڭ الدىمەن قۇقىققا قايشى كونتەنتتەن (تەرروريزمگە, ەكسترەميزمگە, سۋيتسيدكە شاقىرۋ, زورلىق-زومبىلىقتى, قاتىگەزدىكتى, پورنوگرافيانى ناسيحاتتاۋ جانە ت.ب.) قورعاۋ ەكەنىنە نازار اۋدارىلدى.
بۇدان باسقا, سەرتيفيكاتتىڭ ەلەكتروندىق قۇرىلعىلاردى «بۇزۋدان», كيبەرشابۋىلدار مەن ۆيرۋستاردان قورعايتىنى اتالىپ ءوتىلدى.
سونىمەن قاتار, قوعامدا ونى ورناتۋ قاجەتتىلىگى, جۇرگىزىلۋى مۇمكىن «اڭدۋلار» جانە ت.ب. تۋرالى پىكىرتالاستار تىيىلماي وتىر.
باس پروكۋراتۋرا جەكە ومىرگە قولسۇعىلماۋشىلىققا, جەكە باسى مەن وتباسى قۇپياسىنا, حات الماسۋعا, تەلەفون ارقىلى سويلەسۋگە, حابارلارعا كونستيتۋتسيالىق قۇقىقتاردىڭ ساقتالاتىنىنا مەملەكەت كەپىلدىك بەرەتىنىنە نازار اۋدارادى.
ولاردى بۇزۋ قىلمىستىق جاۋاپكەرشىلىككە دەيىنگى جاۋاپتىلىققا الىپ كەلەدى.
اتاپ ايتقاندا, ەلەكتروندىق اقپاراتتىق رەسۋرستارعا, اقپاراتتىق جۇيەگە زاڭسىز كىرۋ نەمەسە تەلەكوممۋنيكاتسيالار جەلىسى بويىنشا بەرىلەتىن اقپاراتتى زاڭسىز ۇستاپ قالۋ ءۇشىن قىلمىستىق جاۋاپتىلىق بولادى جانە بەس جىلعا دەيىن باس بوستاندىعىنان ايىرۋ كوزدەلگەن (قىلمىستىق كودەكستىڭ 147-بابىنىڭ 3-بولىگى).
قك 148-بابىندا حات جازىسۋ, تەلەفونمەن سويلەسۋ, پوشتا, تەلەگراف حابارلارى نەمەسە وزگە دە حابارلار قۇپياسىن زاڭسىز بۇزعانى ءۇشىن جاۋاپتىلىق بەلگىلەنگەن.
پروكۋراتۋرا ورگاندارى قاداعالاۋ قىزمەتى شەڭبەرىندە باسقا مەملەكەتتىك ورگاندارمەن بىرگە مۇنداي قۇقىق بۇزۋشىلىقتاردىڭ جولىن كەسىپ, كىنالىلەرگە ءتيىستى شارالار قابىلدايتىن بولادى.