وتاندىق ءونىم تۇرىك نارىعىنا شىعادى

ساۋدا ميسسياسى بارىسىندا قازاقستاننىڭ ەكسپورتتىق جانە ينۆەستيتسيالىق مۇمكىندىكتەرى, سونداي-اق ەلدەگى بيزنەس جۇرگىزۋ ءتارتىبى, ەكسپورتتاۋشىلار مەن شەتەلدىك ينۆەستورلارعا كورسەتىلەتىن مەملەكەتتىك قولداۋ شارالارى مەن جالپى ساۋدا جۇرگىزۋدى ىنتالاندىرۋدىڭ ءتۇرلى قۇرالدارى تۋرالى باياندامالار جاسالدى. 

ءىس-شارا بارىسىندا قازاقستاننىڭ تۇركياداعى ەلشىسى ابزال ساپاربەك ۇلى تۇركيا قازاقستاننىڭ ماڭىزدى ستراتەگيالىق ءارى باستى ساۋدا-ەكونوميكالىق جانە ينۆەستيتسيالىق سەرىكتەستەرىنىڭ ءبىرى ەكەنىن اتاپ ءوتتى. ەكىجاقتى ساۋدانىڭ 1992 جىلعى 30 ميلليون اقش دوللارى كورسەتكىشىنەن بۇگىنگى تاڭدا 2 ميلليارد دوللارعا جەتىپ وتىرعانى ايتىلدى. 

سونىمەن قاتار قازاقستاندىق ديپلومات تاۋەلسىزدىك جىلدارىندا تۇركيا قازاقستان ەكونوميكاسىنا 3,8 ميلليارد دوللار شاماسىندا ينۆەستيتسيا قۇيعانىن جانە قازىرگى تاڭدا ەلەكونوميكاسىنىڭ ءتۇرلى سالالارىندا تۇرىك كاپيتالىنىڭ قاتىسۋىمەن 2200-گە جۋىق كاسىپورىن جۇمىس ىستەپ جاتقانىن ايتتى.

ساۋدا ميسسياسى شەڭبەرىندە قازاقستان جانە تۇرىك كاسىپكەرلەرى اراسىندا ۆ2ۆ فورماتىندا ەكىجاقتى كەلىسسوزدەر وتكىزىلىپ, سونىڭ ناتيجەسىندە بىرقاتار قازاقستاندىق ءونىمنىڭ تۇرىك نارىعىنا شىعارىلۋى بويىنشا كەلىسىمدەرگە قول جەتكىزىلدى.

سونداي-اق, ءىس-شارالار اياسىندا تۇركى ساۋدا-ونەركاسىپ پالاتاسى مەن قازاقستان-تۇركيا بىرىككەن پالاتاسىنىڭ العاشقى وتىرىستارى وتكىزىلدى. ازەربايجان, قازاقستان, قىرعىزستان جانە تۇركيا مۇشە بولىپ تابىلاتىن بۇل پالاتا مۇشە مەملەكەتتەردىڭ كاسىپكەرلەرى اراسىنداعى ەكونوميكالىق بايلانىستى نىعايتۋدى جانە ەكى ەل اراسىنداعى تاۋار اينالىمىنىڭ ءوسۋىن كوزدەيدى.

قازاقستان-تۇركيا بىرىككەن پالاتاسىنىڭ العاشقى وتىرىسىندا ەلشى بۇل پالاتانىڭ قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ 2018 جىلعى 13 قىركۇيەكتە انكاراعا جاساعان ساپارى بارىسىندا قۇرىلعانىن جانە ەكى ەل اراسىنداعى ساۋدا-ەكونوميكالىق, ينۆەستيتسيالىق جانە تەحنولوگيالىق ىنتىماقتاستىقتى ىنتالاندىرۋ جانە نىعايتۋدى كوزدەيتىنىن اتاپ ءوتتى.

ساۋدا ميسسياسىنا قازاقستاندىق جانە تۇرىك كومپانيالارىنىڭ 150-دەن استام وكىلدەرى قاتىستى. سونىڭ ىشىندە 30 قازاقستاندىق وڭدەلگەن ونىم ەكسپورتتاۋشىسى بولدى.