ماشينا جاساۋ سالاسىن دامىتۋ قاراستىرىلدى

ا. ەرجانوۆتىڭ ايتۋىنشا, يندۋستريالاندىرۋ باعدارلاماسىن ىسكە اسىرۋ جىلدارىندا ماشينا جاساۋ ەكونوميكانىڭ ەڭ سەرپىندى دامىعان سالالارىنىڭ بىرىنە اينالدى: ونداعى ءوندىرىس كولەمى 3 ەسەگەگە جۋىق ۇلعايتىلدى جانە 2018 جىلى 1 ترلن تەڭگەدەن استى.

«اتالعان كەزەڭدە جالپى سوماسى 367 ملرد تەڭگەگە 128 جوبا پايدالانۋعا ەنگىزىلدى. وسى جىلى 54 ملرد تگ سوماسىنا 10 جوبانى ىسكە قوسۋدى جوسپارلاپ وتىرمىز», دەدى ۆيتسە-مينيستر.

جۇيەلىك ماسەلەلەردى شەشۋ, سالانى دامىتۋ بويىنشا رەزەرۆتەردى انىقتاۋ جانە ىسكە اسىرۋ ماقساتىندا قر يدم «قازاقستاننىڭ ماشينا جاساۋشىلار وداعى» زتب-مەن بىرلەسىپ, ماشينا جاساۋ سالاسىن دامىتۋدىڭ 2019–2024 جىلدارعا ارنالعان جول كارتاسىن ازىرلەدى.

بارلىعى جول كارتاسىندا 11 باعىتقا بولىنگەن 57 ءىس-شارا كوزدەلگەن. جول كارتاسىن ىسكە اسىرۋ كەزىندە ءوندىرىس كولەمى مەن ەڭبەك ونىمدىلىگىن 2 ەسەگە ءوسىرۋ, ەكسپورت كولەمىنىڭ 1,2 ەسەگە ارتۋى كۇتىلۋدە.

«يندۋستريا جانە ينفراقۇرىلىمدىق دامۋ مينيسترلىگى ينۆەستورلارعا قولايلى جاعداي تۋعىزۋ, ماشينا جاساۋ ونىمدەرىن ازىرلەۋ جانە ىلگەرىلەتۋ بويىنشا جۇيەلى جۇمىستاردى رەتتەيدى», دەدى ا. ەرجانوۆ.

ۆيتسە-ءمينيستردىڭ ايتۋىنشا, قازاقستاندىق كاسىپورىندار ءوز وندىرىستەرىندە زاماناۋي تەحنولوگيالار مەن قۇرال-جابدىقتاردى قولدانا وتىرىپ, جوعارى تەحنولوگيالىق ونىمدەردى قۇرۋ پروتسەسىنە جىلدام قارقىنمەن قوسىلۋدا.

2018 جىلدان باستاپ اۋىل شارۋاشىلىعى ماشيناسىن جاساۋ سالاسىندا ءوندىرىستىڭ ءوسۋى بايقالۋدا, بۇعان ءونىمدى وتكىزۋ كەزىندە ققس تولەۋدەن بوساتۋ سەكىلدى مەملەكەتتىك قولداۋ شارالارى ىقپال ەتتى.

يندۋستريالاندىرۋدىڭ سوڭعى جىلدارىندا تەمىر جول ماشيناسىن جاساۋ بەلسەندى تۇردە دامي باستادى. سونداي-اق, تاۋ-كەن ماشيناسىن جاساۋ ءوندىرىسىنىڭ ءوسۋى بايقالادى, بۇل تاۋ-كەن ماشيناسىن جاساۋ قۇرىلىمىنىڭ 73%-ىن الاتىن بۇرعىلاۋ جانە قازباوتكىش ماشينالارعا ارنالعان قوسالقى بولشەكتەر ءوندىرىسىنىڭ ارتۋىمەن بايلانىستى. ماشينا جاساۋ ونىمدەردىڭ كەڭ نومەنكلاتۋراسىن يمپورتپەن الماستىرۋ ەسەبىنەن مۇناي-گاز ماشيناسىن جاساۋ سالاسىن دامىتۋدىڭ ايتارلىقتاي الەۋەتى بايقالادى.

«جالپى, ماشينا جاساۋ سالاسى ەكونوميكامىزدى دامىتۋ بويىنشا ۇلكەن الەۋەتكە يە. شامامەن $13 ملرد ماشينا جاساۋ ونىمدەرىنىڭ يمپورتىن, ال وتاندىق ءوندىرىس $3 ملرد استام قۇرايدى. جاقسى الەۋەت بار, سوندىقتان وسى باعىتتا جۇمىس ىستەۋىمىز كەرەك», دەدى ا. ەرجانوۆ.