ءجۇز مۇعالىم ءبىلىم جوبالارىمەن تانىستىردى

باعدارلامانىڭ جابىلۋ سالتاناتىندا 100 مۇعالىمنەن جاساقتالعان 25 كوماندا اقش-تىڭ قازاقستانداعى ۋاقىتشا سەنىمدى وكىلى تەودور لينگكە جانە نازارباەۆ ۋنيۆەرسيتەتىنىڭ ۆيتسە-پرەزيدەنتى قاديشا دايىروۆاعا ءوز جوبالارىن تانىستىردى.

ءبىلىم جانە عىلىم مينيسترلىگىمەن سەرىكتەستىك شەڭبەرىندە 2019 جىلدىڭ ساۋىرىندە بولل ستەيت ۋنيۆەرسيتەتىنىڭ پروفەسسورلارى قاراعاندى, قوستاناي, پاۆلودار, وسكەمەن جانە اقتوبە قالالارىنىڭ 50 عىلىمي-جاراتىلىستانۋ پاندەرى جانە 50 اعىلشىن ءتىلى مۇعالىمىنە جوبالىق وقىتۋ نەگىزىندەگى كاسىبي دامۋ ترەنينگىن وتكىزگەن بولاتىن. مامىر مەن ماۋسىم ايلارىندا 100 مۇعالىم ونلاين وقۋدان ءوتىپ, 8-26 شىلدە ارالىعىندا نازارباەۆ ۋنيۆەرسيتەتىندەگى ترەنينگكە قاتىسقان.

مۇعالىمدەردى دايارلاۋ بويىنشا بولل ستەيت زەرتتەۋ ۋنيۆەرسيتەتىنىڭ ءۇش اپتالىق باعدارلاماسىن قازاقستانداعى اقش ەلشىلىگى قارجىلاندىرعان. ەلشىلىكتەگى مادەنيەت بويىنشا اتتاشە ەنن پەررەلليدىڭ ايتۋىنشا, جوبانىڭ باستى ماقساتى – قازاقستانداعى ءۇش تىلدە ءبىلىم بەرۋدى جەتىلدىرۋ جانە وقۋ-ادىستەمەلىك ماتەريالداردى كوبەيتۋ.

«اقش ەلشىلىگى قازاقستان ۇستازدارىنىڭ اعىلشىن ءتىلىن ءبىلۋ دەڭگەيىن كوتەرەتىن بۇل جوباعا قۋانا قولداۋ بىلدىرەدى. ۇشتىلدىلىك – جاقسى باستاما, سوندىقتان وعان قولداۋ ءبىلدىرۋدى ۇيعاردىق. بۇگىنگى جوبا وتە قىزىقتى, سەبەبى وندا ءتۇرلى تاسىلدەر, STEM (Science, technology, engineering, and mathematics) باعىتىنداعى تەحنولوگيالار قولدانىلادى. ترەنينگكە قاتىسقان مۇعالىمدەردىڭ كوپشىلىگى ورتا مەكتەپتە ساباق بەرەدى, باستاۋىش سىنىپ مۇعالىمدەرى دە بار. ءبىزدىڭ ويىمىزشا, بۇل - ۇلكەن جۇمىس, STEM وقىتۋشىلارىنىڭ باسىم بولىگى اعىلشىن ءتىلىن ءبىلۋ مىندەتتى ەمەس دەپ ويلايدى. بىراق اعىلشىن ءتىلىن ءبىلۋ ارقىلى الەم بويىنشا ەڭ ۇزدىك رەسۋرستارعا قول جەتكىزەدى. ءتۇرلى باعدارلامالارعا قاتىسا الادى. جوبا بيىل العاش رەت ۇيىمداستىرىلدى. كەلەسى جىلى دا ءوز جالعاسىن تابادى دەپ ۇمىتتەنەمىز», - دەدى قازاقستانداعى اقش ەلشىلىگى مادەنيەت بويىنشا اتتاشە ەنن پەررەللي.

سونىمەن بىرگە جوباعا نازارباەۆ ۋنيۆەرسيتەتىنىڭ ۇزدىكسىز ءبىلىم بەرۋ دەپارتامەنتىنىڭ اعىلشىن ءتىلى وقىتۋشىلارى دا شاقىرىلعان. بىرلەسكەن جوبا ناتيجەسىندە ءپان مۇعالىمدەرىنە قاجەتتى وقىتۋعا ارنالعان رەسۋرستار ازىرلەندى.

ء«وز قالامىزدىڭ مۇعالىمدەرىمەن بىرىگىپ, بارلىق وڭىردەگى ۇستازدارعا پايدالى بولاتىن ماتەريال ازىرلەدىك. بۇل ماتەريالدار ەلەكتروندى تۇردە بارشاعا قولجەتىمدى. ازىرگە مۇندا 5-سىنىپقا ارنالعان ينفورماتيكا ءپانىنىڭ ماتەريالدارى توپتاستىرىلعان. مۇندا ءپان مۇعالىمى بارلىق تاقىرىپتى ىزدەپ تابا الادى. تەرمينولوگيا بولىمىندە اعىلشىن تىلىندەگى تەرميندەر, سوزدىك ۆيدەوسى بار, ءتۇرلى جاتتىعۋلار مەن قورىتىندى تەستىلەۋ ەنگىزىلگەن», - دەيدى تەمىرتاۋلىق مۇعالىم تاتيانا كون.