حالىقارالىق ارميالىق ويىنداردىڭ شەڭبەرىندە, قازاقستاندىق دەسانتشىلار رەسەيدىڭ پسكوۆ وبلىسىنداعى اۋە-دەسانتتىق كومپلەكستە سەكىرۋ الدىنداعى دايىندىعىن جۇرگىزۋدە. بۇل تۋرالى «باتىس» وڭىرلىك قولباسشىلىعىنىڭ ءباسپاسوز قىزمەتىنەن كاپيتان رۋستەم يگيسينوۆ حابارلادى.
جارىستىڭ ءبىرىنشى ەتاپى «ۆزۆود قۇرامىمەن دەسانتتالۋ, قونۋ الاڭىنا جينالۋ جانە 10 كم مارش-بروسوك جۇگىرۋ» باعدارلاماسىنا سايكەس, قاتىسۋشى مەملەكەتتەر اۋە-دەسانتتىق كومپلەكستەگى سەكىرۋ الدىڭداعى دايارلىقتارىنان ءوتتى. اسكەري قىزمەتشىلەر 6 سەريالى د-4 جانە «اربالەت-2» پاراشيۋتتىك جۇيەلەرىندە ءوز ارەكەتتەرى مەن قيمىلدارىن پىسىقتادى.
كونكۋرستىڭ بارلىق قاتىسۋشىلارى دەسانتشى ءپاراشيۋتيستتىڭ ۆەرتولەتتەن سەكىرۋ, جەرگە قونۋ, اۋەدەگى جانە كۇمبەزدى جابۋداعى ءىس-قيمىلدارىن ساپالى تۇردە ورىنداپ شىقتى.
- ءبىز وسى كونكۋرسقا جاقسى دايىندالدىق, دەيدى اعا لەيتەنانت بەكديار ەرگەشەۆ. – كونكۋرسقا قاتىسۋ, بىزدەر ءۇشىن ۇلكەن ابىروي جانە قارۋلى كۇشتەردىڭ تاراپىنان بىلدىرگەن سەنىم, سوندىقتان وسى جارىستا بارلىق تاپسىرمالاردى ساۋاتتى ورىنداپ, ابىرويمەن ورالامىز دەگەن سەنىمىمىز مول, - دەيدى قازاقستاندىق دەسانتشىلار ۆزۆودىنىڭ كومانديرى.
سەكىرۋ الدىنداعى دايارلىق بارىسىندا دەسانتشىلار اۋا-رايى تۋرالى اقپارات الىپ, پراكتيكالىق قيمىلدارىن پىسىقتايدى, قونۋ ورنى مەن سەكىرۋ ءتارتىبى تۋرالى نۇسقاۋلىق الادى. سونىمەن قوسا, پاراشيۋتتىك جۇيەنىڭ بۇتىندىگىن تەكسەرىپ, سەكىرۋگە جينايدى.
ەرتەڭگى كۇنى 21 ەلدىڭ دەسانتشىلارى دايىندىق بارىسىنداعى العاشقى سەكىرۋلەرىن ورىنداپ, «كيسلوۆو» قونۋ الاڭىندا وتەتىن جارىستىڭ ءبىرىنشى كەزەڭىنە دايىندىعىن ءتامامدايدى. ال كونكۋرستىڭ سالتاناتتى اشىلۋى «زاۆەليچە» پوليگونىندا 3 تامىز كۇنى وتەدى.
ماڭعىستاۋ وبلىسى