«اقجايىق» شيپاجايى اتالاتىن شاعىن اۋىل تۇرعىندارىنىڭ كوپ جىلدان بەرى قول جەتكىزە الماي جۇرگەن ماسەلەسى – جول مەن كولىك قاتىناسى ەدى.
– جول جوندەۋ ماسەلەسى – تەرەكتى اۋدانىنىڭ تۇرعىندارى ءۇشىن وتە ماڭىزدى تاقىرىپ. ويتكەنى بىزدە اۋداندىق ماڭىزى بار جولداردىڭ جالپى ۇزىندىعى 288 شاقىرىم بولسا, ونىڭ 5 پايىزى عانا جاقسى, 43%-ى قاناعاتتانارلىق دەڭگەيدە. قالعان 52 پايىزى ناشار كۇيدە. وسى ماسەلە اۋدان, وبلىس باسشىلارى تاراپىنان قولداۋ تاۋىپ, 2019 جىلى 3 اۋىلدىڭ جولىن كۇردەلى جوندەۋگە قارجى ءبولىندى. سونىڭ ءبىرى – اقجايىق شيپاجايى, – دەيدى تەرەكتى اۋدانى اكىمىنىڭ ورىنباسارى قۋانىش شارافۋتدين.
ءدال قازىر جول جوندەۋ جۇمىسى باستالدى. مەردىگەر كومپانيا «دوستىقسپەتسترانس» جشس جوندەۋ جۇمىستارىن 3 اي مەرزىمدە, ياعني 1 قازانعا دەيىن اياقتاۋدى جوسپارلاعان. وسى ماقساتقا 43 تەحنيكا جۇمىلدىرىلدى. جوبا قۇنى 241 ملن تەڭگەگە باعالانعان.
– اۋىلداعى ەڭ ۇلكەن مەكەمە بولعاندىقتان, تۇرعىندار ءتۇرلى ماسەلەمەن بىزگە كەلەدى. اۋىلدا 462 ادام تۇرادى. وسى جول ماسەلەسىن دە بىلتىر اۋىلداستار بىرنەشە مارتە كوتەرگەن بولاتىن. ءبىز بۇل ءوتىنىشتى اۋدان باسشىلىعىنا جەتكىزدىك. سونداي-اق جەرگىلىكتى بيلىك ورال قالاسىمەن اراداعى اۆتوبۋس بايلانىسىن جۇيەگە قويسا, تۇرعىنداردىڭ تاعى ءبىر تالاپ-تىلەگى ورىندالار ەدى, – دەيدى «اقجايىق» شيپاجايىنىڭ ديرەكتورى البەرت سافۋللين.
شىنىندا دا «اقجايىق» شيپاجايى وسى اتتاس ەلدى مەكەندى «قۇراۋشى» نەگىزگى مەكەمە ەكەندىگى راس. اۋىل تۇرعىندارىنىڭ دەنى وسى جەردە قىزمەت ەتەدى. بىلتىر اۋىلداعى باستاۋىش مەكتەپ عيماراتى اپات جاعدايىندا دەپ تانىلىپ, ءبىلىم ورداسىنا جابىلىپ قالۋ قاۋپى تونگەندە, الدىمەن شيپاجاي اكىمدىگى قول ۇشىن سوزدى. شيپاجاي بالانسىنداعى ءبىر عيماراتتى مەكتەپكە ۇسىنىپ, تىعىرىقتان جول تاپتى. ويتكەنى مەكتەپ جابىلسا, اۋىلدىڭ كۇيى كەتەتىنى, تۇرعىندار جان-جاققا كوشەتىنى بەلگىلى عوي. باستاۋىش مەكتەپ مەڭگەرۋشىسى جاڭىلسىن ماكەنقىزىنىڭ ايتۋىنشا, قازىر مەكتەپ جاڭا عيماراتتا تولىق جۇمىس ىستەپ تۇر. بيىل جاڭا وقۋ جىلىندا مەكتەپ-بالاباقشا مەكەمەسىندە 43 ءسابي ءبىلىم الىپ, تاربيەلەنبەك.
«اقجايىق» شيپاجايى – ءبىر مەزگىلدە 180 ادام دەمالىپ, ەم الاتىن وڭىردەگى تانىمال تۋريستىك نىسان. مۇندا قازاقستاننىڭ باتىسىنداعى 4 وبلىس پەن رەسەيدىڭ كورشىلەس ايماعىنان كەلۋشىلەر وتە كوپ. البەرت ءسافۋلليننىڭ ايتۋىنشا, بىلتىر كەلۋشىلەر سانى 157%-عا ءوسىپ, جىل ىشىندە 3357 ادام دەمالعان. ۇلتتىق شيپاجايلار قاۋىمداستىعى جاقىندا «اقجايىق» ءساناتوريىن تابيعي ەمدىك فاكتورلاردى ۇزدىك پايدالانىپ وتىرعانى ءۇشىن «التىن ديپلوممەن» ماراپاتتادى.
– ەلىمىزدە 200-دەي شيپاجاي بار, سولاردىڭ 70%-ى جەرگىلىكتى ەمدىك-شيپالى سۋ كوزدەرىن پايدالانىپ ەمدەيدى. مىنە, وسى ساناتوريلەردىڭ اراسىندا ءبىزدىڭ اقجايىق الدىڭعى ورىنعا شىقتى, – دەيدى البەرت تولەگەن ۇلى.
ايتپاقشى, شيپاجاي دەمالۋشىلارى جاتاتىن 5 قاباتتى عيمارات پەن ەمدەۋ شارالارى جاسالاتىن كورپۋس اراسى 200 مەتردەي بوس الاڭقاي ەكەن. اۋا رايىنىڭ سۋىق ءارى قولايسىز كەزىندە ەمدەلۋشىلەر ەكى عيمارات اراسىنا قينالا قاتىنايتىن. ەندى وسى الاڭقايدا باسسەين جانە سۋمەن ەمدەۋ كەشەنى قۇرىلىسى باستالدى. قۇرىلىس اياقتالعان كەزدە دەمالۋشىلار دالاعا شىقپاي, عيماراتتان عيماراتقا وتە بەرەتىن بولادى.
تەرەكتى اۋدانى – ورال قالاسىنا جاقىن, جايىق وزەنىن جاعالاي ورنالاسقان, تۇرمىسى جايلى قونىس. بۇگىندە ءوڭىر باسشىسىنىڭ تاپسىرماسىنا سايكەس, تەرەكتى اۋدانىن دامىتۋدىڭ بەسجىلدىق جوسپارى ازىرلەنگەن. «وسى جوسپار شەڭبەرىندە وبلىس ورتالىعى ماڭىندا ورنالاسقان 8 ەلدى مەكەندە جول جوندەۋ جوسپارى جاسالدى» دەيدى تەرەكتى اۋدانى اكىمىنىڭ ورىنباسارى قۋانىش سەرىك ۇلى.
باتىس قازاقستان وبلىسى