مالىمەتتەر بويىنشا, الماتى قالاسىندا 43 مىڭنان استام مۇگەدەك جاندار تۇرادى. كەزدەسۋگە اكىمنىڭ ورىنباسارلارى ە. اۋكەنوۆ, ءى. وسەروۆ, الەۋمەتتىك ءال-اۋقات باسقارماسىنىڭ باسشىسى س. سايفەدەنوۆ, قوعامدىق دەنساۋلىق باسقارماسىنىڭ باسشىسى ق. توسەكباەۆ, ءبىلىم باسقارماسىنىڭ باسشىسى گ. قوجابەرگەنوۆا, قالالىق موبيلدىلىك باسقارماسىنىڭ باسشىسى س. تەلىباەۆ جانە دە مۇگەدەكتەردى رەابيليتاتسيالاۋمەن جانە كومەك كورسەتۋمەن اينالىساتىن ۇيىمداردىڭ وكىلدەرى قاتىسقان جيىندا قالاداعى مۇمكىندىگى شەكتەۋلى جانداردى تولعاندىرعان ماسەلەلەر تىڭدالدى.
كەدەرگىسىز كەڭىستىك جانە الەۋمەتتىك ينفراقۇرىلىم نىساندارىنا بەيىمدەۋ ماسەلەلەرىنە كەڭىنە توقتالا وتىرىپ, بۇل باعىتتاعى جۇمىستارعا جەكە ەمدەۋ مەكەمەلەرىنىڭ دە قاتىسى بار ەكەندىگى ايتىلدى. كولىك ينفراقۇرىلىمىنىڭ قولجەتىمدىلىگى, ونىڭ ىشىندە ارنايى قوعامدىق كولىكتىڭ, جاياۋ جۇرگىنشى وتەتىن جەرلەردە دىبىستى باعدارشامدارعا قاتىستى اقپاراتتار كەڭىنەن نازارعا الىندى. وسى جيىندا ءمالىم بولعانىنداي, قالالىق موبيلدىلىك باسقارماسىنىڭ مالىمەتى بويىنشا بيىلعى جىلى تومەن ەدەندى قوعامدىق كولىكتىڭ 73 پايىزىن جينالمالى پاندۋستارى بار اۆتوبۋستار قۇرايدى.
جىل اياعىنا دەيىن بۇل كورسەتكىشتى 80 پايىزعا دەيىن ارتتىرۋ كوزدەلىپ وتىر. پاتولوگيانىڭ ەرتە دياگنوستيكاسى, بالالارعا ينكليۋزيۆتى ءبىلىم بەرۋ, مۇگەدەكتەردى رەابيليتاتسيالاۋ مەن ەڭبەكپەن قامتۋ ماڭىزدى ماسەلەلەرى تالقىلاندى. «شىراق» مۇگەدەك ايەلدەر قاۋىمداستىعىنىڭ ءتورايىمى ءلاززات قالتاەۆا, «Altyn Time» مۇگەدەكتەر ۇيىمىنىڭ توراعاسى ساعات ومارعاليەۆ, الماتى قالالىق مۇگەدەكتەر قوعامداستىعى توراعاسىنىڭ ورىنباسارى ۇلان ىڭكاربەكوۆ, «سوقىرلاردىڭ قازاق قوعامداستىعى» قۇ الماتى قالالىق فيليالىنىڭ ءتورايىمى كابيرا قوڭىرباەۆا, «كەڭەس» قۇ ءتورايىمى مايرا سۇلەەۆا, «پودرانكي» مۇگەدەكتەر قۇ ءتورايىمى عاليا توباتاەۆا تاراپىنان وسى سالاداعى وزەكتى ماسەلەلەر ايتىلدى.
كەڭەستىڭ قورىتىندىسى بويىنشا ب. ساعىنتاەۆ قوعامدىق دەنساۋلىق باسقارماسىنىڭ باسشىسى ق. توسەكباەۆقا جەكە ەمدەۋ مەكەمەلەرىنىڭ قولجەتىمدىلىگى بويىنشا, ال ءبىلىم باسقارماسىنىڭ باسشىسى گ. قوجابەرگەنوۆاعا مۇمكىندىگى شەكتەۋلى جانداردىڭ قولجەتىمدىلىگىنە قاتىستى اۋديت جۇرگىزۋدى تاپسىردى. ال وڭالتۋ ورتالىعىنىڭ قۇرىلىسىن جۇرگىزۋ ماسەلەسى جەكە قارالاتىن بولادى. قالا باسشىسى قوعامدىق ۇيىمدار وكىلدەرىنە كوتەرىلگەن ماسەلەلەردى شەشۋ جانە ولاردىڭ جۇزەگە اسىرىلۋىن باقىلاۋ جونىندە باعدارلامالار ازىرلەۋ جونىندە ۇسىنىس جاساپ, بۇل كەزدەسۋدىڭ تەرەڭ ديالوگقا نەگىزدەلگەنىن ءارى پايدالى بولعاندىعىن جەتكىزىپ, بارلىق ۇسىنىستىڭ قاراۋسىز قالماي ەسكەرىلەتىندىگىنە, شەشىمىن تاباتىندىعىنا ۋادە بەردى.
الماتى