جاقىندا قازالى اۋدانى جانقوجا باتىر اۋىلىنىڭ تۇرعىنى الماگۇل تولەنوۆا كافەل جابىستىرۋعا ارنالعان جەلىم شىعاراتىن شاعىن تسەحتى ىسكە قوستى.
«اۋىل شارۋاشىلىعىن قارجىلاي قولداۋ قورى» اق-نان 3,5 ملن تەڭگە جەڭىلدەتىلگەن نەسيە العان ىسكەر كەلىنشەك قۇرىلىسقا ارنالعان جەلىمگە ءتۇرلى قوسپالار قوسىپ, 25 كيلولىق قاپتامامەن ساۋداعا شىعاردى.
– تۇراقتى تۇتىنۋشىلار كوپ بولۋى ءۇشىن ءونىمنىڭ ساپاسى جوعارى, باعاسى ءتيىمدى بولۋى كەرەك. قازىر ءبىز وسى ماقساتتا ەڭبەكتەنىپ جاتىرمىز. ءونىمىمىزدىڭ باعاسى بازارداعىدان الدەقايدا ارزان. ءبىز بۇل ءىستى تابىستى ءجۇرگىزەتىنىمىزگە سەنىمدىمىز. تەك قازالى ءوڭىرىن قامتاماسىز ەتىپ قويماي, وبلىسىمىزدىڭ وزگە اۋداندارىن دا قامتىساق دەگەن ويدامىز, – دەيدى جەكە كاسىپكەر.
قازاقتا «الىستان اربالاعانشا, جاقىننان دوربالا» دەگەن ءسوز بار. تسەحقا قاجەتتى قوندىرعى, قۇرال-جابدىقتاردى شىمكەنت قالاسىنان الدىرعان كاسىپكەر تسەح جۇمىسىن جۇرگىزەتىن مامانداردى دا سول قالادان شاقىرتقان ەكەن. شىرايلى شىمكەنتتەن كەلگەن شەبەرلەر اۋىلدىڭ تالاپتى جاستارىن وسى ىسكە ۇيرەتىپ جاتىر.
دىتتەگەن شارۋاسىن ورايىنا كەلتىرگەن كاسىپكەر ءۇي سىرتىن ارلەيتىن ءساندى سىلاق ءتۇرىن دە دايىندايدى.
قىزىلوردا وبلىسى