اسقاق ونەردىڭ جانكۇيەرلەرى وسىناۋ «تەاتر جىلىندا» بىرىنەن كەيىن ءبىرى ورىن العان جارقىن وقيعالاردىڭ كۋاسىنە اينالدى: تۇساۋكەسەرلەر, گاسترولدەر, وپەرا جانە بالەت ارتىستەرىنىڭ بەدەلدى حالىقارالىق بايقاۋلارداعى جەڭىستەرى, تەاتردىڭ شەتەلدىك ءارىپتەستەرىمەن شىعارماشىلىق بايلانىسىنىڭ كەڭەيۋى – وسى سىندى ايتۋلى ساتتەر كوپ بولدى.
تەاترعا 145 000 كورەرمەن كەلدى. قر مادەنيەت جانە سپورت مينيسترلىگىنىڭ قولداۋىمەن ۇجىم 7 پرەمەرا ۇسىندى. اتاپ ايتقاندا, دج.ءروسسينيدىڭ «سەۆيلدىك شاشتاراز» وپەراسى, م.فوكيننىڭ حورەوگرافياسىنداعى ف.شوپەننىڭ مۋزىكاسىنا «شوپەنيانا» جانە ن.ريمسكي-كورساكوۆتىڭ مۋزىكاسىنا «شەحەرازادا» ءبىر ءبولىمدى بالەتتەرى, پ.چايكوۆسكيدىڭ «ەۆگەني ونەگين», دج.ءروسسينيدىڭ «جىبەك ساتى», دج.پۋچچينيدىڭ «بوگەما» وپەرالارى مەن ا.اداننىڭ «جيزەل» بالەتى كورەرمەنگە ۇسىنىلدى.
تەاتر 2 سىيلىققا يە بولدى: «اباي» وپەراسى (ل.حاميدي, ا.جۇبانوۆ) ءۇشىن اۆتورلار ۇجىمى: ءالپيەۆ تولەۋبەك نىعمەت ۇلىنا, ءبورىباەۆ الان اسقار ۇلىنا, بايعوجين سۇندەت ءابدىراحمان ۇلىنا, «استانا وپەرا» مەملەكەتتىك وپەرا جانە بالەت تەاترى» كوممەرتسيالىق ەمەس اكتسيونەرلىك قوعامىنىڭ شىعارماشىلىق ۇجىمىنا قاتىسۋشىلارعا قازاقستان رەسپۋبليكاسىنىڭ ادەبيەت پەن ونەر سالاسىنداعى مەملەكەتتىك سىيلىعى بەرىلدى. سونىمەن قاتار تەاتر كلاسسيكالىق ونەر سالاسىنداعى «BraVo» حالىقارالىق كاسىبي مۋزىكالىق سىيلىعىن يەلەندى, بۇل دودادا «استانا وپەرا» «جىلدىڭ كونتسەرتتىك/تەاتر الاڭى» اتالىمى بويىنشا كوشباسشى اتاندى.
ۇجىم «رۋحاني جاڭعىرۋ» باعدارلاماسى اياسىندا گاسترولدىك ساپارلارعا شىعىپ, يتاليا (گەنۋيا, ريم), يسپانيا (ۆالەنسيا), رەسەي (ماسكەۋ, ءنوۆوسىبىر), وزبەكستان (تاشكەنت) ەلدەرى مەن قازاقستان قالالارى (قاراعاندى, كوكشەتاۋ) بويىنشا ءساتتى ونەر كورسەتتى. تەاتر ءوز ساحناسىندا اباي اتىنداعى ماوبت-نىڭ (الماتى) گاسترولدىك باعدارلاماسىن قابىل الدى, ال تامىزدىڭ 17 جانە 24 كۇندەرى قاراعاندى اكادەميالىق مۋزىكالىق كومەديا تەاترىنىڭ گاسترولى وتپەك.
وزبەكستانداعى قازاقستان جىلى اياسىندا وراسان زور جەتىستىكپەن وتكەن تاشكەنتتەگى گاسترولدە ءارتىستەر ۇلتتىق كلاسسيكا جاۋھارى – ا.جۇبانوۆ, ل.ءحاميديدىڭ «اباي» وپەراسى مەن دج.ءپۋچچينيدىڭ «مادام باتتەرفلياي» وپەراسىن ۇسىندى.
جىل بويى «استانا وپەرا» ءارتىستەرى ءوز جەتىستىكتەرىمەن قۋانتتى, ولار ۇكىمەتتىك ماراپاتتار, وردەندەر مەن مەدالدەرىن يەلەندى, سونداي-اق كوپتەگەن حالىقارالىق بايقاۋلاردىڭ جەڭىمپازدارى اتاندى. اتاپ وتسەك, «استانا وپەرا» ديريجەرى رۋسلان بايمۋرزين كسرو حالىق ءارتىسى, مەملەكەتتىك سىيلىق لاۋرەاتى مۇقان تولەباەۆ اتىنداعى «التىن تاياقشا» حالىقارالىق ديريجەرلەر بايقاۋىنىڭ باس جۇلدەسىن جەڭىپ الدى.
وپەرا جانە بالەت ترۋپپاسىنىڭ سوليستەرى «استانا وپەرانىڭ» اتىن شىعارىپ قانا قويماي, قازاقستاننىڭ بەدەلىن شەتەلدە وڭىنان قالىپتاستىرۋدا ەلەۋلى ۇلەس قوسۋدا. «استانا وپەرا» تەاترىنىڭ جەتەكشى ءسوليسى, قازاقستاننىڭ ەڭبەك سىڭىرگەن قايراتكەرى باقتيار ادامجان يتاليا, شۆەيتساريا, فرانتسيا, رەسەي جانە ت.ب. ەلدەردىڭ ەڭ مارتەبەلى مادەني ءىس-شارالارىنا تۇراقتى تۇردە قاتىسۋدا. بۇدان بولەك, باقتيار ادامجان ايگەرىم بەكەتاەۆامەن بىرگە كانن قالاسىنداعى فەستيۆال سارايى ساحناسىندا ونەر كورسەتتى. «Viva Maïa» الەمدىك بالەت جۇلدىزدارىنىڭ گالا-كونتسەرتى اتى اڭىزعا اينالعان بالەرينا مايا پليسەتسكاياعا ارنالعان.
«استانا وپەرانىڭ» جەتەكشى ءسوليسى, قازاقستاننىڭ ەڭبەك ءسىڭىرگەن قايراتكەرى جۇپار عابدۋللينا باشقۇرت وپەرا جانە بالەت تەاترى ساحناسىندا زور جەتىستىكپەن ونەر كورسەتتى. ءانشى اتاقتى باس يلدار ابدرازاكوۆپەن بىرگە دج.ۆەرديدىڭ «اتتيلا» وپەراسىندا باستى ودابەللا پارتياسىن ورىندادى. «استانا وپەرانىڭ» جەتەكشى ءسوليسى, قازاقستاننىڭ ەڭبەك سىڭىرگەن قايراتكەرى, قر مەملەكەتتىك سىيلىعىنىڭ لاۋرەاتى سۇندەت بايعوجيننىڭ ونەرىنە يتالياندىق تىڭدارمان دۋ قول شاپالاق سوعىپ, قوشەمەت كورسەتتى. تانىمال قازاقستاندىق باريتون گەنۋيالىق كارلو فەليچە تەاترىنىڭ ساحناسىندا دج.ءپۋچچينيدىڭ «مادام باتتەرفلياي» وپەراسىندا شارپلەستىڭ پارتياسىن ۇسىندى.
«استانا وپەرا» تەاترىنىڭ سوليسى ەۆگەني چاينيكوۆ بارسەلوناداعى يسپاندىق تەاتر دە سارريا ساحناسىندا ايگىلى مۋزىكالىق ديرەكتور, تەنور ءارى پەداگوگ راۋل حيمەنەستىڭ جەتەكشىلىگىمەن كومپوزيتور دومەنيكو چيماروزانىڭ «جاسىرىن نەكە» (Il matrimonio segreto) وپەراسىن ورىندادى.
«استانا وپەرا» ءوزىنىڭ جەتىنشى تەاتر ماۋسىمىن 5 قىركۇيەكتە مۇقان تولەباەۆتىڭ «ءبىرجان – سارا» وپەراسىمەن اشپاق. سونىمەن بىرگە, كۇز مەزگىلىنە, 11 جانە 13 قازان كۇندەرىنە دج.ۆەرديدىڭ «دون كارلوس» وپەراسى مەن 22-23 قاراشا كۇندەرىنە ل.دەليبتىڭ «كوپپەليا» بالەتىنىڭ پرەمەراسى جوسپارلانعان. وپەرا ترۋپپاسى 20 قازان كۇنى نەۆاداعى سانكت-پەتەربور قالاسىنا دج.ءروسسينيدىڭ «ءجىبەك ساتى» وپەراسىمەن اتتانادى. الايدا باعدارلاما مۇنىمەن تامامدالماق ەمەس!