سۋعا شومىلۋ ماۋسىمى باستالعاننان دەمالۋشىلاردىڭ سانىنىڭ كۇرت وسەتىنى بەلگىلى, سايكەسىنشە جاعالاۋ جيەگى 1 مىڭ شاقىرىمنان اساتىن ماڭعىستاۋ وبلىسى ءۇشىن سۋ وبەكتىلەرىندە ادامداردىڭ قاۋىپسىزدىگىن قامتاماسىز ەتۋ ماسەلەسى ەرەكشە ماڭىزعا يە. وسىعان وراي, شومىلۋ ماۋسىمىنا دايىندىق كەزەڭىندە ادامداردىڭ سۋدا قازا بولۋىن بولدىرماۋ جانە ازايتۋ ماقساتىندا ماڭعىستاۋ وبلىسى اكىمىنىڭ (2019 جىلعى 03 ساۋىردەگى № 47) «ماڭعىستاۋ وبلىسى حالقىنىڭ 2019 جىلعى شومىلۋ ماۋسىمى كەزەڭىندە قاۋىپسىزدىگىن قامتاماسىز ەتۋ تۋرالى» وكىمى ازىرلەنگەن. وكىمدە كورسەتىلگەن ءىس-شارالاردىڭ ورىندالۋ بارىسىنا قالالار مەن اۋداندار اكىمدىكتەرى, قۇقىق قورعاۋ ورگاندارى جانە جەرگىلىكتى بيۋدجەتتەن قارجىلاندىرىلاتىن ورگاندار جۇمىلدىرىلعان. دەرەكتەرگە سۇيەنسەك, بۇگىنگى تاڭدا تەڭىزدە 7 ادام قازا بولدى, ونىڭ ىشىندە 2 بالا بار. سونداي-اق قۇتقارىلعان 9 ادامنىڭ 2-ەۋى جەتكىنشەكتەر.
مامانداردىڭ ايتۋىنشا, شومىلۋ ماۋسىمى باستالعانعا دەيىن وبلىس اۋماعىنداعى سۋعا شومىلۋ ورىندارىنا تۇگەندەۋ جۇرگىزىلىپ, توتەنشە جاعدايلاردىڭ الدىن الۋ جانە جويۋ جونىندەگى كوميسسيانىڭ 10 وتىرىسى وتكىزىلگەن.
- سۋ ايدىندارىندا ورىن الىپ جاتقان قايعىلى وقيعالاردىڭ بارلىعى دەمالۋشىلاردىڭ تىيىم سالىنعان جەرلەردە شومىلۋىنان بولىپ وتىر. تۇپقاراعان اۋدانىنىڭ توتەنشە جاعدايلار ءبولىمى اكىمدىكپەن بىرلەسىپ, ۆەدومستۆولىق باعىنىستى اۋماقتا شومىلۋعا تىيىم سالاتىن ورىنداردى انىقتاۋ بويىنشا ءتيىستى اقپاراتتار دايارلاعان. اتاپ ايتقاندا, «شورا» سۋ ارناسى, 64-شاقىرىمداعى «گولۋبايا بۋحتا» جانە «ساۋرا» ايماعى, فورت-شەۆچەنكو قالاسىنان تاۋشىق اۋىلىنا قاراي 30 شاقىرىمداعى «تامشالى», سونداي-اق فورت-شەۆچەنكو قالاسىنان تاۋشىق اۋىلىنا قاراي 51 شاقىرىمدا ورنالاسقان «سارىتاس» – ايماعى تىيىم سالىنعان ورىندار قاتارىنا ەنگەن. شومىلۋ ماۋسىمى باستالعاننان باستاپ جەدەل قۇتقارۋ جاساعى (جقج) كۇشتەرى كۇشەيتىلگەن قىزمەت اتقارۋ نۇسقاسىنا اۋىستىرىلىپ, قاۋىپتى ۋچاسكەلەردە كەزەكشىلىكتى جۇزەگە اسىراتىن موبيلدىك بەكەتتەر ۇيىمداستىرىلعان, دەدى مو توتەنشە جاعدايلار دەپارتامەنتى ازاماتتىق قورعانىس ءبولىمى باستىعىنىڭ مىندەتىن اتقارۋشى دەمەۋبەرگەن راتبەك قوجاحمەت ۇلى.
ايتا كەتۋ كەرەك, جاعالاۋلاردا ۇگىت-ناسيحات جۇمىستارىن جۇرگىزۋ ءۇشىن حالىقتى جۇمىسقا ورنالاستىرۋ ورتالىعىنان 35 قوعامدىق-ەرىكتى جاساقتىڭ ۆولونتەرلەرى ەڭبەككە تارتىلىپ, رەيدتەر جۇرگىزىلگەن. رەيد بارىسىندا ىشكى ىستەر ورگاندارى 249 ازاماتتى اكىمشىلىك جاۋاپكەرشىلىككە تارتىپ, جالپى سوماسى 2,5 ملن تەڭگەگە (2 483 750) اكىمشىلىك ايىپپۇل سالىنعان.
بۇگىندە قالا جانە اۋدان جاعالاۋ ايماقتارىندا 30 تىيىم سالاتىن بەلگى جانە 39 ستەند ورناتىلىپ, سونىمەن قاتار, «شورا» سۋ ارناسىنداعى ستەندتەر جاڭارتىلىپ, تاعى دا 100 مەترگە قوسىمشا قورشاۋ ورناتۋ جۇمىستارى جۇرگىزىلۋدە.
جاز مەزگىلىندە بالالاردىڭ قاۋىپسىزدىگىن قامتاماسىز ەتۋگە دە ەرەكشە كوڭىل بولىنۋدە. وبلىستىق ءبىلىم باسقارماسىمەن بىرلەسىپ «بالالاردىڭ سۋداعى قاۋىپسىزدىگىن قامتاماسىز ەتۋگە باعىتتالعان اقپاراتتىق-ناسيحاتتاۋ ءىس – شارالارىن وتكىزۋ جوسپارى قۇرىلعان. «ۇكىمەتتىك ەمەس ۇيىمدار مەن ىشكى ىستەر ورگاندارىنىڭ ءوزارا ءىس-قيمىلىنىڭ تيىمدىلىگىن ارتتىرۋ جونىندەگى 2019-2022 جىلعا ارنالعان ءىس-شارالار جوسپارىنا» سايكەس «جاس وتان», «ەكو ماڭعىستاۋ» جانە ت.ب. سياقتى ۇكىمەتتىك ەمەس ۇيىمدارمەن بىرلەسىپ, ۇگىت-پروفيلاكتيكالىق رەيدتەر جۇرگىزىلۋدە. جاستار ساياساتى ورتالىعىمەن بىرلەسە وتىرىپ, كاسپي تەڭىزىنىڭ جاعالاۋىندا قاۋىپسىزدىك شارالارى تۇسىندىرىلگەن «كەڭەس الاڭى» اكتسياسى ۇيىمداستىرىلدى.