«بۇل جوبا نۇر-سۇلتان قالاسىندا جۇزەگە اسىرىلۋدا. سەرتيفيكات ازاماتتاردىڭ تەلەفوندارىنداعى جەكە مالىمەتتەردى ساقتاۋعا مۇمكىندىك بەرەدى. وزدەرىڭىز بىلەسىزدەر, ينتەرنەتتىڭ دامۋىمەن قاتار, كيبەرلىك قۇقىق بۇزۋشىلىقتار دا جاڭا دەڭگەيگە شىعىپ وتىر. وسى ورايدا, جەكە كومپيۋتەردەن, تەلەفوننان جەكە دەرەكتەردى ۇرلاۋ جاعدايلارى ورىن الادى», دەدى ۆيتسە-مينيستر ۇكىمەت ۇيىندە وتكەن ءباسپاسوز ءماسليحاتىندا.
ونىڭ سوزىنە قاراعاندا, زاڭناما اياسىندا سەرتيفيكات بويىنشا نورما 2015 جىلى قابىلداندى. وندا ينتەرنەتكە شىعۋ مۇمكىندىگىن بەرەتىن پروۆايدەرلەر قۇرىلعى يەلەرىنە قاۋىپسىزدىكتىڭ تەحنيكالىق سەرتيفيكاتىن ورناتۋ جاعدايىن ۇسىنۋى ءتيىس.
«بۇگىندە ولار بۇل نورمانى ىسكە اسىرىپ جاتىر. ونى ءار ادام ءوز ەركى بويىنشا ورناتادى. ماسەلەن, ماعان بۇل سەرتيفيكات بويىنشا SMS كەلمەدى. ال كەلگەن بويدا ونى وزىمە جانە بالالارىمنىڭ قۇرىلعىلارىنا ورناتامىن. قاۋىپسىزدىك سەرتيفيكاتى ارقىلى بالالار قاۋىپتى رەسۋرستارعا وتە المايدى, سايكەسىنشە, جەكە مالىمەتتەردى قورعاۋعا مۇمكىندىك جاسالادى», دەپ ءتۇسىندىردى ا. وسپانوۆ.
وپەراتورلار اتالمىش سىلتەمە ەلدەگى بارلىق ابونەنتتەرگە تاراتىلىپ جاتقانىن ايتادى. ياعني, ازىرگە ونداي SMS الماعان ادامداردىڭ الاڭداۋىنا سەبەپ جوق. سىلتەمە كەلگەن ءساتتى كۇتىپ, ورناتۋعا دايىن بولۋى كەرەك. مامانداردىڭ ايتۋىنشا, ابونەنتتىڭ حاكەرلىك شابۋىلعا ۇشىراۋى ءۇشىن كۇماندى سىلتەمەگە ءوتۋى مىندەتتى ەمەس. ياعني قاۋىپسىزدىك جۇيەسىنىڭ سەرتيفيكاتى بولماعان جاعدايدا ينتەرنەت ارقىلى پايدالاناتىن كوپتەگەن قىزمەتتەرگە كىرەتىن قۇپيا سوزدەر مەن كودتاردى ۇرلاۋ وڭاي. قاۋىپسىزدىك جۇيەسىنىڭ سەرتيفيكاتىن ورناتۋ وسى ءۇشىن قاجەت.