وسىدان تۋرا ءبىر جىل دەنيس تەننىڭ اۋىر جارالانىپ, جانساقتاۋ بولىمىنە تۇسكەنى تۋرالى سۋىت حابار لەزدە تاراپ كەتتى. ەلىمىزدە عانا ەمەس, شەتەلدەردە دە كەڭىنەن تانىلىپ ۇلگەرگەن دەنيستىڭ بار الەمدەگى جانكۇيەرى ونىڭ اماندىعى ءۇشىن دۇعا تىلەگەن ەدى. وكىنىشكە قاراي, دەنيستى اجالدان اراشالاۋ مۇمكىن بولمادى. تانىمال سپورتشى اۆتوكولىك ۇرىلارى جۇمساعان پىشاق سوققىسىنان ءۇش ليتر قان جوعالتىپ, تۇسكى ساعات 15:00-دەن وتە كوز جۇمدى. بۇل قازاق سپورتى عانا ەمەس, مانەرلەپ سىرعاناۋ الەمىندەگى ورنى تولماس قازا بولاتىن...
دەنيستىڭ قازاسى ەشكىمدى دە بەي-جاي قالدىرعان جوق. بارشا قازاقستان حالقى نامىستى ۇلىنان ايىرىلىپ, قايعىدان قان جۇتسا, الەمنىڭ ءار تۇكپىرىندەگى جانكۇيەر تانىمال سپورتشىدان كوز جازىپ قالعانىنا وكىندى. سەبەبى, دەنيس ءوزىنىڭ ەكى مۇشەلدىك ومىرىندە كوپشىلىك جۇرەگىنەن ورىن الىپ ۇلگەرگەن ەدى.
دەنيس تەن 1993 جىلى الماتىدا دۇنيەگە كەلىپ, ءوزىنىڭ سۇيىكتى قالاسىندا مانەرلەپ سىرعاناۋمەن شۇعىلدانا باستادى. سپورتتىڭ بۇل تۇرىنەن باي تاريحى مەن سىرعانايتىن مۇز ايدىنى بولماسا دا, كىشكەنتاي دەنيس ءوز ارمانىنا باس تارتپادى. ساۋدا ورتالىقتارىنداعى الاقانداي مۇز ايدىندا جاتتىعىپ, كەيىن شەتەلدىك مامانداردىڭ كوزىنە تۇسە باستادى. تالانتتى دەنيستى رەسەيدىڭ تانىمال باپكەرلەرى ءوز قامقورلىعىنا الىپ, ايگىلى تاتيانا تاراسوۆا, ەلەنا بۋيانوۆالار جول كورسەتتى. كەيىن ايگىلى امەريكالىق باپكەر فرەنك كەررولدان ءتالىم الىپ, الەمدىك جارىستاردا جۇلدە سالدى.
دەنيس الەمدىك دەڭگەيدەگى العاشقى جۇلدەسىن 2013 جىلى جەڭىپ الدى. سول جىلى كانادانىڭ لوندون قالاسىندا وتكەن الەم چەمپيوناتىندا قازاقستاندىق سپورتشى پاتريك چانعا عانا ەسە جىبەرىپ, كۇمىس جۇلدەگەر اتاندى.
2014 جىلى سوچي وليمپياداسىندا قازاقستان قورجىنىنا جالعىز جۇلدەنى سالعان دا دەنيس ەدى. تورتجىلدىق دوداسىندا تالانتتى سپورتشى ۇزدىك ۇشتىككە ەنىپ, مانەرلەپ سىرعاناۋدان وليمپيادا جۇلدەگەرى اتانعان تۇڭعىش قازاقستاندىق سپورتشى رەتىندە تاريحتا قالدى.
2015 جىل دا دەنيس ءۇشىن جەمىسسىز بولعان جوق. قىتايدىڭ شانحاي قالاسىندا وتكەن الەمدىك دودادا ول قولا جۇلدەگە قول سوزىپ, ءوزىنىڭ الەمدىك دەڭگەيدەگى سپورتشى ەكەنىن تاعى ءبىر دالەلدەدى.
كەيىن دەنيسكە جاراقاتى جولبايلاۋ بولىپ, ءبىراز دودالاردا جۇلدەگەر قاتارىنا ىلىگە المادى. دەسە دە, 2017 جىلعى ۋنيۆەرسيادا ويىندارىندا توپ جارىپ, 2018 جىلعى پحەنچحان وليمپياداسىنا جاراقاتىنا قاراماستان قاتىستى.
پحەنچحان ءۇش بىردەي وليمپيادالىق تسيكلدە ونەر كورسەتكەن دەنيستىڭ سوڭعى وليمپياداسى ەدى... تالانتتى سپورتشى 2018 جىلدىڭ 19 شىلدەسى كۇنى اۆتوكولىك ۇرىلارىنىڭ قولىنان كوز جۇمدى.
دەنيستىڭ قازاسىنان سوڭ وعان ارنالعان ءتۇرلى ءىس-شارالار وتكىزىلىپ, الماتىدا ەسكەرتكىش بوي كوتەردى. ونىڭ اتىنداعى تۋرنير حالىقارالىق كونكي سپورتى تۇرلەرى فەدەراتسياسىنىڭ (ISU) كۇنتىزبەسىنە ەندى.
20 شىلدە كۇنى الماتىدا قازاقستان جانە الەم جۇلدىزدارىنىڭ قاتىسۋىمەن «دەنيس تەن جانە ونىڭ دوستارى» اتتى مۇزدى شوۋ وتەدى.