ادەتتە, ومىردە جولى وڭعارىلا قويماعان, جالقاۋلىعى جەلكەسىنەن باسىپ ىستەگەن ءىسى كەرى كەتكەندەر ءوز كەمشىلىگىن باسقادان ىزدەۋگە بەيىم تۇرادى. «مەن قانشا مىقتى بولسام دا تابىسقا جەتە المايمىن. ويتكەنى مەندە جوعارىدا سۇيەمەلدەيتىن تانىس جوق. ۇلكەن ورىندارمەن بايلانىس جوق بولعاندىقتان قارجىم دا جوق» دەپ ءوزىن-ءوزى اقتاپ الىپ جاتادى.
ال «100 جاڭا ەسىم» جەڭىمپازدارى ايدوس سايلىعاراەۆ, سىمبات ءابدىراحمانوۆا جانە حالىقارالىق «پاراساتتى پوەزيا» فەستيۆالىنە كەلگەن ماقپال مىسا بۇگىنگى تابىستارىنا ەشكىمنىڭ قولداۋىنسىز-اق وزدەرى جەتكەن جاستار وكىلى. سوندىقتان «TedTalks» فورماتىندا وتكەن كەزدەسۋ قىزىقتى بولدى.
جيىندا ماقپال مىسا پوەزيا الەمىندەگى ويلارىمەن ءبولىسىپ, ولەندەرىن وقىدى. شىن تالانتقا تۇساۋ جوق. شىعارماشىل جان نيەتتەنسە الار اسۋلارىنىڭ بيىك بولارىنا سەندىردى. ارينە, ۇلكەن ماقساتقا جەتۋ جولىندا جۇيەلى ءبىلىم كەرەك.
– مەن ۇنەمى جاستارمەن كەزدەسۋگە اسىعىپ تۇرامىن. ءسوز – ادام جانىنىڭ ەمى. ءسوزدىڭ قۇدىرەتى بولسا كەرەك, ەلگە ولەڭ ارقىلى تانىلدىم. ولەڭ – مەنىڭ تاعدىرىم, جەتىستىككە جەتكىزدى. سوندىقتان دا سىزدەرگە ايتارىم, تابيعات بەرگەن تالانتتى بارىنشا باپتاپ, ونى دامىتا ءبىلۋ كەرەك. سوندا عانا ءسىز تابىستى بولاسىز. ءۇش جىل قاتارىنان جوعارى وقۋ ورنىنا تۇسە المادىم. بار ماقساتىم اتا-اناما سالماق سالماي, جۋرناليستيكا ماماندىعى بويىنشا مەملەكەتتىك گرانت يەگەرى اتانۋ بولدى. وكىنىشكە قاراي, جۋرناليستيكا فاكۋلتەتىنە تۇسە الماي, ت.جۇرگەنوۆ اتىنداعى ونەر اكادەمياسىنىڭ كينو جانە تەلەۆيزيا ماماندىعىن ءتامامدادىم. وقۋعا تۇسەم دەگەنشە, مەنىڭ ولەڭدەرىم بىرنەشە جىر جيناققا ەنىپ, بىرنەشە رەت ءمۇشايرادا جەڭىمپاز اتاندىم. قازىر اۋدارمامەن دە اينالىسامىن. مەن بۇل ارمانىما تىنىمسىز ىزدەنىس پەن ەڭبەكتىڭ ارقاسىندا قول جەتكىزدىم. جۋرناليستيكا سالاسىندا ەڭبەك ەتىپ كەلەمىن. سوندىقتان سىزدەرگە دە وسىنداي تاباندىلىقتى تىلەيمىن, – دەدى ول.
قىزىلوردا وبلىسىنداعى العاشقى كونديتەر ونىمدەرىن دايىندايتىن دۇكەندەر جەلىسىنىڭ نەگىزىن قالاعان, وردا بۇزار وتىزداعى وعلان ايدوس سايلىعاراەۆتىڭ دا جاستارعا ايتارى كوپ بولدى.
اكەسىنەن ەرتە ايىرىلعان ايدوس تاعدىر تەزىنە ءتۇسىپ, شاربولاتتاي شيرىعىپ شىعىپتى. بۇگىندە رەسپۋبليكاعا اتاعى كەتكەن «براۋنيس» كونديتەر دۇكەندەر جەلىسىنىڭ جۇمىسىن جولعا قويعان جالىنداعان جاس جىگىت وسىناۋ جەتىستىگىنە ءبىلىم مەن ەڭبەكقورلىعى جەتكىزگەندىگىن ايتادى.
جەتىستىككە جەتۋ تەك ەڭبەكقورلىقپەن عانا ولشەنبەيدى. ايدوس سايلىعاراەۆ كونديتەر ونىمدەرىن دايارلاۋدا تۇركيا كاسىپكەرلەرىمەن تىعىز بايلانىستا بولىپ, اسپازدارىنىڭ بىلىكتىلىگىن ارتتىرۋ ءۇشىن ءارىپتەستىك قاتىناس جاساعاندىعىن جەتكىزدى. تۇركيا – كۋرورتتى ايماق. شەتەل ساياحاتشىلارى جىلدىڭ ءتورت ماۋسىمىندا ۇزىلمەيدى.
سوندىقتان دا, تۇركيا اسپازدارى ءوز سالالارى بويىنشا الەمدە ۇزدىكتەر قاتارىنان كورىنۋگە تىرىسادى. ەندى ولاردىڭ باي ءتاجىريبەسى قازاقستان پايداسىنا جاراپ جاتىر. كەزدەسۋدە ايدوس ءوز كاسىبىن اشقىسى, كاسىبي شەبەرلىگىن ارتتىرعىسى كەلەتىن جاستاردىڭ سۇراقتارىنا جاۋاپ بەرىپ, جيناقتاعان تاجىريبەسىمەن ءبولىستى.
ال سىمبات ءابدىراحمانوۆا ءبىرنەشە ءتىلدى مەڭگەرگەن, پەداگوگ-پسيحولوگ. ول قازىرگى تاڭدا يۋنيسەف-ءتىڭ جاسوسپىرىمدەر اراسىنداعى ءسۋيتسيدتىڭ الدىن الۋ جوباسى بويىنشا بىرنەشە عىلىمي ماقالالار جازىپ, ادىستەمەلىك قۇرال دايىنداعان. سونداي-اق ايماقتا مەكتەپ بىتىرۋشىلەرمەن ءتۇرلى پسيحولوگيالىق ترەنينگتەر وتكىزىپ, جاسوسپىرىمدەر اراسىنداعى قىلمىستىق وقيعالاردىڭ الدىن الۋعا كومەكتەسىپ كەلەدى.
سىمبات ەشقانداي قارجى قاجەت ەتپەيتىن مۋلتفيلمدەر دايىنداۋمەن اينالىسادى. اسىرەسە ءتىل مۇكىستىگى بار بالالارعا ارنالعان مۋلتفيلمدەرىن ماماندار ساباق بارىسىندا پايدالانىپ ءجۇر. ول 2018 جىلى قىزىلوردا قالاسىنىڭ 200 جىلدىق مەرەيتويىنا ارناپ, «سيقىرلى كىلت» ءمۋلتفيلمىن دايىندادى. بۇدان بولەك, سىمباتتىڭ بىرنەشە مۋلتفيلمدەرى وبلىستىق, رەسپۋبليكالىق «Balapan» تەلەارناسىنان بەرىلىپ كەلەدى.
– ادامنىڭ ارمانى ناقتى بولۋى كەرەك دەپ ويلايمىن. ويتكەنى مەن ۇنەمى ناقتى نارسەلەردى ارمانداپ, ونى ماقساتىما اينالدىردىم. ومىرىمدە پارسى تىلىندە قاي ەلدىڭ سويلەيتىنىن بىلمەيتىن جاسىمدا وسى ءتىلدىڭ مامانى بولۋ ءۇشىن مەملەكەتتىك گرانت يەگەرى اتاندىم. قازىرگى تاڭدا پارسى ءتىلى بويىنشا ەلىمىزدەگى ساناۋلى اۋدارماشىلاردىڭ قاتارىندامىن. جاستارعا ايتارىم, سىزدەر ەشقاشان ءوز ارماندارىڭىزعا جەتۋ ءۇشىن جالىقپاي ەڭبەك ەتۋدەن شارشاماڭىزدار. ماقساتقا جەتۋ جولىندا ءتۇرلى قۇرباندىققا بارۋعا تۋرا كەلەدى. قىدىرۋدان باس تارتىپ, تويلارعا بارماي قالۋىڭىز مۇمكىن. ەسەسىنە قوعامعا پايدالى ءىس جاسايتىنىڭىزدى ۇمىتپاڭىز. وسى جوبا جەڭىمپازدارىنىڭ ءىشىندە 18-19 جاسار جىگىتتەر بار. ولاردىڭ جەتىستىكتەرىن كورگەندە, ءوزىمنىڭ وسى ۋاقىتقا دەيىن بوس كەتكەن ۋاقىتىمدى ويلاپ وكىندىم. سوندىقتان ادام ءومىرىنىڭ كوكتەمى سانالاتىن جاستىق شاعىڭىزدى وكىنبەستەي وتكىزىڭىزدەر, – دەدى سىمبات.
قازاقستان – ۇلكەن مۇمكىندىكتەردىڭ باستاۋىندا تۇرعان مەملەكەت. ءبىلىمىڭدى جەتىلدىرىپ, ءوز كاسىبىڭدى اشام دەسەڭ قولبايلاۋلار جوققا ءتان. تەك, ماقسات جولىندا ازداعان قيىندىقتاردان قورقىپ, ورتا جولدان تاستاپ كەتۋگە بولمايدى. ەلىمىزدە قاي كاسىپپەن اينالىسقىڭ كەلسە دە جىگەرىڭدى جانىپ, كۇشىڭە كۇش, ىنتاڭا قولداۋ كورسەتەتىن مەملەكەتتىك باعدارلامالار بار. تەك, دىتتەگەن بيىگىڭە جەتپەي توقىراپ قالما.
«TedTalks» فورماتىندا وتكەن كەزدەسۋ الداعى ءومىرىم قالاي بولادى دەپ تولعانىپ جۇرگەن جاستار ءۇشىن تەمىرقازىق بولعانى انىق. كوز الدىندا سۇحبات بەرىپ وتىرعان اعا-اكپەلەرى كەشە عانا وزدەرىندەي جاس بولعان. ولار رەسپۋبليكادا مويىندالعان جەتىستىكتەرىنە ءوز ءبىلىمى, ەڭبەكقورلىعىمەن جەتتى.
كەزدەسۋگە كەلگەن جاستار ءوزدەرىن تولعاندىرعان سۇراقتارىنا جاۋاپ تاۋىپ, قاناتتانىپ قايتتى.
قىزىلوردا وبلىسى