مەملەكەت باسشىسى كۇنى كەشە, ياعني ۇلتتىق قوعامدىق سەنىم كەڭەسى قۇرامىن جاساقتاۋ الدىندا ۇكىمەت جۇمىسىن ءبىر پىسىقتاپ, مينيسترلەردى سەرپىلتىپ الدى. وسىلايشا حالىقتىڭ كوكەيىندەگى, ويىنداعى ماسەلەلەردەن قالىس قالماعانىن, كەرىسىنشە, جاعدايدى باقىلاۋدا ۇستاپ وتىرعانىن كورسەتتى. بۇل – ءابدەن قيۋى كەلىسكەن, ولشەپ-پىشىلگەن دۇرىس قادام.
جالپى, ۇلتتىق قوعامدىق سەنىم كەڭەسىنىڭ جۇمىسى قوعام ءۇشىن دە, بيلىك ءۇشىن دە كۇردەلىلەۋ, جاڭعىرۋ ۋاقىتىندا باستالعالى تۇر. قازىر قوعامدىق-ساياسي ۇدەرىستەر جەدەلدەپ, كوپشىلىكتىڭ تالابى دا وزگەردى. قوعام بيلىكتەن ەلدەگى قوعامدىق-ساياسي ۇدەرىستەردى بەلسەندىلىكپەن جۇرگىزۋدى تالاپ ەتۋدە. سوندىقتان دا ۇلتتىق قوعامدىق سەنىم كەڭەسىنىڭ جۇمىسى بارىنشا اشىق, سان سالالى, مەملەكەتىمىزدەگى بارلىق قوعامدىق كۇشتەرمەن ديالوگ ارقىلى ءجۇرۋى ءتيىس. وعان قوسا, ۇلتتىق قوعامدىق سەنىم كەڭەسى سايلاۋ پروتسەسىن ليبەراليزاتسيالاۋدىڭ ءترانزيتتى كەزەڭىندەگى وتپەلى قۇرال دەپ قاراۋعا بولادى.
بۇل اسپەكت ەلدەگى ساياسي پروتسەستەردىڭ بارلىق قوزعاۋشى كۇشى جينالاتىن پليۋراليستىك جانە دەموكراتيالىق پارلامەنت جۇمىسىنىڭ باسىمدىعىنا اينالۋى كەرەك.
سونىمەن قاتار ەلدەگى ساياسي پروتسەستەردىڭ گەوگرافياسىن كەڭەيتىپ, ەلدىڭ ساياسي ومىرىنە بارلىق وڭىرلەردى بەلسەنە قاتىستىرۋ قاجەت. ويتكەنى قازاقستانداعى ساياسي پروتسەستەر تىم ورتالىقتاندىرىلىپ كەتكەندىكتەن, ازعانتاي تولقۋلار دا ساياسي جۇيەنى تالتىرەكتەتىپ جىبەرەدى. ەگەر ساياسي پروتسەستەر ورتالىقتان الىستاتىلسا, مەملەكەت بەكەمدەنە تۇسەدى. وسى ساياسي پروتسەستەردى ورتالىقسىزداندىرۋ اياسىندا ەلىمىزدىڭ بارلىق وڭىرلەرىندە ۇلتتىق قوعامدىق سەنىم كەڭەسى سياقتى كەڭەستەر قۇرۋدى ۇسىنعان بولار ەدىم. بۇل قادام بيلىكتىڭ قوعامدىق گەوگرافيانى بولە-جارماي پايدالاناتىنىن كورسەتىپ, جەرگىلىكتى يستەبليشمەنتتىڭ ساياسي مادەنيەتىن كوتەرە تۇسەر ەدى. قازىر بولسا وڭىرلەردەگى ساياسي پروتسەستەر قاڭتارۋلى تۇر.
پرەزيدەنت ق.توقاەۆ اتاپ وتكەندەي, ەندىگى جەردە بيلىكتىڭ حالىق الدىنداعى جاۋاپكەرشىلىگى مەن ەسەپتىلىگىنىڭ تەتىكتەرى كۇشەيتىلە تۇسەدى.
ۇلتتىق قوعامدىق سەنىم كەڭەسى نەگىزگى ارەكەتىنىڭ ءبىر تارماعى رەتىندە جاستارمەن جۇمىستى قولعا الۋى كەرەك. بۇگىندە جاستار بارلىق ساياسي پروتسەستەردىڭ لوكوموتيۆىنە اينالدى. جاستاردىڭ ءبىر بولىگى ءتاۋەلسىزدىك جىلدارى قابىلدانعان باعدارلامالاردىڭ جاستارعا قايىرى بولماعانىن ايتىپ, ساياسي پروتسەستەرگە بەلسەنە ارالاسۋعا نيەت ءبىلدىرىپ وتىر. بۇل سەرپىلىستە ولارعا كومەك قولىن سوزۋ ارتىقتىق ەتپەيدى. ءبىز ءۇشىن ساياسي وزگەرىستەردىڭ ماقساتى – قوعام مەن مەملەكەتتى ءتيىمدى باسقارا الاتىن بيلىگى بار ۇيىسقان دەموكراتياعا قاراي جىلجۋ. ەڭ باستىسى, ساياسي رەفورمالار ءجۇرگىزۋ كەزىندە مەملەكەتتىك باسقارۋ ۋىستان شىعىپ كەتپەۋى كەرەك. وسى پيعىلمەن قارايتىن بولساق, ۇلتتىق قوعامدىق سەنىم كەڭەسىنىڭ جۇمىسى ءبىزدىڭ ەرەكشەلىگىمىز بەن ساياسي ۇردىستەرىمىز ەسەپكە الىناتىن دەموكراتيالىق رەفورمالاردىڭ ناقتى باعىتتارى مەن تىڭ تەتىكتەرىن قالىپتاستىرۋعا باعىتتالاتىن سياقتى. قوعامدىق سەنىمنەن – ۇلتتىق ديالوگقا! ۇلتتىق قوعامدىق سەنىم كەڭەسىن قۇرۋ قوعاممەن اراداعى ديالوگقا باستايتىن ماڭىزدى, وزەكتى جانە اۋقىمدى قادام. مەن بۇل باستامانى قولداي وتىرىپ, ۇلتتىق قوعامدىق سەنىم كەڭەسى ەلىمىزدىڭ ساياسي ومىرىندەگى جاڭا ليبەراليزاتسيا داۋىرىنە جاسالعان وڭدى قادام بولدى دەپ ەسەپتەيمىن. ەرلان سايىروۆ, ساياساتتانۋشى, ۇلتتىق قوعامدىق سەنىم كەڭەسىنىڭ مۇشەسى