وسى ورايدا اقتوبە وبلىستىق ءماسليحاتىندا قازىرگى كەزگە دەيىن قالىپتاسىپ ۇلگەرگەن بىرقاتار وڭ ۇردىستەر مەن تاجىريبەلەردى ايتقىم كەلەدى. مەنىڭ ويىمشا, بيۋدجەتتى قابىلداۋ ىسىنە, ونىڭ كىرىسى مەن شىعىسىن مۇقيات ەسەپتەۋگە ۇقىپتى كوزقاراس قالىپتاستىرۋ ۇلكەن جاۋاپكەرشىلىك ءارى سەنىم. سوندىقتان ءماسليحات سەسسياسىندا بيۋدجەتتى قابىلداپ بەكىتەر الدىندا ونى تەرەڭ سۇزگىدەن وتكىزەمىز. بۇل ءۇشىن ارنايى جۇمىس توبى قۇرىلعان. ونىڭ قۇرامىنا قوعامدىق ۇيىمدار مەن قارجىلىق ورگانداردىڭ وكىلدەرى جانە تەكسەرۋ كوميسسياسىنىڭ مۇشەلەرى ەنگەن. حالقىمىزدىڭ ۇعىم-ءتۇسىنىگىنە ساي «جەتى رەت ولشەپ, ءبىر رەت كەس» دەگەن ماسەلە ءدال وسى تۇستان باستاۋ الادى. سونداي-اق بيۋدجەتتى قابىلداۋعا جانە بيۋدجەتتىڭ شىعىستارى مەن كىرىستەرىن ەسەپكە الۋعا ارنالعان وبلىستىق ءماسليحاتتىڭ سەسسيالارى ونلاين رەجىمىندە وتكىزىلىپ, وعان اشىقتىق پەن جاريالىلىق بەرىلەدى.
وسى ماسەلەگە قاتىستى وبلىستىڭ ءار تۇرعىنى ءوز وي-پىكىرلەرى مەن ۇسىنىستارىن جەتكىزە الادى. سونداي-اق وبلىستىق ءماسليحاتتىڭ سايتى ارقىلى دا ارقايسىسى ءتيىستى ءۇن قوسا الادى. بۇل ورايدا ءبىز ەڭ الدىڭعى كەزەكتە بيۋدجەت جونىندەگى قوعامدىق كەڭەستىڭ مۇشەلەرى ايتقان قونىمدى ۇسىنىستار پەن وي-پىكىرلەردى ۇدايى نازاردا ۇستاۋدى تاجىريبەگە ەنگىزىپ كەلەمىز.
سوعان قاراماستان وڭىردە بيۋدجەت قاراجاتتارىن ءتيىمدى جۇمساۋ ىسىندە كەيبىر «اتتەگەن-ايلار» دا كەزدەسىپ قالاتىنىن جاسىرىپ قالا المايمىز. ايتالىق, جوبالىق-سمەتالىق قۇجاتتار جاساۋ كەزىندە وسىنداي ۇستىرتتىكتەر ورىن العانى, سونىڭ سالدارىنان ءوڭىردىڭ كەيبىر شالعاي اۋماقتارىنداعى الەۋمەتتىك نىسانداردىڭ دۇرىس جوبالانباعانى, ياعني قاجەتسىز بوس الاڭدار سالىنىپ كەتكەنى ساباق الۋعا تۇرارلىق جايت دەپ بىلەمىز.
بيۋدجەت تيىمدىلىگىن كوتەرۋ ىسىنە قارجىلىق ءتارتىپ پەن ونىڭ ويداعىداي ساقتالۋى سەپتىگىن تيگىزە الادى. بۇعان قوسا تايعا تاڭبا باسقانداي ايقىن جوسپارلاۋ قاجەت. سونداي-اق ءاربىر بيۋدجەتتىك باعدارلاما بويىنشا ءدال ەكونوميكالىق ەسەپتەر جاسالماسا, بيۋدجەتتىڭ ءتيىمسىز تۇستارى جويىلماق ەمەس. پرەزيدەنت قاسىم-جومارت توقاەۆتىڭ بيۋدجەت ءتيىمدىلىگىن كوتەرۋ جونىندە قويعان مىندەتتەرى اتالعان ماسەلەلەردى ناقتى اتقارۋدى جۇكتەيدى.
بيۋدجەت قاراجاتتارىن ماقساتتى جۇمساۋ ماسەلەسىندە بەلگىلەنگەن زاڭدىلىقتاردى بۇزۋ كورىنىستەرى دە كەزدەسپەي تۇرمايدى. مىسالى, وبلىستىق ءماسليحاتتىڭ وتكەن سەسسيالارىنىڭ بىرىندە 2017 جىلدىڭ بيۋدجەتتىك تاپسىرمالارىن ورىنداۋ كەزىندە وسى سياقتى كورىنىستەر ورىن العانى تەكسەرۋ كوميسسياسى تاراپىنان ايتىلدى. بۇگىندە ونىڭ انىق-قانىعى زەرتتەلۋ ۇستىندە. ءتۇيىپ ايتقاندا, بيۋدجەت قاراجاتتارىنىڭ ۇنەمدى جانە ءتيىمدى جۇمسالۋى العا دامۋدىڭ باستى تۇتقالارىنىڭ ءبىرى.
ءسانيا قالدىعۇلوۆا,
اقتوبە وبلىستىق ءماسليحاتىنىڭ حاتشىسى
اقتوبە