ماڭعىستاۋ وبلىسىنىڭ مەملەكەتتىك مەكەمەلەرى اراسىندا سالاۋاتتى ءومىر سالتىن ناسيحاتتاۋ جانە جالپى قوعامدا مەملەكەتتىك قىزمەتتىڭ وڭ ءيميدجىن قالىپتاستىرۋ ماقساتىندا وتكەن وبلىستىق سپارتاكياداعا ايماقتاعى بارلىق مەملەكەتتىك مەكەمەلەر مەن قۇقىق قورعاۋ ورگاندارى, سوت قىزمەتكەرلەرى قاتىستى. ولار شاعىن فۋتبول, ۆولەيبول, باسكەتبول, قازاقشا كۇرەس, تەننيس سەكىلدى سپورتتىڭ 9 تۇرىنەن ويىن كورسەتتى.
جارىس قورىتىندىسى بويىنشا ەرلەر اراسىنداعى شاعىن فۋتبول مەن باسكەتبولدان جانە ايەلدەر اراسىنداعى ۆولەيبولدان ماڭعىستاۋ وبلىستىق سوتىنىڭ كوماندالارى جۇلدەلى ءبىرىنشى ورىندى قانجىعاسىنا بايلاپ, ءۇش بىردەي كۋبوكتى جەڭىپ الدى.
سونداي-اق, ماڭعىستاۋ وبلىستىق سوتىنىڭ جەتەكشى مامانى فاريزا قازبەكقىزى ۆولەيبولدان, جاڭاوزەن قالالىق سوتىنىڭ سوت پريستاۆى تەمىرلان زاكىر مەن تەرگەۋ سوتىنىڭ باس مامانى ولجاس دەمەگەنوۆ باسكەتبولدان وبلىس بويىنشا «ۇزدىك ويىنشى» نوميناتسياسىن جەڭىپ الدى.
بارلىق جەڭىمپازدار سپارتاكيادانىڭ ارنايى كۋبوكتارىمەن, ديپلومدارمەن جانە مەدالدارمەن ماراپاتتالدى.
ەرلەر اراسىنداعى ۆولەيبولدان ۇزدىك ويىن كورسەتكەن سوت قىزمەتكەرلەرى تەمىرلان زاكىر مەن دىنمۇحاممەد قۋانتاەۆ پاۆلوداردا وتكەن رەسپۋبليكالىق كەزەڭگە قاتىستى.
بۇگىندە ماڭعىستاۋ وبلىستىق سوتىنىڭ 60-تان اسا سۋديالارى مەن سوت قىزمەتكەرلەرى جۇمىستان بوس ۋاقىتتا تۇراقتى تۇردە ارنايى سپورت كەشەندەرىندە دەنە شىنىقتىرۋمەن اينالىسىپ, سوت ۇجىمىندا ءوزارا پسيحولوگيالىق تۇسىنىستىك احۋالىن قالىپتاستىرىپ كەلەدى.
ماڭعىستاۋ وبلىسى