ماسەلەن, سەنات دەپۋتاتتارى ناريمان تورەعاليەۆ پەن ەربولات مۇقاەۆ باتىس قازاقستان وبلىسىنا جۇمىس بابىنداعى ساپار اياسىندا بىرنەشە اۋىلداردا بولىپ, جەرگىلىكتى حالىقپەن كەزدەستى.
جاڭابۇلاق اۋىلدىق مادەنيەت ۇيىندە جەرگىلىكتى اتقارۋشى ورگان وكىلدەرى, ءماسليحات دەپۋتاتتارى, اۋىلدىق وكرۋگ اكىمدەرى, باسقا دا مەكەمە باسشىلارى جانە تۇرعىندارمەن بولعان كەزدەسۋدە اتاۋلى الەۋمەتتىك كومەكتى تاعايىنداۋ, ءتورتىنشى دەڭگەيلى بيۋدجەتكە كوشۋ, سالىق جيناۋ, تۇرعىن ءۇي كەزەگى ماسەلەلەرى كوتەرىلدى.
سەناتورلار جۇمىس ساپارىن اۋدان ورتالىعىندا ودان ءارى جالعاستىرىپ, 100 ورىندىق ينتەرنات, 300 ورىندىق مەكتەپ-گيمنازيا, 3 قاباتتى كوممۋنالدىق تۇرعىن ءۇيدىڭ قۇرىلىسىمەن تانىستى.
سونداي-اق ن.تورەعاليەۆ پەن ە.مۇقاەۆ بۋدارين اۋىلدىق وكرۋگىندەگى «اتامۇرا» شارۋا قوجالىعىندا دا بولدى. شارۋا قوجالىقتارى كوكتەمگى جانە كۇزگى دالالىق جۇمىستار كەزىندە جانارماي باعاسىنىڭ قىمباتتايتىنىن ايتىپ, ماۋسىم كەزىندە جەڭىلدىك بەرۋىن نەمەسە سۋبسيديا ءبولۋىن سۇرادى.
* * *ارىس قالاسىنىڭ بالالارى 12 شىلدە مەن 3 تامىز ارالىعىندا دەمالۋ ءۇشىن الماتىعا كەلگەن بولاتىن.
ولار قالا ماڭىندا ورنالاسقان «ورنەك» جازعى ساۋىقتىرۋ لاگەرىندە دەمالادى. توتەنشە جاعدايلاردان زارداپ شەككەن 150 بالا ساۋىقتىرۋ شارالارىنان وتۋگە جانە ۋاقىتىن جاقسى وتكىزۋگە مۇمكىندىك الىپ وتىر. جاس قوناقتاردىڭ العاشقى توبىن الماتىلىقتار پەرروندا كۇتىپ الدى. پارلامەنت سەناتىنىڭ دەپۋتاتى دينار نوكەتاەۆا دا جاس مەيمانداردى قارسى الۋشىلاردىڭ اراسىندا بولدى. سەناتور جەتكىنشەكتەرمەن اڭگىمەلەسىپ, ولاردىڭ بارىنە دەمالىستارىنىڭ جاقسى وتۋىنە تىلەكتەستىگىن ءبىلدىردى.
* * *ءماجىلىس دەپۋتاتتارى اسىلبەك سماعۇلوۆ پەن ناتاليا جۇمادىلداەۆا ايماقتاردا سايلاۋشىلارمەن كەزدەسۋدە.
تۇرعىندارمەن كەزدەسۋلەر بارىسىندا دەپۋتاتتار ازاماتتاردىڭ وزەكتى ماسەلەلەرىن تالقىلاپ, وزدەرىنىڭ زاڭ شىعارۋشىلىق جۇمىسى, ءماجىلىستىڭ قىزمەتى تۋرالى اڭگىمەلەدى.
وسىنداي شارالاردىڭ ءبىرى قاراعاندىدا ءوتتى. حالىق قالاۋلىلارى ىشكى ىستەر مينيسترلىگىنىڭ اكادەمياسىندا ايماقتاعى قۇقىق قورعاۋ ورگاندارىنىڭ قىزمەتكەرلەرىمەن كەزدەستى.
كەزدەسۋدە مەملەكەت باسشىسىنىڭ تاپسىرمالارى مەن ەلىمىزدىڭ ەكونوميكالىق جانە الەۋمەتتىك ساياساتى تۋرالى ايتىلدى.
ءىس-شارا سوڭىندا دەپۋتاتتار جينالىسقا قاتىسۋشىلاردىڭ سۇراقتارىنا جاۋاپ بەرىپ, ءوزارا پىكىر الماستى. * * *ءماجىلىس دەپۋتاتتارى ماگەررام ماگەرراموۆ جانە نارينە ميكاەليان قوستاناي وبلىسىنىڭ رۋدنىي قالاسىندا سايلاۋشىلارمەن كەزدەستى.
دەپۋتاتتار اكىمدىكتە پروكۋراتۋرا, سوت, پوليتسيا, ءورت ءسوندىرۋشىلەر مەن باسقا دا سالالار وكىلدەرىمەن كەزدەسىپ, وبلىستىڭ الەۋمەتتىك نىساندارىن ارالاپ, ەتنومادەني ورتالىقتارعا باردى.
وسى كۇنى ءماجىلىس دەپۋتاتى تۇرعىن سىزدىقوۆ ارنايى الەۋمەتتىك قىزمەتتەر ساپاسىنا بايلانىستى اقمولا وبلىسىنىڭ بۋراباي اۋدانىندا كەزدەسۋ وتكىزدى.
ششۋچە قالاسىنداعى ارنايى الەۋمەتتىك قىزمەتتەر ورتالىعىنا بارعان دەپۋتات ونداعى قىزمەت كورسەتۋ ساپاسىمەن, جابدىقتارمەن تانىستى.
* * *شىمكەنت قالاسىندا ءماجىلىس دەپۋتاتى نۇرجان التاەۆ بىرقاتار كەزدەسۋلەر وتكىزدى.
دەپۋتات «Continental Logistics Shymkent» كولىك-لوگيستيكالىق ورتالىعىنىڭ جۇمىسىمەن تانىسىپ, ۇجىمىمەن كەزدەستى.
2017 جىلدىڭ جەلتوقسان ايىندا ىسكە قوسىلعان ا+ ساناتىنداعى «Continental Logistics Shymkent» كەشەنىنىڭ بۇگىنگى جۇمىسى قارقىندى. مۇندا قۇرعاق جانە كليماتتىق قويمالاردان بولەك, كونتەينەرلىك تەرمينال, كەدەندىك رەسىمدەۋ ايماعى مەن ىلەسپەلى قۇرىلىمدارى بار. * * *ءماجىلىس دەپۋتاتتارى قانات مۋسين, شاۆحات وتەمىسوۆ باتىس قازاقستان وبلىسى زاشاعان كەنتىندەگى «نۇرلى جەر» باعدارلاماسى بويىنشا سالىنىپ جاتقان 9 قاباتتى ءۇيدىڭ قۇرىلىسىمەن تانىستى.
«نۇرلى جەر» مەملەكەتتىك تۇرعىن ءۇي قۇرىلىسى باعدارلاماسىنىڭ نەگىزگى ماقساتى – حالىق ءۇشىن تۇرعىن ءۇيدىڭ قولجەتiمدiلiگiن ارتتىرۋ.
– «نۇرلى جەر» باعدارلاماسى اياسىندا قازىرگى تاندا ەلىمىزدە مىڭداعان پاتەر سالىنۋدا. ناتيجەسىندە, كوپتەگەن جەرلەستەرىمىز تۇرعىن ۇيگە قولدارىن جەتكىزىپ جاتىر. بارىمىزگە بەلگىلى سوڭعى ۋاقىتتا كوپ بالالى وتباسىلاردى تۇرعىن ۇيمەن قامتاماسىز ەتۋ جۇمىستارىنا باسا نازار اۋدارىلۋدا. ەلباسىنىڭ تاپسىرماسى بويىنشا جىل سايىن 50 ملرد تەڭگە قاراجات بولىنەتىن بولادى, – دەدى ءماجىلىس دەپۋتاتى شاۆحات وتەمىسوۆ.