جاستار جىلىنىڭ اياسىندا قازاقستان رەسپۋبليكاسى اقپارات جانە قوعامدىق دامۋ مينيسترلىگىنىڭ مەملەكەتتىك گرانت شەڭبەرىندە «ازاماتتىق باستامالاردى قولداۋ ورتالىعى» كەاق-نىڭ قولداۋىمەن «وڭىرلەردە جاستاردى ىنتالاندىرۋ جۇمىسىن جۇرگىزۋ ءۇشىن مەنتورلاردىڭ 4 توبىن بارىپ وقىتۋدى ۇيىمداستىرۋ» اتتى جوبا جۇزەگە اسۋدا.
«ەلورداعا ەلىمىزدىڭ 4 ايماعىنان كەلگەن بەلسەندى جاستار, تالىمگەرلىك تۇجىرىمداماسىن ۇيرەنىپ, قازاقستانداعى تالىمگەرلىك ينستيتۋتىنىڭ دامۋىن تالقىلاۋ ءۇشىن باس قوستى. جاستار لاگەرى 4 كۇن جۇمىس ىستەدى. مۇندا دەباتتار, سەمينارلار, ترەنينگتەر جانە جەتەكشىلەرمەن كەزدەسۋلەر ءوتتى. جوبانىڭ ماقساتى جاستارعا ومىرلىك ءوز جولدارىن تابۋعا, كاسىبيلىگىن ارتتىرۋعا, تۇلعالىق دامۋى مەن ءوزىن-ءوزى تانۋلارىنا مەنتورينگ ءادىسى (تالىمگەر) ارقىلى قولداۋ كورسەتۋ, مەنتور قىزمەتىن اتقارا الاتىن عالىمدار, كاسىپكەرلەر, ساراپشىلار, جوعارى جانە ورتا ارناۋلى وقۋ ورىندارىنىڭ وقىتۋشىلارى, كاسىپورىن جەتەكشىلەرى, مەملەكەتتىك قىزمەتكەرلەرمەن ءوزارا ارەكەت ەتۋ جانە تاجىريبە الماسۋ ءادىسى ارقىلى قوعامداعى تالىمگەرلىكتى دامىتۋ. سونىمەن قاتار جوبا جاستاردى تابىسقا جەتەلەۋگە, ىنتالاندىرۋعا, كاسىپقوي بولۋعا, قۇقىقتىق كەڭەس بەرۋگە جانە تالىمگەرلەردىڭ كومەگىمەن جەكە باسىنىڭ دامۋىنا ىقپال ەتەدى», دەيدى ۇيىمداستىرۋشىلار.
وقىتۋ جۇمىستارىن تاجىريبەلى قازاقستاندىق جانە حالىقارالىق جاتتىقتىرۋشىلار مەن جاستار كوشباسشىلارى وتكىزەدى. ولاردىڭ قاتارىندا عاليا نۇربەكوۆا, مادينا بەليالوۆا, عاني ابادان, يليا شمەلەۆ (ماسكەۋ), جاننا يبراەۆا, «استانا تۆ» تەلەارناسىنىڭ تەلەجۇرگىزۋشىسى ساندي سۇلتان جانە دە پرەزيدەنت جانىنداعى مەملەكەتتىك باسقارۋ اكادەمياسىنىڭ وقىتۋشىلارى بار.
ءىس-شارا بارىسىندا ءومىردىڭ تابىستى تراەكتورياسىن قۇرۋدا, مەنتورينگ قۇرالدارى ارقىلى جەكە دامۋ مەن ءوزىن-ءوزى ايقىنداۋدا جاستارعا قولداۋ كورسەتۋدىڭ جاڭا مۇمكىندىكتەرى قاراستىرىلدى, ۇزدىك مەنتورلىق تاجىريبەلەردى پايدالانۋ جانە قۇرۋ ماسەلەسى تالقىلاندى. جوبانى ىسكە اسىرۋ شەڭبەرىندە «KAZBRANDS» قق وڭىرلىك كۋراتورلار مەن تالىمگەرلەر باسشىلىعىمەن 4 وڭىردە 2 كۇندىك جاستار كەمپتەرى ۇيىمداستىرىلاتىن بولادى. بيىلعى قاراشا ايىنا دەيىن جاستاردىڭ ءتۇرلى الەۋمەتتىك ساناتتارى ءۇشىن ديالوگ الاڭدارى, سەمينارلار, ترەنينگتەر, كەزدەسۋلەر جۇمىسى جۇزەگە اسادى.
بۇدان بولەك, وڭىرلەردە جاستار بويىنشا بىرىڭعاي اقپارات جيناۋعا جانە جاستار ۇەۇ اراسىندا كەرى بايلانىس بەرۋگە مۇمكىندىك بەرەتىن ينتەراكتيۆتى كارتا/پلاتفورما قۇرۋ بويىنشا الدا اۋقىمدى جۇمىستار تۇر.
راۋان قايدار, «Egemen Qazaqstan»