تۇرمىسى تومەن وتباسىلارعا ارناپ سالىنعان 50 پاتەردى وبلىس اكىمدىگى قولعا السا, 100 ءپاتەردى وسى ءوڭىردىڭ تۋماسى, مەتسەنات بولات وتەمۇراتوۆتىڭ قايىرىمدىلىق قورى كوتەرىپ الدى.
سىر وڭىرىنە جۇمىس ساپارىمەن كەلگەن Nur Otan پارتياسى دەپۋتاتتىق فراكتسياسىنىڭ مۇشەلەرى, ءماجىلىس دەپۋتاتتارى ابزال ەراليەۆ, بالايىم كەسەباەۆا, ءبايدىلدا جىلقىشيەۆ, تاراس حيتۋوۆ «بالامەكەن» جوباسى اياسىندا سالىنعان تۇرعىن ۇيلەر قۇرىلىسىمەن تانىسىپ, تۇرعىندارمەن جۇزدەستى.
ولار مەجەلەنگەن 100 وتباسىنا ارنالعان قوس پاتەرلى ءۇيدىڭ 50-ىنە قونىستانعان تۇرعىندارمەن كەزدەستى. حالىق قالاۋلىلارىنا وسى ۇيدەن باسپانا العان كوپ بالالى انا ىزىمكۇل تۇرسانوۆا بارلىق انالار اتىنان راحمەتىن ايتتى.
– بۇعان دەيىن پاتەر جالداپ قينالىپ جۇرگەنبىز. «بالامەكەن» جوباسىنىڭ ناتيجەسىندە مىنە, باسپانالى بولىپ وتىرمىز. كوشىپ كەلگەنىمىزگە ءبىر اي بولدى. مۇندا جارىق, سۋ, گاز, جول, تەلەفون بايلانىسى بار, بارلىق جاعداي جاسالعان. ەلىمىزگە وسىنداي قامقورلىق كورسەتىپ جاتقانىنا العىس ايتامىن, – دەدى ىزىمكۇل تۇرسانوۆا.
ەلباسىنىڭ حالىقتى الەۋمەتتىك قولداۋ باعىتىنداعى تاپسىرماسىنىڭ ناتيجەلى جۇزەگە اسىرىلۋىنا كوز جەتكىزگەن ءماجىلىس دەپۋتاتتارى دا جوبا اياسىنداعى جۇمىستارعا وڭ باعاسىن بەردى.
«بالامەكەن» جوباسى حالىق قالاۋلىلارىن دا ءتانتى ەتتى. ءماجىلىس دەپۋتاتى بالايىم كەسەباەۆا كوپ بالالى انالارعا ارنالعان وسىنداي ءتيىمدى ءارى ىڭعايلى جوبانى تەك سىر ءوڭىرىنەن كورگەندىگىن ايتىپ, وسىناۋ ىسكە مۇرىندىق بولعان ەل اعالارىنا راحمەتىن جەتكىزدى.
حالىقپەن كەزدەسۋ بارىسىندا پارلامەنت دەپۋتاتتارىمەن بىرگە بولعان Nur Otan پارتياسى قىزىلوردا قالالىق فيليالى توراعاسىنىڭ ءبىرىنشى ورىنباسارى ءشارىپ ءابدىراحمانوۆ وبلىستاعى تۇرعىن ۇيگە بايلانىستى جاسالىپ جاتقان جۇمىستاردى ايتىپ ءوتتى.
– تۇرعىن ءۇي قۇرىلىسىن دامىتۋ ماقساتىندا سوڭعى 6 جىل ىشىندە قىزىلوردا قالاسىنىڭ وزىندە 15 شاعىن اۋدان پايدا بولعان. جاڭا اۋدانداردىڭ قۇرىلىسى دا ءجۇرىپ جاتىر. 2019 جىلدىڭ سوڭىنا قاراي سىردىڭ سول جاعالاۋىندا 2 628 ءپاتەرلىك 13 كوپقاباتتى تۇرعىن ءۇي سالىنىپ, وعان 13 مىڭ ادامدى قونىستاندىرۋ كوزدەلىپ وتىر. ەلباسىنىڭ 2018 جىلدىڭ قاڭتارىنداعى جولداۋىنا وراي, بولاشاقتا ءبىر ادامدى 30 شارشى مەتر باسپانامەن قامتاماسىز ەتۋ ماسەلەلەرى دە جوسپاردا بار, – دەدى ول.
قىزىلوردا وبلىسى