باسقارما 2017 جىلى «اقتوعاي اۋدانىنداعى تۇلكى وزەنى اعىسىنىڭ باستاۋىنان العا اۋىلىنا دەيىن قايتا جاڭعىرتۋ» اتتى ءۇش جىلعا ارنالعان ارنايى جوبا ازىرلەگەن بولاتىن.
– ەرتىستەن تارماقتالىپ شىعاتىن شاعىن وزەندەر تابيعاتتى قورعاۋ ماماندارىنىڭ نازارىندا. تۇلكى وزەنى دە ەرتىستىڭ وڭ جاعالاۋىنداعى ەسكى ساعالاردىڭ ءبىرى. سوڭعى جىلدارى وزەن ارناسى بويىندا اعاشتار مەن بۇتالار قاۋلاپ ءوسىپ, سۋى تايازدانىپ, شارۋاشىلىقتاردى سۋمەن قامتۋ قيىنداي باستادى, – دەيدى ءبولىم مامانى ديار قايىركەنوۆ.
باستاۋىنان باستاپ اقتوعاي اۋدانىنىڭ العا اۋىلىنا دەيىنگى اعىسىن قالپىنا كەلتىرۋ, سۋ رەجىمىن تۇراقتاندىرۋ جانە وسىمدىكتەر مەن جاندىكتەرى تىرشىلىك ەتەتىن يحتيوفاۋناسىن جاقسارتۋ ماقساتىندا باسقارما جاڭعىرتۋ جوباسىن قولعا العان-دى. ءسويتىپ مەردىگەر كومپانيالار اراسىندا كونكۋرس جاريالانىپ, قورىتىندىسى بويىنشا اتالعان جوبانى «پاۆلودار وزەن پورتى» اق جەڭىپ العان.وزەندى تازارتۋ جوباسىن جۇزەگە اسىرۋ ءۇشىن رەسپۋبليكالىق بيۋدجەتتەن 1 ملرد 160 ميلليون تەڭگە بولىنگەن كورىنەدى. سۋدىڭ تۇبىندەگى باتپاعىن «كلاسسيك-4» ماركالى الىپ تەحنيكا ءسۇزىپ شىعارسا, سۋ بەتىنە جانە وزەن جيەگىنە ءۇيىلىپ قالعان اعاشتاردى ەكى سۋ كرانى تازالاعان. تازارتۋ جۇمىستارى كەزىندە 200 مىڭ تەكشە مەتر قوقىس الىنعان.
– وزەننەن شىعارىلعان اعاشتاردى اۋىل تۇرعىندارىنا بەردىك. بىلتىردىڭ وزىندە 800 تونناداي وتىندى تەگىن ۇلەستىردىك, – دەيدى پورت باسشىسىنىڭ ورىنباسارى تولەگەن مۇقاتاي ۇلى.
كاسىپورىن بۇعان دەيىن ۋسولكا, اقسۋداعى ەرتىس ساعاسى, باياناۋىلداعى سابىندىكول, جاسىباي كولدەرىن تازالاۋعا قاتىسقانىن ايتا كەتەيىك.
اۋىل تۇرعىندارىنىڭ ايتۋىنشا, قازىر تۇلكىنىڭ ارناسى كەڭىپ, سۋى تۇنىپ, اعىسى قالپىنا كەلىپتى. جۇرت وزەننەن بالىق اۋلاۋعا اسىعاتىن بولعان.
بۇل وزەندى تازارتۋدىڭ اۋىل شارۋاشىلىعى ءۇشىن ماڭىزى ەرەكشە. وسى وزەندى جاعالاي قونىستانعان اقتوعاي اۋدانىنىڭ اۋىلدارىندا سۋارمالى ەگىس القابى ۇلكەيىپ كەلەدى. تۇلكىنىڭ سۋىن مۇتكەنوۆ, ءابجان, العا اۋىلدارىنا قارايتىن بىرقاتار شارۋاشىلىقتار پايدالانادى. ال سۋى تارتىلىپ قالسا, وزەن جاعالاعان شارۋالار سۋسىز قالار ەدى. ماسەلەن, اقتوعاي اۋدانىنداعى «اقتوعاي-اگرو» جشس, باسقا دا شارۋاشىلىقتاردىڭ ەگىستىك القاپتارى وسى وزەنگە تاۋەلدى.
وبلىستىق اۋماقتىق ورمان شارۋاشىلىعى جانە جانۋارلار الەمى ينسپەكتسياسى باسشىسىنىڭ ورىنباسارى نۇرجان قازتايدىڭ ايتۋىنشا, وڭىردەگى وزەن-كولدەردەن ءبىر ايدىڭ ىشىندە 15,9 توننا قاتتى تۇرمىستىق قالدىقتار شىعارىلىپ, 1840 مەتردەن استام قاراۋسىز قالعان اۋلار الىنىپتى.
بىلتىر وبلىستاعى وزەن-كولدەردەن 11 شاقىرىمنان استام اۋ الىنىپ, 14,7 توننا قاتتى تۇرمىستىق قالدىق پوليگوندارعا تاستالىپتى. قورشاعان ورتانى ساقتاۋعا بەي-بەرەكەت قارايتىن ادامداردىڭ كەسىرىنەن جىل سايىن بۇل جاعداي قايتالانۋدا. پاۆلودار وبلىسى