كومپانيانىڭ جالپى ەڭبەكاقى تولەۋ قورى شامامەن 10 پايىزعا ۇلعايدى, سونىمەن بىرگە ماماندىق بويىنشا ەڭبەكاقىنىڭ ءوسۋى ديففەرەنتسيالدى بولادى جانە ول قازىرگى اقىعا بايلانىستى بولماق.
كەنشى, مەتاللۋرگ جانە بايىتۋشى ماماندىقتارى كۇردەلى ءارى قاۋىپتى بولىپ سانالادى. سوندىقتان قازاقمىس ارقاشان ەڭبەك ۇجىمدارىنىڭ جاعدايىن ەسكەرە وتىرىپ, مۇمكىندىگىنشە ەڭبەكاقىنى كوتەرىپ وتىرۋعا تىرىسادى. لايىقتى جانە باسەكەگە قابىلەتتى ەڭبەكاقى – الەۋمەتتىك جاعدايدىڭ ماڭىزدى فاكتورى.
ەستەرىڭىزگە سالا كەتەيىك, 2019 جىلدىڭ قاڭتار ايىنان باستاپ قازاقمىس كورپوراتسياسىنىڭ جۇمىسشىلارى كوبەيتىلگەن جالاقى الىپ كەلەدى. ەڭبەكاقىنى ءوسىرۋ قازاقستان رەسپۋبليكاسىنداعى تومەنگى جالاقى مولشەرىندەگى وزگەرىستەرگە بايلانىستى جاسالعان بولاتىن.
«قازاقمىس حولدينگ» جشس – تابيعي رەسۋرستاردى ءوندىرۋ جانە قايتا وڭدەۋ سالاسىنداعى جەتەكشى كومپانيا, قازاقستانداعى ءىرى مىس ءوندىرۋشى. كومپانيا قۇرامىندا ون ەكى كەنىش, التى كەن بايىتۋ فابريكاسى, ەكى مىس بالقىتۋ زاۋىتى جانە ەكى كومىر رازرەزى بار. قازاقمىس كەن وندىرەتىن جانە ونى وڭدەپ, تاۋارلى مەتاللعا اينالدىراتىن وندىرىستىك نىسانداردى باسقارادى. 2018 جىلى 238,858 مىڭ توننا كاتودتى مىس ءوندىرىلدى, 3112 كگ التىن قۇيمالارى الىندى. بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا (2250 كگ) 862 كيلوگراممعا ارتىق (+38,3%).
قازاقمىس – الەمدەگى ءىرى كۇمىس وندىرۋشىلەردىڭ ءبىرى – 2018 جىلى 242,0 توننا تازارتىلعان كۇمىس الىندى.
كورپوراتسيا كاسىپورىندار مەن ايماقتاردى ەلەكتر ەنەرگياسىمەن قامتاماسىز ەتەتىن ىشكى ەلەكترستانتسيالارىنا يە.