جاقىندا تالدىقورعان قالاسى ماڭىنداعى قاراتال وزەنىنە باتىپ كەتكەن 14 جاسار قىز بالانى قۇتقارۋشىلار مەن ەرىكتىلەر 6 كۇن بويىنا ىزدەپ, سۇيەگىن ازەر تاپقان بولاتىن. وكىنىشتىسى, قايعىلى جاعدايمەن اياقتالاتىن مۇنداي وقيعالار ادامداردىڭ دەمالىسى كەزىندە, بەلگىلەنبەگەن جەرگە سۋعا شومىلۋى بارىسىندا بولىپ جاتىر ەكەن. بۇعان دەيىن سول قاراتال وزىنىنە تاعى ءبىر ءجاسوسپىرىم سۋعا باتىپ, اتا-اناسىنىڭ قولىندا ءجانتاسىلىم ەتكەن-ءدى. قازىر قۇتقارۋشى ماماندار مەن ەرىكتىلەر دەمالۋشىلاردى قاۋىپتەن ساقتاندىرىپ باعۋدا. الايدا, سۋعا شومىلۋ ماۋسىمى كەزىندەگى كۇتپەگەن جاعداي ازايار ەمەس.
ماسەلەن, كەشە باسسەيندەگى سۋعا باتىپ كەتكەن جاس جىگىت اجال اۋزىنان قالدى. سۋعا تۇنشىعىپ, كلينيكالىق ءولىم كۇيىنە كوشكەن ادامدى سول ساتتە باسسەيندە دەمالىپ جۇرگەن دارىگەر بايقاپ قالىپ, جەدەل كومەك كورسەتكەن. ناتيجەسىندە 17 جاسار نازيم ءتىرى قالدى. وسىلايشا, تالدىقورعان قالاسىنداعى «تيۋركسكي دۆوريك» دەمالىس الاڭىنداعى باسسەيندە سۋعا باتقان 17 جاسار جىگىتتى وبلىستىق اۋرۋحانانىڭ رەانيماتولوگ-انەستەزيولوگ دارىگەرى ءىلياس نۇسىپاليەۆ كلينيكالىق ولىمنەن قۇتقارىپ قالدى. جۇمىس ۋاقىتى اياقتالعان دارىگەر ءىلياس نۇسىپاليەۆ اتالعان دەمالىس ورنىنا سۋعا تۇسۋگە بارعان ەكەن. سول ۋاقىتتا جينالعان جۇرت باسسەيننەن ەس-ءتۇسسىز كۇيىندەگى ءنازيمدى تاۋىپ الىپ, ۋلاپ-شۋلاپ جاتقان. بىردەن كومەككە ۇمتىلعان ءىلياس دەمى شىقپاي قالعان جىگىتكە 7-8 مينۋت بويىنا رەانيماتسيالىق كومەك كورسەتكەن.
- سۋعا باتقان ادامدى قۇتقارۋ كەزىندە ءاربىر مينۋت قىمبات. ەگەر بىردەن كومەك كورسەتپەي, 3-4 مينۋت جوعالتىپ الساڭىز, وندا ميعا, جالپى اعزاعا قان بارماي قالادى. جۇرەككە ماسساج جاساۋ ارقىلى جۇرەك سوعىسىن قالپىنا كەلتىرگەن سوڭ ەسىن جيدى. جەدەل جاردەم كولىگى كەلگەن سوڭ قاجەتتى ەم-شارا قولدانىپ, وبلىستىق اۋرۋحاناعا جەتكىزىلدى, - دەيدى وبلىستىق اۋرۋحانانىڭ رەانيماتولوگ-انەستەزيولوگ دارىگەرى ءىلياس نۇسىپاليەۆ.