تۇلا بويى كرەاتيۆكە تولى جاستار ءبىزدىڭ ەلدە كوپ. ستارتاپ جوبالار ۇسىنىپ, جەكە كاسىبىن باستاپ, ول كاسىبىنەن ءناسىپ تاۋىپ جۇرگەندەر جەتىپ-ارتىلادى. قازاقستاندا جاستار جىلىن وتكىزۋگە قاتىستى جول كارتاسى اياسىندا ءوتىپ جاتقان «Zeren-2019» جازعى لاگەرى وسىنداي جاستاردىڭ يدەياسىن قولداپ, بيزنەس جوبالارىنىڭ جۇزەگە اسۋىنا كومەك قولىن سوزادى.
بۇل تانىمدىق جازعى لاگەر اقپارات جانە قوعامدىق دامۋ ءمينيسترلىگىنىڭ ۇيىتقى بولۋىمەن وسىمەن ەكىنشى جىل ۇيىمداستىرىلىپ وتىر. بۇل جولى لاگەرگە قازاقستان جاستارىنان بولەك رەسەي, قىتاي جانە موڭعوليا جاستارى دا قاتىستى. جالپى, جوباعا قاتىسۋشىلاردان 1000-نان اسا ءوتىنىم كەلىپ ءتۇستى. شارانىڭ ءۇش ماۋسىمى بويىنشا 18-29 جاس ارالىعىندا 600 قاتىسۋشى ىرىكتەلدى. العاشقى ماۋسىمعا 200 تالاپكەر قاتىسىپ, 36 كوماندالىق جوبا ۇسىنىلدى. ونىڭ قورىتىندىسى بويىنشا 5 بيزنەس-يدەيا ۇزدىك دەپ تانىلىپ, ولاردى پرەمەر-ءمينيستردىڭ ورىنباسارى گۇلشارا ابدىقالىقوۆا ماراپاتتادى. جۇلدەلى 3-ورىن العان ەكى توپقا 750 مىڭ تەڭگەدەن بەرىلسە, 2-ورىن العان ەكى كومانداعا 1 ملن تەڭگەدەن ۇلەستىرىلدى. ال ءبىرىنشى ورىن العان قىزىلوردالىق توپقا 1 500 000 تەڭگەنىڭ سەرتيفيكاتى تابىستالدى. بۇدان بولەك, جاستار جوبالارى دەمەۋشىلەر تاراپىنان 1 ملن تەڭگە كولەمىندە قوسىمشا قارجىلاندىرىلدى.
جەڭىمپاز «Red Orda» توبىنىڭ مۇشەسى نۇرجان اماندىقتىڭ ايتۋىنشا, جۇلدە تولىعىمەن جوبانىڭ جۇزەگە اسىرىلۋىنا جۇمسالادى. بۇل توپ «جوڭىشقا – تابيعي تىڭايتقىش» تاقىرىبىندا جوبا ۇسىنعان. ولار قىزىلوردا جەرىندە ءوسىپ جاتقان جوڭىشقانىڭ باسقا وڭىرلەردە دە ءوسىرىلۋىن العا تارتىپ, ەلىمىزدەگى جاسىل ەكونوميكانى دامىتۋدى كوزدەپ وتىر. جوبا جۇمىسى قازاقستان جەرىن قالاي تىڭايتۋعا بولادى, ول ءۇشىن قانشا شىعىن قاجەت, ناقتى قانشا پايدا اكەلەدى دەگەن سىندى سۇراقتارعا جاۋاپ قاراستىرعان. جەردى تىڭايتىپ, كەلەر جىلى كۇرىش, بيداي, قاۋىن, قاربىز ەگۋ جۇمىستارىن دامىتساق, ءبىزدىڭ ماقساتتىڭ ورىندالعانى دەيدى جەڭىمپاز توپ.
«بىزگە ۇزدىك مەنتورلار مەن ترەنەرلەر ءدارىس وقىدى. ساباقتاردان بولەك موتيۆاتسيالىق ترەنينگتەر مەن سپورتتىق سايىستار دا ءوتتى. سونداي-اق بۇل لاگەردەن جاقسى دوستار تاپتىق. رەسەي, قىتاي جانە موڭعوليادان كەلگەن قاتىسۋشىلاردان دا ۇيرەنەرىمىز كوپ بولدى. ءبىز, «Red Orda» توبى, جاسىل ەكونوميكا باعىتى بويىنشا جوبا قورعادىق. بىزدەن بولەك وزگە كوماندالار ءارتۇرلى تاقىرىپتا جوبالار ۇسىندى. ولاردىڭ ىشىندە ازاماتتىق قوعام, جەكە كاسىپكەرلىك, كرەاتيۆتى ەكونوميكا جانە جاڭا مەديا سىندى ءتۇرلى باعىتتا مىقتى جوبالار بولدى. «Zeren» جاستار تانىمدىق لاگەرى – كىل مىقتىلاردىڭ تىڭ يدەيالارى توعىسقان ورتا دەر ەدىم» دەدى قىزىلوردا وبلىسى جالاعاش اۋدانى جاستار رەسۋرستىق ورتالىعىنىڭ كەڭەسشىسى نۇرجان اماندىق.
ۇيىمداستىرۋشىلاردىڭ ايتۋىنشا, كەلەر جىلى جوبا جەڭىمپازدارى قايتا كەزدەسەدى. ولار ول كەزدەسۋدە جۇزەگە اسقان جوبالارى جايىندا اڭگىمە وربىتەدى. لاگەردەگى ءۇش اۋىسىمنىڭ قورىتىندىسى بويىنشا ۇزدىك 30 جوبا قارجىلاندىرىلادى. جالپى جۇلدە قورى – 15 ملن تەڭگە.