Forbes جۋرنالى 2019 جىلى ەڭ كوپ قارجى تولەنگەن سپورتشىلاردىڭ ءتىزىمىن جاريالادى دەپ حابارلايدى كاسىپقوي بوكس جاڭالىقتار پورتالىنىڭ Instagram-داعى پاراقشاسى.
تىزىمگە قازاقستاندىق تانىمال بوكسشى گەننادي گولوۆكين ەنگەن.
«GGG-ءدىڭ بيىل تاپقان جالپى تابىسى 25,5 ملن دوللاردان اسىپ ۇلگەردى. ونىڭ 23,5 ملن دوللارى - روللسپەن ايقاسى ءۇشىن گونورار, ال 2 ملن دوللار - دەمەۋشىلىك كەلىسىمشارتتاردان تۇسكەن. Forbes رەيتينگىندە گولوۆكين 95-ورىنعا تۇراقتاعان جانە پوستكەڭەستىك ەلدەر اراسىندا تىزىمگە ەنگەن جالعىز سپورتشى اتاندى» دەلىنگەن جازبادا.
ەسكە سالا كەتسەك, كانادالىق بوكسشى ستيۆ روللسپەن كەزدەسۋ گولوۆكين ءۇشىن Dazn الاڭىنداعى العاشقى ايقاس بولدى. Dazn-مەن كەلىسىمشارت اياسىندا 100 ملن دوللارعا باعالانعان تاعى بەس كەزدەسۋ جوسپارلانىپ وتىر.