2019 جىلعى 9 شىلدەدەگى جاعداي بويىنشا تۇركىستان وبلىسىنىڭ ارىس قالاسىندا 434 ۇيگە قالپىنا كەلتىرۋ جۇمىستارى جۇرگىزىلدى. اۋقىمدى جۇمىستارعا تاعى 41 قۇرىلىس كومپانياسى قوسىلدى. بۇگىنگى تاڭدا تۇرعىن ۇيلەردى قالپىنا كەلتىرۋ جۇمىستارىنا 191 ۇيىم تارتىلعان.
يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتتەرىنشە, قازىر 4 مىڭنان استام قۇرىلىسشى جانە 185 بىرلىك ارنايى تەحنيكا 2642 جەكە تۇرعىن ءۇي قۇرىلىسى نىساندارى مەن كوپقاباتتى تۇرعىن ۇيلەردى قالپىنا كەلتىرىپ جاتىر.
ەسكە سالايىق, ارىس قالاسى 17 سەكتورعا ءبولىنىپ, ءاربىر وڭىرگە جانە رەسپۋبليكالىق ماڭىزى بار قالاعا بەكىتىلگەن بولاتىن. 2019 جىلى 6 شىلدە كۇنى قر پرەمەر-ءمينيسترىنىڭ ورىنسباسارى جەڭىس قاسىمبەك يندۋستريا جانە ينفراقۇرىلىمدىق دامۋ ۆيتسە-ءمينيسترى قايىربەك وسكەنباەۆتىڭ, تۇركىستان وبلىسىنىڭ اكىمى ومىرزاق شوكەەۆتىڭ, اكىمدىكتەردىڭ وكىلدەرىنىڭ قاتىسۋىمەن كەڭەس وتكىزىپ, جاۋاپتى تۇلعالاردان قالانى قالپىنا كەلتىرۋ جۇمىستارىن جەدەلدەتۋدى سۇرادى.
ەلباسى جانە مەملەكەت باسشىسىنىڭ تاپسىرماسى بويىنشا بارلىق زاقىمدانعان جانە قيراعان نىساندار 2019 جىلدىڭ 1 تامىزىنا دەيىن تاپسىرىلۋى كەرەك. قر يندۋستريا جانە ينفراقۇرىلىمدىق دامۋ ۆيتسە-ءمينيسترى قايىربەك وسكەنباەۆتىڭ ايتۋىنشا, كۇن سايىن ۇيلەرگە مونيتورينگ جاسالىپ, قۇرىلىس بارىسىنا باقىلاۋ جۇرگىزىلەدى.