قىزىلجار – وبلىس ورتالىعىنا ەڭ جاقىن ورنالاسقان اۋدانداردىڭ ءبىرى. تۇرعىندار سانى 44 مىڭنان اسىپ جىعىلادى. وسى سەبەپتى قاداعالاۋشى ورگان وكىلدەرى يگىلىكتى شارانى وسى اۋداننان باستاۋدى ءجون كورگەن. قوعامدىق قابىلداۋلاردا زاڭنامالاردى تۇسىندىرۋگە, ازاماتتاردىڭ قۇقىقتىق مادەنيەت دەڭگەيىن ارتتىرۋعا, شەتىن پروبلەمالارىن شەشۋگە جاردەمدەسۋ باستى ماقسات بولدى.
«19 اۋىلدىق وكرۋگتىڭ 72 ەلدى مەكەنىندە پروكۋرورلار جۇمىس ىستەۋدە. كەز كەلگەن تۇرعىن كومەككە جۇگىنە الادى. كەي ماسەلەلەر ءجىتى زەرتتەۋدى تالاپ ەتەدى. قالاي دەسەك تە مىندەتتى تۇردە شەشىمىن تاباتىن بولادى. بىردە-ءبىر ءوتىنىش جاۋاپسىز قالمايدى», دەدى وبلىس پروكۋرورى باعبان تايىمبەتوۆ كىرىسپە سوزىندە.
جيىندا بيزنەسمەندەردىڭ جۇمىسىندا ءجيى كەزدەسەتىن قيىندىقتار مەن تۇيتكىلدەر دە كەڭىنەن قاراستىرىلدى. «زاڭ جانە كاسىپكەر» كەڭەسىنىڭ وكىلدەرى بىرقاتار ساۋالدارعا جاۋاپ بەردى. جەكەلەگەن ازاماتتار كاسىپكەرلىكپەن اينالىسقىسى كەلگەنىمەن, بيۋروكراتتىق كەدەرگىلەر مەن قاعازباستىلىق از كەزدەسپەيتىن كورىنەدى. ولاردىڭ بىرقاتارىن اۋداندىق كاسىپكەرلەر پالاتاسىنىڭ ديرەكتورى اسقار نۇرمۇقانوۆ ايتىپ بەردى. ونىڭ سوزىنە قاراعاندا, شاعىن جانە ورتا بيزنەس سۋبەكتىلەرى «مونوپوليست» پورتالىنىڭ ءجوندى جۇمىس ىستەمەيتىنىنە شاعىمدانادى. مۇنداي تەحنيكالىق اقاۋلار ءجيى ورىن الاتىنىن تابيعي مونوپوليالاردى رەتتەۋ, باسەكەلەستىكتى جانە تۇتىنۋشىلاردىڭ قۇقىقتارىن قورعاۋ دەپارتامەنتىنىڭ باسشىسى جاندوس ەرماعامبەتوۆ مويىندادى. ءوڭىر پروكۋرورى بۇگىنگىدەي اقپاراتتاندىرۋ زامانىندا جۇمىستى باسەڭدەتپەۋدىڭ ماڭىزىن اتاپ كورسەتىپ, ماسەلەنى تەز ارادا شەشۋدى تاپسىردى.
القالى باسقوسۋدا «قازسۋشار» كاسىپورنى سوڭعى 4 جىلدىڭ ىشىندە سۋدىڭ باعاسىن 20 ەسە وسىرگەنى وتكىر سىن تەزىنە الىندى. ونىڭ ءبىر ۇشىعى فەرما جانە شارۋا قوجالىقتارىنا بوساتىلاتىن سۋدى سۋبسيديالاۋدىڭ دوعارىلۋىنا كەلىپ تىرەلەدى. ءسويتىپ سۋدىڭ ءبىر تەكشە مەترىنىڭ باعاسى 760 تەڭگەگە جەتىپ, اسپانداپ شىعا كەلگەن.
«تىرشىلىك كوزىنىڭ بۇگىن – 5, ەرتەڭ 10 تەڭگەگە وسۋىمەن ەش كەلىسۋگە بولمايدى. مەنىڭشە, سۋدى سۋبسيديالاۋدى قايتا قاراستىرۋ قاجەت. وسىلايشا تىكەلەي شارۋاشىلىقپەن اينالىساتىن بيزنەسمەندەرگە قولداۋ كورسەتۋىمىز كەرەك», دەدى وبلىس پروكۋرورى.
سولتۇستىك قازاقستان وبلىسى