شاراعا ورال قالاسىندا تۇراتىن بەلگىلى دومبىراشى, قازاق كۇي ونەرىنىڭ التىن قورىنا بىرنەشە شىعارمانى جەتكىزىپ, جازىپ قالدىرعان وتەگەن جۇماشەۆ, ارداگەر كۇيشى, دومبىراشى ۇلمەكەن باتىروۆا, «قۇرمەت» وردەنىنىڭ يەگەرى, قازاقستاننىڭ ەڭبەك سىڭىرگەن مادەنيەت قىزمەتكەرى, داۋلەسكەر كۇيشى ەرمەك قازيەۆ, كۇيشى-دومبىراشى, ءارى دومبىرا جاساۋشى شەبەر ەدىگە نابيەۆ سەكىلدى بەلگىلى ونەر تۇلعالارى قاتىستى. مەرەكەگە قاتىسۋشىلار «ناعىز قازاق – قازاق ەمەس, ناعىز قازاق – دومبىرا!» دەگەن قاناتتى ءسوزدىڭ اۆتورى, اقىن قادىر مىرزا ءاليدىڭ ەسكەرتكىشىنە گۇل شوعىن قويدى.
ۇلتتىق دومبىرا كۇنى مەرەكەسىنە وراي بۇل كۇنى باتىسقازاقستاندىق ارداگەر دومبىراشىلار ۇلمەكەن باتىروۆا, تولەگەن قايىرعاليەۆ, جاعىپار وتەحاەۆ, ناۋرىز باتىروۆ, دومبىراشى ۇستازدار اسقار قۇسايىنوۆ, نۇرجان سەرتەكوۆ, گۇلنار نىعمەتوۆا, حالەل ساپاروۆ, گۇلبار شۋاقباەۆا, مەرەكە تۇياقوۆ, ەربول عۇبايدۋللين, نۇرسۇلۋ باقتىگەرەەۆا, ەرماك مولدابەكوۆ, اسىلحان قازيەۆ, اڭسار بەردىعاليەۆ, جەڭىس وتەۋوۆ, سەرىك جاقىباليەۆ, ارداگەر قوبىزشى مەرەكە حايىروۆا, سۆەتلانا قاريەۆا, قاليا مۇزافاروۆا, قوبىزشى, عاريفوللا قۇرمانعاليەۆ اتىنداعى باتىس قازاقستان وبلىستىق فيلارمونياسىنىڭ ءارتيسى ءجاميلا نۇرىمبەتوۆا, جالپاقتال ساز مەكتەبىنىڭ سىبىزعىشى ۇستازى حاليوللا ناعيەۆ قازاقستان كۇيشىلەر وداعى توراعاسىنىڭ رۇستەم نۇركەنوۆتىڭ قولى قويىلعان قۇرمەت گراموتاسىمەن جانە العىس حاتىمەن ماراپاتتالدى. «كۇيشىلەر وداعى» بقو فيليالىنىڭ توراعاسى اسقار كەنجەعاليەۆ وتەگەن جۇماشەۆ, ۇلمەكەن باتىروۆا جانە ەرمەك قازيەۆ قازاقستان كۇيشىلەر وداعىنا «قۇرمەتتى مۇشە» بولىپ قابىلدانعانىن جاريالاپ, ارنايى كۋالىك تابىس ەتتى. ارداگەرلەرگە ەرەكشە قۇرمەت كورسەتىلىپ, يىعىنا شاپان جابىلدى. ايتا كەتەيىك, ءدال وسىنداي قۇرمەت وسىدان بىرنەشە كۇن بۇرىن جەكە كونتسەرتىن وتكىزگەن كۇيشى-دومبىراشى ەدىگە نابيەۆ اعامىزعا دا كورسەتىلگەن بولاتىن.
بۇگىنگى كۇننىڭ باستى جاڭالىعى – قادىر ورتالىعىنان دەربەس كۇي بولمەسى اشىلۋى بولدى. ونىڭ لەنتاسىن باتىس قازاقستان وبلىستىق مادەنيەت باسقارماسىنىڭ باسشىسى قادىربولات مۇساعاليەۆ پەن كۇيشى ەرمەك قازيەۆ قيدى. قالي جانتىلەۋوۆتىڭ تۋعان جيەنى, دومبىراشى تولەگەن قايىرعالي ۇلى «كۇيشىلەر بولمەسىنەن» بولاشاقتا قۇرمانعازى, سەيتەك, دينا, داۋلەتكەرەي سەكىلدى داۋلەسكەر كۇيشىلەر شىعۋىن اللادان تىلەپ, اق باتاسىن بەرسە, ۇلمەكەن انامىز شاشۋ شاشتى.
- قادىر ورتالىعىنىڭ جەتەكشىسى باۋىرجان حاليوللانىڭ قولداۋىمەن بەرىلگەن بولمەمىزدى بارىنشا مازمۇندى بەزەندىرۋگە تىرىستىق. «ايدار» شارۋا قوجالىعىنىڭ جەتەكشىسى ايدار عافۋ ۇلى دەمەۋشى بولىپ, دومبىرا مەن قازاق كۇي ونەرىنىڭ تاريحىنا, جەرگىلىكتى كۇيشىلىك مەكتەپتەردىڭ ساباقتاستىعىنا ارنالعان بىرنەشە كورنەكىلىك تاقتا جاسادىق. ورالدىق دومبىرا جاساۋشى شەبەرلەردىڭ اعا بۋىنى سانالاتىن باقىتكەرەي سۇلەيمەنوۆ, ەدىگە نابيەۆ, سانسىزباي احمەتوۆ, اسىلان سەرىكباەۆتاردىڭ ونەرىن ناسيحاتتاۋعا دا كوڭىل بولدىك. دەگەنمەن, بۇگىنگى ەڭ باستى جاڭالىق – كۇي بولمەسىندە ورناتىلعان «ەلەكتروندى دومبىرا» بولدى. باتىس قازاقستان وبلىستىق بالالار تەحنيكالىق شىعارماشىلىعى ورتالىعىنىڭ «روبوتتىق تەحنيكا» ۇيىرمەسىنىڭ جەتەكشىسى مارس ماقسوت جاساعان بۇل دومبىرانىڭ ەرەكشەلىگى – شەگىنەن شەرتىپ قالساڭىز, كۇي توگىلە جونەلەدى. شاراعا قاتىسقان حالىقتىڭ ءبارى وسى ەلەكتروندى دومبىراعا قاتتى قىزىقتى, وزگە وڭىرلەردەن دە تاپسىرىس ءتۇسىپ جاتىر, - دەيدى اسقار كەنجەعاليەۆ.
اق جايىق وڭىرىندە ءبىراز جىلدان بەرى دومبىرا, كۇي ونەرىن دامىتۋ, تاريحي تۇلعالاردى دارىپتەۋ جولىندا قىزمەت ەتىپ, بەلگىلى ونەرپاز مۇحيت ايتقاليەۆ حاقىندا كىتاپ شىعارعان اسقار كەنجەعاليەۆ ەلىمىزدە ۇلتتىق دومبىرا كۇنى مەرەكەسى پايدا بولعانىنا ەرەكشە ريزا. «قازاق كۇيشىلەرى رەسپۋبليكالىق دەڭگەيدە قولداۋعا ءزارۋ» دەگەن اسقار مۇحامبەتقالي ۇلى ارداگەر كۇيشىلەردى قولداۋ, سابيلەرگە بالاباقشادان باستاپ دومبىرا الىپپەسىن ۇيرەتۋ سەكىلدى ناقتى ۇسىنىستارىن ايتىپ وتىر.
- ەلىمىزدە «قازاقستاننىڭ حالىق كۇيشىسى» دەگەن قۇرمەتتى اتاق تاعايىندالۋى ءتيىس. بۇل اتاققا يە بولعان ونەرپازدارىمىزعا ەلىمىزدىڭ ءار جەرىندە جىلىنا كەمىندە ءتورت مارتە جەكە كونتسەرتىن وتكىزۋگە جاعداي جاسالۋى ءتيىس. مەن بۇل ۇسىنىستى رەسپۋبليكالىق كۇيشىلەر وداعىنىڭ توراعاسى رۇستەم نۇركەنوۆكە جەتكىزدىم, - دەيدى فيليال توراعاسى.
ۇلتتىق دومبىرا كۇنى اشىلعان كۇي بولمەسىندە دومبىرا ۇيرەتۋ مەكتەبى جۇمىس ىستەيدى. سونداي-اق مۇندا دومبىرا, كۇي تاريحىنا, كۇيشىلەردىڭ ءومىرى مەن شىعارماشىلىعىنا ارنالعان تاربيە ساعاتتارى, تانىمدىق كەشتەر ۇيىمداستىرىلماق.