قازاقستان ەۋروپالىق وداق - ورتالىق ازيا فورماتىندا قارىم-قاتىناس قۇرالدارىن ءتيىمدى پايدالانۋعا, سونداي-اق وڭىرمەن ءوزارا ءىس-قيمىل جونىندەگى ەو-نىڭ جاڭا ستراتەگياسى اياسىندا وسىنداي ىنتىماقتاستىقتىڭ تۇتاستىعىن, ۆيزۋاليزاتسياسىن جانە كورنەكى قابىلداۋىن قامتاماسىز ەتۋگە كوڭىل ءبولۋدى ۇسىنۋدا. بۇل تۋرالى بۇگىن قىرعىزستاننىڭ استاناسىندا وتكەن «ەۋروپالىق وداق - ورتالىق ازيا» 15-ءشى جىل سايىنعى مينيسترلىك كونفەرەنتسياسىنىڭ شەڭبەرىندە قازاقستان رەسپۋبليكاسىنىڭ سىرتقى ىستەر ءمينيسترى بەيبىت اتامقۇلوۆ مالىمدەدى.
جىل سايىنعى فورۋمعا سونداي-اق قىرعىزستان, تاجىكستان, وزبەكستان سىرتقى ساياسي ۆەدومستۆولارىنىڭ باسشىلارى, تۇرىكمەنستان سىرتقى ىستەر ءمينيسترىنىڭ ورىنباسارى جانە ەۋروپالىق كوميسسيانىڭ ۆيتسە-پرەزيدەنتى – ەۋروپالىق وداقتىڭ سىرتقى ىستەر جانە قاۋىپسىزدىك ساياساتى جونىندەگى جوعارعى وكىلى فەدەريكا موگەريني قاتىستى.
كونفەرەنتسيانىڭ ورتالىق وقيعاسى ەو-نىڭ ورتالىق ازيا بويىنشا جاڭا ستراتەگياسىنىڭ رەسمي تۇساۋكەسەرى بولدى. ف. موگەريني ءوز سوزىندە ستراتەگيانىڭ نەگىزگى ەرەجەلەرىن ىسكە اسىرۋ ۇدەرىسى قالاي جانە قانداي نىساندا جۇرگىزىلەتىنىنە ەگجەي-تەگجەيلى توقتادى.
ءوز كەزەگىندە قر سىرتقى ىستەر ءمينيسترى ستراتەگيا ماتىنىنە جەكە كاسىپكەرلىكتى, شاعىن جانە ورتا بيزنەستى, كولىك-لوگيستيكالىق ينفراقۇرىلىمدى, ەنەرگيا تيىمدىلىگىن, قورشاعان ورتانى قورعاۋ, كليماتتىڭ وزگەرۋىنە قارسى كۇرەس, سۋ رەسۋرستارىن ءتيىمدى پايدالانۋ, ءبىلىم بەرۋ, تسيفرلاندىرۋ بويىنشا جانە ت.ب. قازاقستاندىق ۇسىنىستاردى ەنگىزۋدى قۇپتادى.
«قازاقستان ەو-نىڭ ەكى جاقتى جوبالارىن قازاقستانعا قايتارۋدىڭ ماڭىزدىلىعىن, سونداي-اق ەو-وا ءۇشىنشى ەلدەرمەن بىرلەسكەن باعدارلامالارىن ىسكە اسىرۋ مۇمكىندىگىن اتاپ وتەدى», - دەپ قازاقستاننىڭ ءسىم باسشىسى ءوز سوزىندە مالىمدەدى.
پىكىرتالاستار بارىسىندا كەزدەسۋگە قاتىسۋشىلار ەو-وا ىنتىماقتاستىعىنىڭ كۇن تارتىبىندەگى جانە ونى بىرلەسىپ ىسكە اسىرۋدىڭ نەگىزگى ماسەلەلەرى بويىنشا پىكىر الماستى. قازاقستاندىق دەلەگاتسيا وڭىرلىك جوبالاردى قارجىلاندىرۋ ءۇشىن ەو ينۆەستيتسيالىق تەتىگىنىڭ (IFCA) الەۋەتىن جانە ەۋروپالىق ينۆەستيتسيالىق بانكتىڭ (EIB) مۇمكىندىكتەرىن ىسكە قوسۋدى, سونداي-اق وسى فورماتتىڭ شەڭبەرىندە قابىلداناتىن ساياسي شەشىمدەردىڭ تيىمدىلىگىن جانە حالىق حاباردارلىعىن ارتتىرۋ ماقساتىندا ەو-وا ىنتىماقتاستىعىنىڭ «ۆيرتۋالدى ينستيتۋتسيونالدانۋىن» وتكىزۋدى ۇسىندى.
تاراپتاردىڭ جەكە نازارى وڭىرلىك قاۋىپسىزدىك ماسەلەلەرىنە, سونىڭ ىشىندە ەۋروپالىق وداقپەن بىرلەسكەن شەكارالاردى باسقارۋعا جاردەمدەسۋ باعدارلاماسىن (بومكا), ەسىرتكى جونىندەگى ءىس-قيمىل باعدارلاماسىن (كاداپ) جالعاستىرۋعا جانە كەڭەيتۋگە, سونداي-اق ورتالىق ازيا وڭىرلىك اقپاراتتىق ۇيلەستىرۋ ورتالىعى ء(واواۇو) جەلىسى بويىنشا ىنتىماقتاستىقتى جانداندىرۋعا ءبولىندى.
ءىس-شارانىڭ قورىتىندىسى بويىنشا سىرتقى ىستەر مينيسترلەرى جانە ەو جوعارعى وكىلى «ەو جانە ورتالىق ازيا: كۇشتى سەرىكتەستىكتى بىرگە قۇرا وتىرىپ» قورىتىندى كومميۋنيكەسىن قابىلدادى. ماتىندە ەو ورتالىق ازيا ەلدەرىنىڭ ۇلتتىق كۇشتەرىن قولداۋ, ءوڭىردىڭ الەمدىك ساۋدا جۇيەسىنە تابىستى كىرىگۋى جانە وڭىرىشىلىك ىنتىماقتاستىقتى ىلگەرىلەتۋ ءۇشىن ءوز ارسەنالىنداعى بارلىق قۇرالداردى ىسكە قوسۋعا نيەتتى ەكەندىگى ايتىلعان.
«قازاقستان جاڭا ستراتەگيادا ەو-وا قۇرالدارىن ءتيىمدى پايدالانۋعا, سونداي-اق ەو-وا ىنتىماقتاستىعىنىڭ تۇتاستىعى مەن كورنەكى قابىلداۋىنا جانە ۆيزۋاليزاتسيانى قامتاماسىز ەتۋگە كوڭىل ءبولۋدى ۇسىنادى», - دەدى قازاقستان ءسىم باسشىسى.
تاراپتار سونداي-اق 2019 جىلعى 5-6 شىلدەدە بىشكەكتە وتكەن مەملەكەتتىك جانە جەكە سەكتورلاردىڭ, ەو جانە وا ازاماتتىق قوعامىنىڭ ستراتەگيانى ىسكە اسىرۋعا جانە قاتىسۋىنا باعىتتالعان «ەۋروپالىق وداق-ورتالىق ازيا» ءبىرىنشى فورۋمىنىڭ وتكىزىلۋىن قولدادى.
تاراپتار وسىدان بۇرىن قازاقستان مەن باسقا مەملەكەتتەر تاراپىنان ەۋروپا جانە ورتالىق ازيا بيزنەسى اراسىنداعى پراكتيكالىق ءوزارا ءىس-قيمىلدى جولعا قويۋ ءۇشىن نەگىز بولاتىن «ەۋروپالىق وداق-ورتالىق ازيا» ەكونوميكالىق فورۋمىن قۇرۋ تۋرالى ۇسىنىستى قولدادى, سونىمەن قاتار قىرعىزستاننىڭ اتالمىش فورۋمنىڭ العاشقى وتىرىسىن وتكىزۋ نيەتىن قۇپتادى.
كومميۋنيكەدە ف. موگەرينيدىڭ ەو سىرتقى ساياساتىنىڭ باسشىسى رەتىندە ەۋروپالىق وداق پەن ورتالىق ازيا اراسىنداعى قارىم-قاتىناستاردىڭ نىعايۋىنداعى ءرولى ەرەكشە اتالىپ ءوتىلدى.
كەلەسى ەۋروپالىق وداق-ورتالىق ازيا مينيسترلىك كەزدەسۋى 2020 جىلى بريۋسسەلدە وتەدى دەپ كۇتىلۋدە.