بۇل تۋرالى اقوردانىڭ ءباسپاسوز قىزمەتى حابارلادى.
مەملەكەت باسشىسى نۇر-سۇلتان قالاسىنىڭ باس الاڭىندا بيىل ەكىنشى رەت ۇيىمداستىرىلىپ وتىرعان ۇلتتىق دومبىرا كۇنىنە ارنالعان سالتاناتتى جيىنعا قاتىستى. قاسىم-جومارت توقاەۆ ەلوردا تۇرعىندارى مەن قوناقتارى الدىندا سويلەگەن سوزىندە بارشا قازاقستاندىقتاردى ۇلتتىق دومبىرا كۇنىمەن قۇتتىقتاپ, بۇل مەيرامدى رۋحانياتقا دەگەن زور قۇرمەت, بارشامىزعا ورتاق قۇندىلىقتى ۇلىقتاۋ دەپ ءتۇسىنۋ كەرەك ەكەنىن ايتتى.
– قازاق پەن دومبىرا – ەگىز ۇعىم. كۇمبىرلەگەن دومبىرانىڭ ءۇنى باتىرلارىمىزعا رۋح, اقىندارىمىزعا شابىت بەرگەن. دومبىرا ءاربىر قازاقتىڭ رۋحىن كوككە كوتەرەتىن قۇندى قازىنامىز بولۋعا ءتيىس, – دەدى قازاقستان پرەزيدەنتى.
مەملەكەت باسشىسى ۇلتتىق دومبىرا مەرەكەسى جاس ۇرپاقتىڭ ءداستۇرلى ونەرگە دەگەن قۇرمەتىن ارتتىراتىنىنا سەنىم ءبىلدىردى.
– «سارىارقا», «بالبىراۋىن», «اداي», «القيسسا» كۇيلەرى – ۇلتتىق رۋحىمىزدى كوتەرەتىن تاڭعاجايىپ تۋىندىلار. دومبىرانىڭ پەرنەسىنەن شىققان كۇيدە حالقىمىزدىڭ تەرەڭ تاريحى بار. ءبىز اتادان بالاعا امانات بولعان اسىل مۇرامىزدى ساقتاپ, قادىر تۇتۋىمىز قاجەت, – دەدى قاسىم-جومارت توقاەۆ.
قازاقستان پرەزيدەنتى بۇگىندە دومبىرا بۇكىل قازاقستان حالقىن بىرىكتىرەتىن تەڭدەسى جوق مادەني مۇرا سانالاتىنىن جانە رۋحاني جاڭعىرۋ جولىنىڭ نەگىزگى ارقاۋى ەكەنىن اتاپ ءوتتى. سوندىقتان, بۇل ۇلتتىق ونەردى كەڭىرەك ناسيحاتتاۋعا شاقىردى.
– «ونەر – ۇلت كەلبەتى» دەيدى دانا حالقىمىز. بارشامىزعا ورتاق قۇندىلىق – دومبىرانى جان-جاقتى ناسيحاتتاپ, جاس ۇرپاقتىڭ ساناسىنا ءسىڭىرۋ وتە ماڭىزدى. دومبىرا اسپابى – قايتالانباس اسىل دۇنيە. سوندىقتان, مەكتەپتە دومبىرا ۇيرەنۋ ساباقتارىن ەنگىزۋ – قاجەتتى ءارى دۇرىس باستاما. سەبەبى, قازىرگى جاپپاي جاھاندانۋ ۋاقىتىندا حالقىمىزعا ءتان بىرەگەي قۇندىلىقتاردى جاڭعىرتا بەرۋىمىز قاجەت, – دەدى مەملەكەت باسشىسى.
ءسوز سوڭىندا قازاقستان پرەزيدەنتى ءتول مادەنيەتىمىزگە دەگەن قامقورلىق ارقاشان مەملەكەتتىڭ ايرىقشا نازارىندا بولاتىنىن ايتتى.
«قازاق ەلى» مونۋمەنتى الاڭىندا وتكەن ۇلتتىق رۋحانياتىمىزدى دارىپتەيتىن كونتسەرت بارىسىندا مىڭنان استام ونەرپاز ءبىر وركەستردەي دومبىرامەن قازاقتىڭ بەلگىلى كۇيلەرىن ورىندادى.