«قازاق ەلى» مونۋمەنتىنىڭ الدىنداعى الاڭداعى ساحنادا ءبىر مىڭنان استام دومبىراشى «سارىارقا», «اداي», «القيسسا», «كوڭىل تولقىنى», «بالبىراۋىن» جانە «كورەع ۇلى» كۇيلەرىن ورىنداپ جاتىر.
سونىمەن قاتار, «جاستار» تەاترىنىڭ اكتەرلەرى تاريحي قويىلىمىن ۇسىنادى, ەلوردالىق مۋزىكا مەكتەپتەرىنىڭ شاكىرتتەرى ونەرلەرىن ورتاعا سالادى, اقىندار ايتىسى وتەدى. سۋىرىپ سالما ولەڭگە ىسىلعان جاندار ۇلتتىق مۋزىكالىق اسپابىمىز - دومبىرانى جىرعا قوسادى.
«قازاق ەلى» مونۋمەنتىنىڭ الدىنداعى الاڭدا كيىز ۇيلەر تىگىلىپ, قازاق اۋىلى ورىن تەپكەن. كەلۋشىلەر دومبىرانىڭ جانە باسقا دا ۇلتتىق اسپاپتاردىڭ ءتۇر-تۇرىمەن تانىسۋعا مۇمكىندىكتەرى بار. مەرەكە كەشكە ەسىل وزەنىنىڭ جاعاسىنداعى امفيتەاتردا «ناعىز قازاق - دومبىرا» كونتسەرتىمەن جالعاسادى. ساحنا تورىندە قازاق وركەسترى, نۇر-سۇلتان قالاسى اكىمدىگى مەملەكەتتىك اكادەميالىق فيلارمونياسىنىڭ سوليستەرى مەن ۆوكاليستەرى ونەر كورسەتەدى. كونتسەرتتىڭ باستالۋى - ساعات 18.00-دە. كىرۋ - تەگىن.
ايتا كەتەيىك, بىلتىر ەلباسىمىز نۇرسۇلتان نازارباەۆتىڭ شەشىمىمەن شىلدەنىڭ ءبىرىنشى جەكسەنبىسى ۇلتتىق دومبىرا كۇنى بولىپ جاريالاندى.