قازىر بەينەباقىلاۋ كامەرالارى ەشكىمگە تاڭسىق ەمەس. قالا كوشەلەرىندە, عيمارات ىشىندە باقىلاۋ كامەراسى ءومىرىمىزدىڭ اجىراماس بولشەگىنە اينالىپ كەتكەنىمەن, بىرنەشە ەلدىمەكەننەن تۇراتىن ۇلكەن اۋداندى ءبىر ورتالىقتان قاداعالاي الاتىن مۇنداي جۇيە بىزدە جوق ەدى. ەندى مىنە, زاماناۋي تەحنولوگيا اۋىلعا دا جەتتى.
- بەينەباقىلاۋ كامەرالارى كوپشىلىك ويلاعانداي ايىپپۇل سالۋ, جازالاۋ قۇرالى ەمەس. ولار ەڭ الدىمەن قوعامدىق ءتارتىپتى ساقتاۋ, قاۋىپسىزدىكتى قامتاماسىز ەتۋ ىسىندە پروفيلاكتيكالىق ىقپالعا يە. جاڭا جوبا بويىنشا ورناتىلعان كامەرالار بايتەرەك اۋدانىنىڭ ورتالىعى – پەرەمەتنىي سەلوسىنان بولەك, ميچۋرين, اسان, داريان, كالينين, ۇلكەن شاعان جانە كوشىم سەكىلدى ءىرى-ءىرى التى ەلدىمەكەنىن قامتيدى. «Sunkar smart sity» جۇيەسىنىڭ باسقارۋ ءپۋلتى پەرەمەتنىيدا ورناتىلعان. وسى ورتالىققا بارلىق ەلدىمەكەننەن اقپارات ءتۇسىپ وتىرادى. وپەراتور قاجەتتى جاعدايعا وراي ءتيىستى ايماقتى ونلاين باقىلاي الادى. ءبىر ەرەكشەلىگى – ءار نۇكتەدە ەكى كامەرا ورناتىلعان, ونىڭ ءبىرىن وپەراتور كەز كەلگەن باعىتقا بۇرىپ قاراي الادى, ال ەكىنشى كامەرا تۇراقتى بولادى. بۇل باقىلاۋ ايماعىنان ەشتەڭە دە تىس قالمايدى دەگەن ءسوز, - دەيدى جوبانى جۇزەگە اسىرۋشى «ەلايتس» جشس-نىڭ تەحنيكالىق ديرەكتورى الەكساندر مولچانوۆ.
ا.مولچانوۆتىڭ ايتۋىنشا, «ەلايتس» جشس كوپ جىلدان بەرى كۇزەت فۋنكتسياسىمەن, بەينەباقىلاۋ قوندىرعىلارىن جەتىلدىرۋمەن اينالىسىپ كەلەدى ەكەن. سوندىقتان دا كومپانيا الەمدىك باقىلاۋ كامەرالارىنىڭ ەڭ جاقسى قاسيەتتەرىن الىپ, بىرىكتىرگەن. ونىڭ ۇستىنە كومپانيا بايتەرەك اۋدانى اكىمدىگىمەن ارادا جاسالعان كەلىسىم شارتقا سايكەس «Sunkar smart sity» جۇيەسىنە ءۇش جىل بويى قىزمەت كورسەتىپ, جەتىلدىرىپ وتىرماق.
- جاڭا جۇيەنىڭ تيىمدىلىگىن مىنادان-اق اڭعارۋعا بولادى: باعدارلاما ءالى تولىق ىسكە قوسىلىپ ۇلگەمەگەن ەكى اپتا ىشىندە وسى كامەرالاردىڭ كومەگىمەن ءۇش اۋىر قىلمىس اشىلدى. ونىڭ ۇشەۋى دە جەكە تۇلعانىڭ مۇلكىن زاڭسىز يەمدەنۋگە بايلانىستى زاڭبۇزۋشىلىق, - دەيدى باتىس قازاقستان وبلىستىق پوليتسيا دەپارتامەنتى باستىعىنىڭ مىندەتىن اتقارۋشى سەرىك سۇيىنباەۆ. ونىڭ ايتۋىنشا, بۇگىندە ورال قالاسىندا جەدەل باسقارۋ ورتالىعىنىڭ (جبو) 97 كامەراسى جۇمىس ىستەپ تۇر. «قاۋىپسىز اۋلا» جۇيەسى بويىنشا 346 كامەرا ورناتىلعان. سونداي-اق وبلىستىڭ ءار اۋدانىندا جبو-عا قاراستى باقىلاۋ جۇيەسى, بارلىعى 148 كامەرا بار. بيىل جىل باسىنان بەرى وسى كامەرالاردىڭ كومەگىمەن پوليتسيا 48 قىلمىستى ءىزىن سۋىتپاي اشىپتى. ونىڭ ىشىندە 13 توناۋ, 15 بۇزاقىلىق فاكتىسى بار.
قازىرگى تاڭدا بايتەرەك اۋداندىق پوليتسيا ءبولىمىنىڭ 15 قىزمەتكەرى «Sunkar smart sity» جۇيەسىن پايدالانۋعا وقىپ ۇيرەنىپ جاتىر. بولاشاقتا بايتەرەك اۋدانى تاجىريبەسىنىڭ تيىمدىلىگىن وزگە اۋداندار كورسە, «Sunkar smart sity» جوباسى وزگە اۋداندارعا دا تاراۋى مۇمكىن.
- ءبىز ۇسىنىپ وتىرعان جوبادا قارجىنىڭ قوماقتى بولىگى وپتيكالىق-تالشىقتى كابەل جۇيەسىن تارتۋعا كەتەدى. بىراق ول جۇيەنى كەيىن باسقا دا ءتۇرلى ماقساتقا پايدالانۋعا, مىسالى جوعارى جىلدامدىقتى ينتەرنەت قىزمەتىن تاراتۋعا, بايلانىس جۇيەسىن دامىتۋعا, باسقا دا جۇمىستارعا پايدالانۋعا بولادى. وسى ارقىلى جوبانىڭ وزىندىك قۇنىن تومەندەتىپ, الىس اۋىلداردىڭ كوپتەگەن ماسەلەسىن شەشۋگە بولار ەدى. بولاشاقتا «Sunkar smart sity» جوباسىنا باسقا اۋداندار دا قوسىلىپ جاتسا, بىرىڭعاي وبلىستىق باقىلاۋ جۇيەسى قۇرىلۋى مۇمكىن. وسىلايشا, بولاشاقتا جبو-دا وتىرعان كەزەكشى ينسپەكتور ينتەراكتيۆتى كارتادان ءوزى قاجەت ەتكەن اۋدان مەن اۋىلدى جانە وندا قويىلعان كامەرانى تاڭداپ, ول جەردە بولىپ جاتقان وقيعانى ونلاين رەجيمدە باقىلاي الادى,– - دەيدى الەكساندر مولچانوۆ.
سۋرەتتى تۇسىرگەن تەمىربولات توقمامبەتوۆ
باتىس قازاقستان