سەيسەنبى, 4 ماۋسىم 2013 2:43
قازاقستاننىڭ قۇقىق قورعاۋ ورگاندارى قازىر مۇحتار ءابىلازوۆتىڭ بتا بانك قارجىلارىن ۇرلاۋ, ۇيىمداسقان قىلمىستىق توپ قۇرىپ, وعان باسشىلىق جاساۋ, قىلمىستىق جولمەن الىنعان تابىستاردى جاسىرىپ, ونى سىرتقا اسىرىپ جىبەرۋ جانە بانك قاراجاتىن زاڭسىز پايدالانۋ فاكتىلەرى بويىنشا قىلمىستىق ىستەردى تەرگەۋدى جالعاستىرىپ جاتىر. بۇل تۋرالى كەشە باس پروكۋراتۋرانىڭ رەسمي وكىلى نۇرداۋلەت سۇيىندىكوۆ ورتالىق كوممۋنيكاتسيالار قىزمەتىندە سويلەگەن سوزىندە اتاپ ءوتتى.
سەيسەنبى, 4 ماۋسىم 2013 2:43
قازاقستاننىڭ قۇقىق قورعاۋ ورگاندارى قازىر مۇحتار ءابىلازوۆتىڭ بتا بانك قارجىلارىن ۇرلاۋ, ۇيىمداسقان قىلمىستىق توپ قۇرىپ, وعان باسشىلىق جاساۋ, قىلمىستىق جولمەن الىنعان تابىستاردى جاسىرىپ, ونى سىرتقا اسىرىپ جىبەرۋ جانە بانك قاراجاتىن زاڭسىز پايدالانۋ فاكتىلەرى بويىنشا قىلمىستىق ىستەردى تەرگەۋدى جالعاستىرىپ جاتىر. بۇل تۋرالى كەشە باس پروكۋراتۋرانىڭ رەسمي وكىلى نۇرداۋلەت سۇيىندىكوۆ ورتالىق كوممۋنيكاتسيالار قىزمەتىندە سويلەگەن سوزىندە اتاپ ءوتتى.
2009 جىلعى 6 ناۋرىزدا ابىلازوۆكە حالىقارالىق ىزدەۋ جاريالاندى. بۇدان بولەك, وعان رەسەي فەدەراتسياسى مەن ۋكراينانىڭ قۇقىق قورعاۋ ورگاندارى دا ءوز ەلدەرىنە قاتىستى بىرقاتار اۋىر قىلمىستار جاساعانى ءۇشىن ونى ىزدەستىرە باستادى.
2012 جىلعى اقپاندا ۇلىبريتانيادا لوندون جوعارى سوتىنىڭ شەشىمىمەن سوتتى سىيلاماعانى ءۇشىن ابىلازوۆكە 22 اي مەرزىمگە تۇرمەگە وتىرۋ جازاسى كەسىلگەن. الايدا, ول انگليانىڭ سوت تورەلىگىن ورىنداۋدان قاشىپ كەتتى.
ۇستىمىزدەگى جىلعى مامىردىڭ 28-نەن 29-نا قاراعان تۇندە يتاليا پوليتسياسىنىڭ ريم قالاسى ماڭىنداعى بولجامدى تۇرىپ جاتقان جەرىندە ءابىلازوۆتى انىقتاۋ مەن ۇستاۋ بويىنشا شارالار كەزىندە ونىڭ زايىبى الما شالاباەۆا مەن كامەلەتكە تولماعان قىزى الۋا ءابىلازوۆا تابىلدى.
تەكسەرىس بارىسىندا پوليتسيا شالاباەۆانىڭ يتاليا اۋماعىندا ورتالىق افريكا رەسپۋبليكاسىنىڭ «ايان المانىڭ» اتىنا بەرگەن كورىنەۋ جالعاندىق بەلگىلەرى بار پاسپورتپەن جۇرگەنىن انىقتادى.
ساراپتاما ناتيجەلەرى پاسپورتتىڭ جالعان ەكەنىن انىقتادى. بۇل يتاليادا قىلمىستىق تۇرعىدا جازالاناتىن ارەكەت بولىپ تابىلادى.
الما شالاباەۆانىڭ ءوز سوزدەرىنەن قازاقستاندىق ازاماتشا ەكەنى انىقتالىپ, قازاقستان رەسپۋبليكاسىنىڭ يتالياداعى ەلشىلىگى جەرگىلىكتى قۇقىق قورعاۋ ورگاندارىنىڭ ساۋالى بويىنشا ونى راستاعاننان كەيىن, يتاليا بيلىگى شالاباەۆا مەن ونىڭ قىزىن قازاقستانعا دەپورتاتسيالاۋ تۋرالى شەشىم قابىلدادى.
يتاليا پروكۋراتۋراسى پوليتسيا ارەكەتتەرى مەن دەپورتاتسيالاۋ تۋرالى سوت اكتىسىن زاڭدى جانە نەگىزدى دەپ تانىدى.
تيىسىنشە, شالاباەۆا مەن ونىڭ قىزىنىڭ قۇقىقتارى مەن بوستاندىقتارىنىڭ يتاليا قۇزىرەتتى ورگاندارى تاراپىنان بۇزىلعانى تۋرالى ءابىلازوۆتىڭ بارلىق مالىمدەمەلەرى نەگىزسىز بولىپ تابىلادى.
يتاليالىق قۇقىق قورعاۋ ورگاندارى ءابىلازوۆتى انىقتاۋ مەن ۇستاۋ بويىنشا شارالاردى جالعاستىرۋدا.
بۇرىنىراقتا قازاقستاندىق قۇقىق قورعاۋ ورگاندارى ءابىلازوۆتىڭ تۋىستارىنا, سونىڭ ىشىندە شالاباەۆا مەن ونىڭ قىزىنا ءىس جۇزىندە ولار قازاقستان رەسپۋبليكاسىندا جوق بولعان كەزدە ۇلتتىق پاسپورتتى زاڭسىز جاساۋ مەن بەرۋ فاكتىلەرىن انىقتاعان بولاتىن.
بۇل دەرەك بويىنشا اتىراۋ وبلىستىق كوشى-قون پوليتسياسى قىزمەتكەرلەرىنە قاتىستى قىلمىستىق ءىس قوزعالدى. ول قازىرگى ۋاقىتتا سوتتىڭ قاراۋىنا ۇسىنىلدى.
بۇگىنگى تاڭدا تەرگەۋ شالاباەۆانىڭ اتالعان قىلمىسقا قاتىستىلىعىن تەكسەرۋدە. وسىعان بايلانىستى وعان ەشقايدا كەتپەۋ تۋرالى قولحات تۇرىندەگى بۇلتارتپاۋ شاراسى قولدانىلدى.
شالاباەۆانىڭ ءوتىنىشى بويىنشا تۇرعىلىقتى جەرى رەتىندە الماتى قالاسى بەلگىلەندى. ەندى ونىڭ اۋماعىنان ول تەرگەۋشىنىڭ رۇقساتىنسىز كەتۋگە قۇقىلى ەمەس.
تەرگەۋ ورگانى ونىڭ ەل كونستيتۋتسياسى مەن زاڭدارىمەن كەپىلدەنگەن زاڭدى قۇقىقتارى مەن بوستاندىقتارىنىڭ مۇلتىكسىز ساقتالۋىن قامتاماسىز ەتەتىن بولادى.
قۇرىش نۇرىمبەت.